बझाङ।   बझाङको केदारस्युँ गाउँपालिका–७ भामचौरमा जिप दुर्घटना हुँदा दुई जनाको मृत्यु भएको छ । बुधबार बिहान भएको दुर्घटनामा जिपमा सवार अन्य यात्रु घाइते भएको आशंका गरिएको छ ।

बिहान ९ः१० बजे भएको दुर्घटनामा जिपमा १२ देखि १५ जनासम्म सवार रहेको प्रत्यक्षदर्शीले बताएका छन् । दुर्घटनामा दुई जनाको घटनास्थलमै मृत्यु भएको सूचना प्राप्त भएपछि प्रहरीले उद्धारका लागि टोली परिचालन गरेको जिल्ला प्रहरी कार्यालय बझाङले जनाएको छ ।

जिल्ला प्रहरी कार्यालयका प्रहरी निरीक्षक उपेन्द्र तिमिल्सैनाका अनुसार अस्थायी प्रहरी पोस्ट बिजगडाबाट दुई, अस्थायी प्रहरी पोस्ट बागथलाबाट दुई र जिल्ला प्रहरी कार्यालयबाट प्रहरी निरीक्षक तिमिल्सैनाको कमाण्डमा सात जना प्रहरी घटनास्थलतर्फ खटिएका छन् ।

दुर्घटनास्थल जिल्ला प्रहरी कार्यालय बझाङबाट करिब ३५ किलोमिटर पश्चिममा पर्छ । मृतकको पहिचान, घाइतेको अवस्था र दुर्घटनाको कारणबारे विस्तृत विवरण आउन बाँकी रहेको प्रहरीले जनाएको छ ।

मुस्ताङ, कात्तिक १८ गते ।  तिहार नजिकिएसँगै हिमाली जिल्ला मुस्ताङबाट भेडाच्याङ्ग्रा बिक्री बढेको छ । तिहारलाई लक्षित गरी सोमबारसम्म एक हजार तीन सयभन्दा बढी भेडाच्याङ्ग्रा स्वास्थ्य परीक्षणपछि बजार पठाइएको छ । यस वर्ष तिहारका लागि मुस्ताङबाट करिब तीन हजार भेडाच्याङ्ग्रा बिक्री हुने अनुमान गरिएको छ ।

कृषि तथा पशु विकास कार्यालय मुस्ताङका अनुसार दसैंमा १४ हजार हाराहारीमा भेडाच्याङ्ग्रा बिक्री भएका थिए । तिहारका लागि पनि व्यापारीहरूले मुस्ताङबाट भेडाच्याङ्ग्रा खरिद गरेर लैजान थालेका छन् ।

कार्यालय प्रमुख डा. लालमणि अर्यालका अनुसार भेडाच्याङ्ग्रा खरिद गर्न म्याग्दी, बागलुङ, पोखरा र काठमाडौंका नियमित व्यापारी मुस्ताङ पुगेका छन् । यो साताभित्र अधिकांश भेडाच्याङ्ग्रा बजार पुग्ने उनले बताए । बिक्रीका लागि ल्याइएका सबै भेडाच्याङ्ग्रा चरन क्षेत्रबाट संकलन गरिएको उनको भनाइ छ ।

उनका अनुसार हालसम्म डोल्पाबाट पनि केही भेडाच्याङ्ग्रा मुस्ताङ ल्याइएको छ । तर बजारमा बिक्री भइरहेका अधिकांश भेडाच्याङ्ग्रा मुस्ताङकै किसानले पालेका हुन् । उत्पादन बढेकाले विगतको तुलनामा यस वर्ष दसैं र तिहारमा भेडाच्याङ्ग्राको कारोबारसमेत बढेको उनले बताए ।

किसानले तौलअनुसार एउटा च्याङ्ग्रा ३५ हजारदेखि ४० हजार रुपैयाँसम्ममा बिक्री गरिरहेका छन् । दसैंमा भने रोज्जा च्याङ्ग्राको मूल्य प्रतिगोटा ५२ हजार रुपैयाँसम्म पुगेको थियो ।

दसैंमा मुस्ताङका पाँच स्थानीय तहका किसानले पालेका तथा कर्णाली प्रदेशका डोल्पा, मुगु र हुम्लाबाट ल्याइएका १३ हजार ९५० भेडाच्याङ्ग्रा बिक्री भएका थिए । ती भेडाच्याङ्ग्राको कारोबारबाट ३६ करोड १० लाख रुपैयाँ बराबरको आर्थिक कारोबार भएको थियो ।

मुस्ताङका किसानले गोठबाटै तथा आफैं बजारसम्म पुर्‍याएर भेडाच्याङ्ग्रा बिक्री गर्दै आएका छन् । जिल्लाका लो–घेकर दामोदरकुण्ड, लोमान्थाङ र वारागुङ मुक्तिक्षेत्र गाउँपालिका भेडाच्याङ्ग्रा पालनका प्रमुख क्षेत्रका रूपमा चिनिन्छन् ।

एउटा भेडाच्याङ्ग्रा मासुका लागि तयार पार्न सामान्यतया तीन वर्षसम्म पाल्नुपर्ने हुन्छ । यस क्रममा चरन, खोप, गोठालो र हेरचाहमा किसानले ठूलो खर्च गर्नुपर्छ । रोज्जा च्याङ्ग्रा तयार पार्न भने करिब चार वर्ष लाग्ने गर्छ ।

प्रतिकूल मौसमका कारण गत वर्षको तुलनामा यस वर्ष उपल्लो डोल्पाको छार्काताङसोङ गाउँपालिकाबाट कम भेडाच्याङ्ग्रा आएको व्यापारी ज्ञानकुमार श्रेष्ठले बताए ।

मुस्ताङका पशुपालक किसानले च्याङ्ग्रा र रोमा बिक्री गरेपछि गोठालालाई गोठमै छाडेर जाडो छल्न अन्यत्र जाने गरेका छन् । समुद्री सतहदेखि ६ हजार मिटरसम्मको उच्च हिमाली क्षेत्रमा पाइने च्याङ्ग्रा कठोर चिसो र कम अक्सिजन भएको वातावरणमा हुर्किन्छन् । लेकाली जडीबुटी खाने भएकाले दसैं–तिहारजस्ता पर्वमा यसको मासुको माग उच्च रहने गरेको छ ।

नेपालगञ्ज । यस वर्षको भाइटीकाको शुभसाइत सार्वजनिक भएको छ । नेपाल पञ्चाङ्ग निर्णायक विकास समितिका सदस्य लक्ष्मण पन्थीका अनुसार २०८३ सालको भाइटीकाको शुभसाइत कात्तिक २५ गते बिहान ११ बजेर ७ मिनेटमा रहेको छ ।

समितिका अनुसार यस वर्ष यमपञ्चक अन्तर्गतका पर्वहरू कात्तिक २० गतेदेखि सुरु हुनेछन् । कात्तिक २० गते शुक्रबार धनत्रयोदशी (धन्तेरस) र यमदीपदान गरिनेछ । कात्तिक २१ गते शनिबार काग तिहार तथा धन्वन्तरि जयन्ती मनाइनेछ ।

त्यस्तै, कात्तिक २२ गते आइतबार नरक चतुर्दशी, कुकुर तिहार र लक्ष्मीपूजा परेको छ । कात्तिक २३ गते सोमबार गाईपूजा हुनेछ भने कात्तिक २४ गते मंगलबार गोवर्धन पूजा, गोरुपूजा, बलिपूजा, हलितिहार र म्हपूजा मनाइनेछ । सोही दिन नेपाल संवत् ११४७ प्रारम्भ हुनेछ ।

यमपञ्चकको अन्तिम दिन कात्तिक २५ गते बुधबार यमद्वितीया तथा भाइटीका मनाइनेछ । समितिले भाइटीकाको दिन दाजुभाइ पश्चिम फर्किएर र दिदीबहिनी पूर्व फर्किएर टीका लगाउनुपर्ने जनाएको छ ।

महिलाले पनि आफू पीडित नभएको भन्दै अन्तर्वार्ता दिएको र घटनासम्बन्धी कुनै औपचारिक उजुरी नपरेको विषयलाई समितिले आफ्नो निष्कर्षको आधार बनाएको छ । यद्यपि, समितिले ती महिलालाई प्रत्यक्ष भेटेर उनको भनाइ सुनेको छैन । आफ्नो कार्यक्षेत्रभित्र नपर्ने विषय भएकाले महिलासँग प्रत्यक्ष संवाद नगरिएको समितिका सदस्यले बताएका छन् । समितिका सदस्य सन्तोष आचार्यका अनुसार सुनारको बयान लिनुका साथै सम्पादन हुनुअघिको अडियो र महिलाको अन्तर्वार्तासमेत संकलन गरिएको छ ।

बाँके, कात्तिक १८।   विवादित अडियो प्रकरणमा मुछिएका राष्ट्रिय स्वतन्त्र पार्टी (रास्वपा) बाट बाँके निर्वाचन क्षेत्र नम्बर ३ बाट निर्वाचित सांसद खगेन्द्र सुनारलाई पार्टीले उन्मुक्ति दिने तयारी गरेको छ । सुनारको इन्कारी बयान, महिलाले आफू पीडित नभएको भन्दै दिएको अन्तर्वार्ता र पीडित पक्षबाट कुनै उजुरी नपरेको आधार देखाउँदै पार्टीको छानबिन समितिले उनलाई कारबाही गर्न नपर्ने निष्कर्ष निकाल्ने तयारी गरेको हो ।

सांसद सुनारले एक महिलासँग अश्लील शब्द प्रयोग गर्दै हिंसात्मक अभिव्यक्ति दिएको भनिएको अडियो सार्वजनिक भएपछि रास्वपाले पार्टीको अनुशासन आयोगमार्फत छानबिन अघि बढाएको थियो । आयोगले उपप्रमुख एवं अधिवक्ता हरिचन्द्र भट्टराईको नेतृत्वमा समिति गठन गरी घटनाको सत्यतथ्य अध्ययन गर्न जिम्मेवारी दिएको थियो ।
छानबिनका क्रममा समितिले सांसद सुनारको बयान लिनुका साथै सार्वजनिक भएको अडियो र महिलाको अन्तर्वार्तासम्बन्धी सामग्री संकलन गरेको छ । तर विवादित अडियो सुनारकै आवाज हो वा होइन भन्ने यकिन गर्न अहिलेसम्म प्राविधिक परीक्षण गरिएको छैन । समितिले प्राप्त गरेको प्रारम्भिक विवरणका आधारमा सुनारलाई कारबाही गर्नुपर्ने अवस्था नरहेको निष्कर्ष निकालेको बताइएको छ । सुनारले अडियो आफ्नो नभएको दाबी गर्दै आएका छन् । उनले उक्त अडियो कृत्रिम बुद्धिमत्ता (एआई) लगायत प्रविधिको प्रयोग गरेर तयार पारिएको आरोपसमेत लगाएका थिए ।

महिलाले पनि आफू पीडित नभएको भन्दै अन्तर्वार्ता दिएको र घटनासम्बन्धी कुनै औपचारिक उजुरी नपरेको विषयलाई समितिले आफ्नो निष्कर्षको आधार बनाएको छ । यद्यपि, समितिले ती महिलालाई प्रत्यक्ष भेटेर उनको भनाइ सुनेको छैन । आफ्नो कार्यक्षेत्रभित्र नपर्ने विषय भएकाले महिलासँग प्रत्यक्ष संवाद नगरिएको समितिका सदस्यले बताएका छन् । समितिका सदस्य सन्तोष आचार्यका अनुसार सुनारको बयान लिनुका साथै सम्पादन हुनुअघिको अडियो र महिलाको अन्तर्वार्तासमेत संकलन गरिएको छ । अडियोको प्राविधिक परीक्षण गर्ने वा नगर्ने भन्ने विषयमा भने समितिले अन्तिम निर्णय गरिसकेको छैन ।

अडियो परीक्षण नगरी सुनारलाई सफाइ दिने निष्कर्षमा पुग्न खोजिएको भन्दै रास्वपाको छानबिन प्रक्रियामाथि प्रश्न उठ्न थालेको छ । विशेषगरी महिलाको अस्मिता र न्यायसँग जोडिएको संवेदनशील विषयमा सम्बन्धित पक्षको भनाइ प्रत्यक्ष नसुनी तथा अडियोको प्राविधिक सत्यता परीक्षण नगरी निष्कर्ष निकाल्न खोजिएको भन्दै आलोचना भइरहेको छ । छानबिन समितिले तिहारअघि सुझावसहितको प्रतिवेदन बुझाउने तयारी गरेको छ । समितिका एक सदस्यका अनुसार अडियोको प्राविधिक परीक्षण गर्ने निर्णय भए प्रतिवेदन बुझाउन थप समय लाग्नेछ । परीक्षण नगर्ने निर्णय भए सुनारलाई कारबाही गर्नुपर्ने आधार नभएको निष्कर्षसहित प्रतिवेदन छिट्टै बुझाइनेछ ।

यसअघि रास्वपा महामन्त्री विपिन आचार्यले विज्ञप्तिमार्फत राज्यका सम्बन्धित निकायबाट स्वतन्त्र, निष्पक्ष र तथ्यपरक अनुसन्धान हुने विश्वास व्यक्त गरेका थिए । पार्टीले सरकारी निकायको ध्यानाकर्षण गराए पनि आफ्नै छानबिन समितिबाट सुनारलाई सफाइ दिने तयारी गरेपछि पार्टीको सुशासन र जवाफदेहितासम्बन्धी प्रतिबद्धतामाथि प्रश्न उठेको छ । राष्ट्रिय मानवअधिकार आयोगले घटनालाई चासोका साथ हेरिरहेको जनाएको छ । राष्ट्रिय महिला आयोगले भने पीडित पक्षबाट उजुरी नआएकाले कानुनी प्रक्रिया अघि बढाउन कठिन भएको बताएको छ । महिला आयोगकी प्रवक्ता कृष्णकुमारी खतिवडाले पीडितले उजुरी दिए न्यायका लागि सहयोग गर्न आयोग तयार रहेको बताएकी छन् ।

सुनारले भने प्रहरीभित्रको भ्रष्टाचारविरुद्ध आवाज उठाएकै कारण आफूलाई निशाना बनाइएको दाबी गर्दै आएका छन् । विवादित अडियो सार्वजनिक भएपछि उनले आफूविरुद्ध नियोजित प्रचार भइरहेको जिकिर गरेका थिए ।

धनगढी । घर पोत्नका लागि माटो खन्ने क्रममा ढिस्को खस्दा धनगढीमा एक महिलाको मृत्यु भएको छ ।

धनगढी उपमहानगरपालिका–१६ भादास्थित गणेश सामुदायिक वनमा माटो खन्ने क्रममा ढिस्कोले पुरिएर स्थानीय ३९ वर्षीया कवितादेवी चौधरीको मृत्यु भएको हो ।

सोमबार साँझ करिब ५ बजे माटो खनिरहेका बेला एक्कासि माथिबाट ढिस्को खस्दा चौधरी पुरिएर गम्भीर घाइते भएकी थिइन् । उनलाई तत्काल उद्धार गरी उपचारका लागि धनगढीस्थित नवजीवन अस्पताल पुर्‍याइएको थियो । तर, अस्पतालका चिकित्सकले उनलाई मृत घोषणा गरेका थिए ।

घर पोत्नका लागि माटो लिन सामुदायिक वन पुगेकी चौधरीको माटो खन्ने क्रममा भएको दुर्घटनामा ज्यान गएको हो ।

काठमाडौँ ।  नेपाल प्रिमियर लिग (एनपीएल) अन्तर्गत आज हुने लिग चरणको १२औँ खेलमा जनकपुर बोल्ट्सले विराटनगर किङ्ग्सलाई पहिले ब्याटिङ गर्न निम्तो दिएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेलमा जनकपुरले टस जितेर पहिले बलिङ गर्ने निर्णय गरेको हो । खेल केहीबेरमा सुरु हुनेछ ।

दुवै टोलीका लागि आजको खेल अङ्कतालिकामा आफ्नो अवस्था सुधार गर्ने महत्वपूर्ण अवसर हुनेछ । प्रतियोगितामा सहभागी आठ टोलीमध्ये लिग चरणको अन्त्यमा शीर्ष चार स्थानमा रहने टोली प्लेअफमा प्रवेश गर्नेछन् ।

जनकपुर र विराटनगर दुवै टोली जित निकाल्दै प्रतियोगितामा आफ्नो दाबेदारी बलियो बनाउने लक्ष्यसहित मैदान उत्रनेछन् ।

सुर्खेत ।  सुत्केरी व्यथाले स्वास्थ्य अवस्था गम्भीर बनेपछि डोल्पाकी २६ वर्षीया महिलालाई नेपाली सेनाको हेलिकप्टरबाट उद्धार गरी सुर्खेत ल्याइएको छ।

छार्काताङसोङ गाउँपालिका–कागकोटकी जुनु बुढालाई थप उपचारका लागि मंगलबार हेलिकप्टरमार्फत सुर्खेतस्थित कर्णाली प्रदेश अस्पताल ल्याइएको हो।

सुत्केरी व्यथा लागेपछि बुढालाई सोमबार जिल्ला अस्पताल डोल्पा पुर्‍याइएको थियो। जिल्ला अस्पतालमा उपचारका क्रममा स्वास्थ्य अवस्था थप जटिल बनेपछि सुविधासम्पन्न अस्पतालमा लैजानुपर्ने अवस्था आएको जिल्ला प्रशासन कार्यालय डोल्पाले जनाएको छ।

सोमबारदेखि नै गम्भीर अवस्थामा रहेकी बुढालाई जिल्ला अस्पतालमा उपचार सम्भव नभएपछि नेपाली सेनाको हेलिकप्टरबाट उद्धार गरी सुर्खेत ल्याइएको हो।

राप्तीसोनारी गाउँपालिकाद्वारा सडक र स्वास्थ्य चौकी निर्माणका चार ठूला ठेक्का स्वीकृत, साढे दुई करोड बढीको योजना अघि बढ्दै ।

राप्तीसोनारी, कात्तिक १७।  राप्तीसोनारी गाउँपालिकाले आफ्नो क्षेत्रभित्र पूर्वाधार विकासलाई तीव्रता दिने उद्देश्यका साथ विभिन्न चारवटा महŒवपूर्ण विकास योजनाहरूको ठेक्का सम्झौता प्रक्रिया अगाडि बढाएको छ । गाउँ कार्यपालिकाको कार्यालय, अगैयाले सार्वजनिक खरिद ऐन, २०६३ को कानुनी परिधिभित्र रहेर चालु आर्थिक वर्ष २०८३/०८४ का लागि प्राप्त बोलपत्रहरूमध्ये प्राविधिक र आर्थिकरूपमा उपयुक्त कम्पनीहरूलाई छनोट गर्दै बोलपत्र स्वीकृत गर्ने आशयको सूचना प्रकाशित गरेको हो ।

गाउँपालिकाले सडक सञ्जाल विस्तार, स्वास्थ्य क्षेत्रको भौतिक सुधार तथा प्रशासनिक पूर्वाधार सुदृढीकरणका लागि कुल दुई करोड एकासी लाख चौरानब्बे हजार तीन सय उनसन्तरी रुपैयाँ बराबरको बजेटसहित ठेक्का स्वीकृतिको अन्तिम चरण पूरा गरेको छ । गाउँपालिकाले सार्वजनिक गरेको विवरण अनुसार वडा नम्बर १ मा पर्ने बर्धापुर प्रतिक्षालयदेखि झोलुङ्गे पुलसम्म जाने बाटो निर्माणको काम सबैभन्दा ठूलो योजनाको रूपमा रहेको छ, जसका लागि सौरभ कन्स्ट्रक्सन, राप्तीसोनारी–०९ लाई एक करोड चौँतीस लाख बाइस हजार आठ सय बीस रुपैयाँमा छनोट गरिएको छ । यसैगरी, वडा नम्बर ३ मा यातायात सहजताका लागि महत्वपूर्ण मानिएको भवानियापुरदेखि नारायणपुरसम्म जोड्ने सडक निर्माणको जिम्मेवारी त्रियानब्बे लाख छयासी हजार तीन सय चौध रुपैयाँमा कोहलपुरको जय गणेश निर्माण सेवाले प्राप्त गरेको छ ।

भौतिक पूर्वाधारसँगै स्वास्थ्य सेवातर्फ वडा नम्बर ९ मा रहेको महादेवा स्वास्थ्य चौकीको भवनमा तला थप गर्ने कार्यका लागि अठ्ठाइस लाख छ हजार एक सय तियासी रुपैयाँमा युदिप्स निर्माण सेवा, कोहलपुर छनोट भएको छ । सोही निर्माण सेवाले गाउँपालिकाको मुख्य प्रशासनिक कार्यालय भित्रको विभिन्न मर्मत तथा आन्तरिक निर्माण कार्यका लागि पनि पच्चिस लाख उनन्तरी हजार पचास रुपैयाँ बराबरको अर्को ठेक्का प्राप्त गर्न सफल भएको छ ।

यस विषयमा राप्ती सोनारी गाउँपालिकाका अध्यक्ष तप्तबहादुर पौडेलले पालिकाको समग्र विकासका लागि यी योजनाहरू कोसेढुङ्गा सावित हुने विश्वास व्यक्त गरे । अध्यक्ष पौडेलले भने, ‘हामी राप्तीसोनारीवासीको जीवनस्तर सुधार र सहजताका लागि पूर्वाधार विकासलाई पहिलो प्राथमिकतामा राखेर काम गरिरहेका छौँ । बर्धापुरदेखि झोलुङ्गे पुल जाने सडक र भवानियापुर–नारायणपुर सडकले स्थानीय उत्पादनलाई बजारसम्म जोड्न ठूलो मद्दत गर्नेछ । स्वास्थ्य क्षेत्र हाम्रो अर्को संवेदनशील प्राथमिकता हो, जसका कारण महादेवा स्वास्थ्य चौकीको स्तरोन्नति गर्न लागिएको हो ।’

अध्यक्ष पौडेलले निर्माण कार्यको गुणस्तर र समयसीमामा कुनै सम्झौता नगरिने स्पष्ट पारे । उनले थपे, ‘ठेक्का प्रक्रिया पारदर्शी र ऐन सम्मत ढंगले अगाडि बढाइएको छ । अब छनोट भएका निर्माण व्यवसायीहरूले सम्झौता हुनासाथ तोकिएको समयभित्रै गुणस्तरीय काम सम्पन्न गर्नुपर्नेछ । पालिकाले यसको नियमित अनुगमन र सहजीकरण गर्नेछ । विकासका काममा स्थानीय नागरिकको पनि रचनात्मक निगरानी आवश्यक रहन्छ ।’

गाउँपालिकाका अनुसार गत असोज ८ गते प्रकाशित बोलपत्र आह्वान सम्बन्धी सूचनाको आधारमा देशैभरका निर्माण व्यवसायीहरूले प्रतिस्पर्धा गरेका थिए । पेश हुन आएका बोलपत्रहरूमध्ये न्यूनतम मूल्याङ्कन गरिएको र सारभूतरूपमा प्रभावग्राही देखिएका कम्पनीहरूलाई सार्वजनिक खरिद ऐन, २०६३ को दफा २७ को उपदफा २ र दफा ४७ को प्रयोजनार्थ छनोट गरिएको पालिकाले सूचनामार्फत स्पष्ट पारेको छ । यो सूचना प्रकाशित भएको सात दिनभित्र प्राविधिक र प्रक्रियागत रूपमा कसैको उजुरी वा दाबी विरोध नआएमा निर्माण कम्पनीहरूसँग औपचारिक सम्झौता गरी फिल्डमा काम सुरु गरिने गाउँपालिका कार्यालयले जनाएको छ ।

नेपालगन्ज । फोक्सो तथा श्वासप्रश्वाससम्बन्धी रोग, सघन उपचार र निद्रासम्बन्धी समस्याको पहिचान तथा उपचारका लागि भेरी अस्पतालमा विशेषज्ञ सेवा सुरु भएको छ। अस्पतालले मंगलबार (कार्तिक १७) देखि डा. रञ्जित पाण्डेमार्फत उक्त सेवा सञ्चालनमा ल्याएको हो।

नयाँ सेवा सुरु भएसँगै भेरी अस्पतालमा आज मिति २०८३ कार्तिक १७ गतेदेखि डा. रञ्जित पाण्डेद्वारा फोक्सो तथा श्वासप्रश्वास रोग (Pulmonology), सघन उपचार सेवा (Critical Care) तथा निद्रा रोग (Sleep Medicine) सम्बन्धी विशेषज्ञ सेवा सञ्चालनमा आएको छ।

अस्पतालको ओपीडी–७ (ए) बाट प्रत्येक हप्ताको मंगलबार र बिहीबार सेवा उपलब्ध हुने अस्पतालले जनाएको छ।

विशेषज्ञ सेवाको अस्पताल विकास समितिका अध्यक्ष डा. लक्ष्मण सिग्देल, प्रमुख मेडिकल सुपरिन्टेन्डेन्ट डा. नवीन दर्नाल, प्रमुख कन्सल्टेन्ट डर्माटोलोजिस्ट डा. बद्री चापागाईं, वरिष्ठ कन्सल्टेन्ट फिजिसियन डा. राजन पाण्डे तथा नर्सिङ प्रमुख पदमा देवी देवकोटालगायतको टोलीले संयुक्त रूपमा उद्घाटन गरेको हो।

भेरी अस्पतालले विशेषज्ञ सेवाको विस्तारसँगै फोक्सो तथा श्वासप्रश्वास रोग, क्रिटिकल केयर र निद्रा रोगको उपचारका लागि अन्यत्र जानुपर्ने बिरामीको बाध्यता कम हुने अपेक्षा गरेको छ। अस्पतालले सर्वसाधारणलाई सहज, सुलभ र गुणस्तरीय स्वास्थ्य सेवा उपलब्ध गराउने उद्देश्यले विशेषज्ञ सेवा विस्तारलाई निरन्तरता दिएको जनाएको छ।