बाँकेको खजुरामा प्रथम अशोक स्मृति कप फुटबल प्रतियोगिता २०८३ हुने भएको छ । २० वर्ष उमेर सम्मको खेलाडी खेलमा सहभागी हुन पाउने गरी अशोक स्मृति कप फुटबल प्रतियोगिता सञ्चालन गर्न लागिएको हो । श्री दि फेमस महिन्द्र दल गण भूपू र न्यू डाँफे स्पोर्ट्स क्लबको संयुक्त आयोजनामा खजुरा डि गाउँ स्थित मिनी रंगशालामाको वैशाख २७ गते देखि सञ्चालन गरिने आयोजक दि फेमस महिन्द्र दल गण भूपू अध्यक्ष कृष्ण लाल गिरीले जानकारी दिए । जिल्ला र पालिकामा दर्ता भएका १२ टिमको प्रतियोगितामा सहभागिता रहने न्यू डाँफे स्पोर्ट्स क्लबका अध्यक्ष बालराम खत्रीले जानकारी दिए ।
नेपाली सेनामा कार्यरत रहेका अशोक बिक फुटबल खेलाडी समेत रहेका थिए । खेलाडी विकको स्मृतिमा हुन लागिरहेको फुटबल प्रतियोगितामा विजेता हुने टिमले नगद ५१ हजार ट्रफी र मेडल प्रमाणपत्र प्राप्त गर्नेछन् । भने उपविजेता टिमले नगद ३१ हजार ट्रफी मेडल र प्रमाणपत्र प्राप्त गर्ने महिन्द्र दल गण भूपूका कोषाध्यक्ष बलबहादुर खड्काले बताए । खेल नकआउट प्रक्रियामा सञ्चालन गरिने शनिबार पत्रकार सम्मेलन मार्फत जानकारी दिएका छन् । प्रतियोगिताको प्रथम राशि मुख्य आयोजक महिन्द्र दल गढ भूपुले र दोस्रो पुरस्कार राशि स्वर्गीय अशोकका भाइ तथा न्यु डाफे स्पोर्ट्स क्लबका पूर्व अध्यक्ष हरिप्रकाश विकले बेहोर्ने पत्रकार सम्मेलनमा जनाइएको छ । प्रतियोगितामा विधागत पुरस्कारहरू समेत प्रदान गरिने विकले जानकारी दिए ।
प्रतियोगितामा अल राउन्ड वेस्ट खेलाडीलाई हिरोको साइकल प्रदान गरिने छ । यस्तै अन्य विधागत उत्कृष्ट खेलाडीलाई नगद २५०० का दरले पुरस्कृत गरिने आयोजकले जनाएको छ । प्रतियोगितामा हरेक दिनको उत्कृष्ट खेलाडीलाई १ हजार नगद सहित पुरस्कृत गरिने आयोजकले जनाए । पत्रकार सम्मेलनमा भूपू समितिका पदाधिकारी, न्यू डाँफे स्पोर्ट्स क्लबका पूर्व अध्यक्ष लोक बहादुर खत्री, नि वर्तमान अध्यक्ष तिलकबिर सुनार लगायतले शुभकामना मन्तव्य राखेका थिए ।
कोहलपुर बैशाख २० गते बाँकेको कोहलपुरमा चौथो संस्करणको “कोहलपुर गोल्डकप” फुटबल प्रतियोगिता सुरु भएको छ । उद्घाटन खेलमा आयोजक रेसिङ साहारा क्लबले पाहुना पञ्चकोशी युवा क्लबलाई २–१ गोल अन्तरले पराजित गर्दै प्रतियोगितामा विजयी सुरुवात गरेको छ ।
खेलको २४औँ मिनेटमा रेसिङ साहाराका डिफेन्डर पेपेले पहिलो गोल गर्दै टिमलाई अग्रता दिलाएका थिए । त्यसपछि पहिलो हाफको ४४औँ मिनेटमा फागुराम चौधरीले अर्को गोल थप्दै अग्रता दोब्बर बनाएका थिए । पहिलो हाफमा २–० को अग्रता बनाएको रेसिङ साहाराले खेलमा स्पष्ट दबाब कायम राखेको थियो ।
पाहुना टोली पञ्चकोशी युवा क्लबका खेलाडीहरुले खेलभरि केही राम्रा अवसर सिर्जना गरे पनि त्यसलाई गोलमा परिणत गर्न सकेनन् । दोस्रो हाफमा भने टोलीले सुधारिएको प्रदर्शन गर्दै आक्रमण बढायो । खेलको ८८औँ मिनेटमा विदेशी खेलाडी कुशाग्र उप्रेतीले सान्त्वना गोल फर्काए पनि हार टार्न पर्याप्त भएन । खेलमा उत्कृष्ट प्रदर्शन गरेका रेसिङ साहारा क्बलका पेपे “म्यान अफ द म्याच” घोषित भए । उनले ट्रफीसँगै नगद रु. ५,००० प्राप्त गरे ।
बैशाख १९ गतेदेखि २६ गतेसम्म सञ्चालन हुने प्रतियोगिताको विजेताले रु. ८ लाख र उपविजेताले रु. ४ लाख नगद पुरस्कार प्राप्त गर्नेछन् । साथै विभिन्न विधामा उत्कृष्ट खेलाडीहरूलाई आकर्षक पुरस्कार प्रदान गरिने आयोजकले जनाएको छ ।खेलमार्फत पर्यटन प्रवद्र्धन गर्ने उद्देश्यले फाइनलमा पुग्ने दुई टोलीलाई बाँके राष्ट्रिय निकुञ्ज मा जङ्गल सफारी गराइनेछ । साथै स्थानीय होमस्टेमा मौलिक खानपान र बसोबासको अनुभवसमेत उपलब्ध गराइने योजना रहेको छ । कोहलपुर नगरपालिका वडा नं. २ स्थित खेलमैदानमा सुरु भएको प्रतियोगिताको उद्घाटन नगर प्रमुख पूर्ण प्रसाद आचार्यले गरेका थिए ।
आज कर्णाली र नाइजेरियाली टिमबिच खेल हुने
प्रतियोगिताको दोस्रो दिन २० गते जस्ट जोन एफसी (नाइजेरिया) र रोयल फुटबल क्लब (कर्णाली) बिच खेल हुने भएको छ । खेल दिउँसो ४ बजे सुरु हुने प्रतियोगिता संयोजक कर्ण बहादुर बस्नेतले जानकारी दिए ।
नरैनापुर, वैशाख २० नरैनापुर गाउँपालिकाले आफ्नो क्षेत्रभित्र रहेका सरकारी, सार्वजनिक तथा ऐलानी जग्गामा गरिएको अनाधिकृत कब्जा हटाउन कडा चेतावनीसहित ७ दिने अल्टिमेटम जारी गरेको छ ।
संघीय मामिला तथा सामान्य प्रशासन मन्त्रालयको निर्देशन कार्यान्वयन गर्दै गाउँपालिकाले वडा नम्बर १ देखि ६ सम्मका विभिन्न स्थानमा सार्वजनिक जग्गा अतिक्रमण भएको तथ्य फेला परेको जनाएको छ । सो जग्गामा केही व्यक्तिहरूले अवैध रूपमा घर, टहरा, कम्पाउन्ड वाल तथा अन्य संरचना निर्माण गरेको पाइएपछि तत्काल हटाउन आग्रह गरिएको हो ।
नेपाल सरकारको सार्वजनिक सम्पत्ति संरक्षण नीति तथा मन्त्रिपरिषद्को चैत १३ गतेको बैठकबाट स्वीकृत शासकीय सुधारसम्बन्धी १०० बुँदे कार्यसूचीको बुँदा नम्बर ८२ अनुसार सार्वजनिक जग्गा संरक्षण, अतिक्रमण नियन्त्रण, डिजिटल अभिलेख तयार गर्ने, निगरानी प्रणाली सुदृढ गर्ने तथा अवैध कब्जा हटाउने कार्यलाई तत्काल अघि बढाउने व्यवस्था गरिएको छ ।
गाउँपालिकाले जारी गरेको सूचनामा सार्वजनिक जग्गा संरक्षणलाई प्राथमिकतामा राख्दै नयाँ अतिक्रमण रोक्न कडाइ गरिने उल्लेख गरिएको छ । साथै हाल अतिक्रमित जग्गा सम्बन्धित व्यक्तिहरूले स्वयम् ७ दिनभित्र खाली गरी संरचना हटाउन आग्रह गरिएको छ । निर्धारित समयसीमाभित्र संरचना नहटाएमा गाउँपालिकाले प्रचलित कानुन बमोजिम बलपूर्वक हटाउने चेतावनी दिएको छ । त्यस क्रममा लाग्ने सम्पूर्ण खर्च अतिक्रमणकारीबाट सरकारी बाँकी सरह असुल उपर गरिने तथा कानुनी कारबाही समेत अघि बढाइने सूचनामा स्पष्ट गरिएको छ ।
गाउँपालिका अध्यक्ष इश्तियाक अहमद शाहले सार्वजनिक सम्पत्ति संरक्षण राज्यको दायित्व भएकाले कसैलाई पनि गैरकानुनी रूपमा जग्गा कब्जा गर्न नदिइने स्पष्ट पारेका छन् । उनले स्थानीयवासीलाई कानुनी प्रक्रिया पालना गर्न र सरकारी सम्पत्तिको संरक्षणमा सहयोग गर्न आग्रह गरेका छन् । गाउँपालिकाले आगामी दिनमा डिजिटल अभिलेख प्रणाली र नियमित अनुगमनमार्फत सार्वजनिक जग्गा संरक्षणलाई थप प्रभावकारी बनाइने जनाएको छ ।
बाँके, वैशाख २० रोल्पाको थवाङ गाउँपालिका–१ सल्यापमा गत बिहीबार भएको भीषण जिप दुर्घटनामा २० जनाको ज्यान गएपछि सरकार सडक सुरक्षा प्रणाली सुधारमा नीतिगत तथा संरचनागत रूपमा कठोर कदम चाल्ने प्रतिबद्धतामा पुगेको छ ।
दुर्घटनाप्रति गहिरो दुःख व्यक्त गर्दै सरकारले दुर्घटना छानबिन समितिले तयार पार्ने प्रतिवेदनका निष्कर्ष तथा सुझावहरू तत्काल कार्यान्वयन गर्ने जनाएको छ । प्रधानमन्त्री तथा मन्त्रिपरिषद्को कार्यालयले शनिबार जारी गरेको विज्ञप्तिमा सडक दुर्घटना नागरिकको जीवन र परिवारको भविष्यसँग प्रत्यक्ष जोडिएको अत्यन्त संवेदनशील विषय भएकाले यसतर्फ सरकार गम्भीर रहेको उल्लेख गरिएको छ ।
सरकारका अनुसार दुर्घटनाको वास्तविक कारण पत्ता लगाउन र सत्यतथ्य सार्वजनिक गर्न गृह मन्त्रालयमार्फत उच्चस्तरीय छानबिन समिति गठन गरिएको हो । उक्त समितिको संयोजकत्व लुम्बिनी प्रदेश प्रहरी कार्यालयका प्रहरी उपरीक्षकले गरेका छन् । समितिको कार्यावधि शनिबार नै समाप्त हुने भए पनि प्रतिवेदनलाई अन्तिम रूप दिइएपछि त्यसका सुझाव कार्यान्वयनमा ढिलाइ नगर्ने सरकारको दाबी छ ।
विज्ञप्तिमा प्रधानमन्त्री बालेन्द्र शाह नेतृत्वको सरकार सडक सुरक्षासम्बन्धी प्राविधिक कमजोरी मात्र होइन, मानवीय त्रुटि र व्यवस्थापकीय कमजोरी समेत सुधार गर्दै दीर्घकालीन समाधानतर्फ अघि बढ्ने उल्लेख छ । दुर्घटनाबाट भएको ठूलो मानवीय क्षतिलाई गम्भीर रूपमा लिँदै सडक सुरक्षालाई राष्ट्रिय प्राथमिकतामा राखेर काम अघि बढाइने पनि जनाइएको छ ।
सरकारले दुर्घटनाको पुनरावृत्ति रोक्न आवश्यक कानुनी, प्राविधिक तथा संरचनागत सुधारलाई तीव्र बनाइने संकेत गरेको छ । साथै, आगामी दिनमा सडक यातायात व्यवस्थापनलाई सुरक्षित र व्यवस्थित बनाउन सबै सरोकारवालासँग समन्वय गरिने बताइएको छ ।
