कोहलपुर, असार १२ कोहलपुर–११ स्थित ज्ञान बहुमुखी क्याम्पसमा स्नातक तह चौथो वर्ष (ब्याच २०८३) का विद्यार्थीहरूको सम्मानमा बिदाई तथा उज्ज्वल भविष्यको शुभकामना कार्यक्रम सम्पन्न भएको छ । स्नातक तह तेस्रो वर्षका विद्यार्थीहरूले आयोजना गरेको कार्यक्रममा अध्ययन पूरा गर्न लागेका विद्यार्थीलाई सम्मानपूर्वक बिदाई गर्दै आगामी शैक्षिक, व्यावसायिक तथा व्यक्तिगत जीवनका लागि सफलताको शुभकामना व्यक्त गरिएको थियो ।
कार्यक्रमको अध्यक्षता व्यवस्थापन संकाय तेस्रो वर्षकी अमृता आचार्यले गरेकी थिइन् । प्रमुख अतिथिका रूपमा ज्ञान बहुमुखी क्याम्पसका क्याम्पस प्रमुख टेकबहादुर गुरुङ सहभागी भएका थिए भने विशिष्ट अतिथिमा क्याम्पसका सहायक प्रमुख गणेशकुमार खड्का रहेका थिए । कार्यक्रममा प्राध्यापक विमलाकुमारी खत्रीलगायत शिक्षक, कर्मचारी तथा विभिन्न संकायका विद्यार्थीहरूको उल्लेखनीय उपस्थिति रहेको थियो ।
कार्यक्रमलाई सम्बोधन गर्दै प्रमुख अतिथि गुरुङले विद्यार्थी जीवन मानिसको भविष्य निर्माण गर्ने सबैभन्दा महत्वपूर्ण चरण भएको उल्लेख गर्दै क्याम्पसबाट हासिल गरेको ज्ञान, सीप र अनुशासनलाई व्यवहारमा उतार्न आग्रह गरे । उनले समाज र राष्ट्रको विकासमा शिक्षित युवाको भूमिका अत्यन्त महत्वपूर्ण रहने बताउँदै अध्ययनसँगै असल चरित्र र जिम्मेवारीबोधको विकास गर्नुपर्नेमा जोड दिए । विशिष्ट अतिथि खड्काले क्याम्पसबाट बिदाइ भए पनि विद्यार्थी र क्याम्पसबीचको सम्बन्ध कहिल्यै समाप्त नहुने उल्लेख गर्दै आफूले सिकेको ज्ञानलाई समाजको हितमा प्रयोग गर्न आग्रह गरे । उनले सबै विद्यार्थीलाई उज्ज्वल भविष्यको शुभकामना व्यक्त गर्दै निरन्तर मेहनत, इमानदारी र सकारात्मक सोचका साथ अघि बढ्न सुझाव दिए ।
प्राध्यापक विमलाकुमारी खत्रीले विद्यार्थीसँग बिताएका शैक्षिक अनुभव स्मरण गर्दै जीवनका हरेक चुनौतीलाई अवसरका रूपमा लिन प्रेरित गरिन् । उनले सफलताको आधार निरन्तर अध्ययन, आत्मविश्वास र मेहनत भएको बताइन् । कार्यक्रममा विद्यार्थीहरूले गीत, नृत्य, कविता तथा मनोरञ्जनात्मक सांस्कृतिक प्रस्तुति प्रस्तुत गरेका थिए । बिदाइ हुने विद्यार्थीहरूले क्याम्पसमा बिताएका अविस्मरणीय क्षणहरू स्मरण गर्दै शिक्षक, कर्मचारी र सहपाठीप्रति आभार व्यक्त गरेका थिए । साथै आयोजक विद्यार्थीहरूले मायाको चिनो प्रदान गर्दै सबै बिदाइ हुने विद्यार्थीको सफल र उज्ज्वल भविष्यको कामना गरेका थिए ।
सौहार्दपूर्ण वातावरणमा सम्पन्न कार्यक्रममा शिक्षक–विद्यार्थीबीच आत्मीयता, सहकार्य र सम्झनाहरू साटासाट गरिएको थियो । आयोजकले यस्ता कार्यक्रमले विद्यार्थीबीचको सम्बन्धलाई अझ सुदृढ बनाउनुका साथै नयाँ यात्रामा अघि बढ्ने विद्यार्थीलाई प्रेरणा र आत्मविश्वास प्रदान गर्ने विश्वास व्यक्त गरेका छन् ।
