कोहलपुर, जेठ १४  कोहलपुर–११ गोलपार्कस्थित भ्यू टावर सञ्चालनको तयारी सुरु गरिएको छ । कोहलपुर नगरपालिकाले टावरको पर्यटन शुल्क संकलन तथा सम्पूर्ण व्यवस्थापनका लागि ठेक्का आह्वान गरेसँगै सञ्चालन प्रक्रिया अघि बढेको हो ।

नगरपालिकाले सार्वजनिक सूचना जारी गर्दै भ्यू टावरको सञ्चालन तथा व्यवस्थापन १५ वर्षका लागि निजी क्षेत्रमार्फत गराउने तयारी गरेको जनाएको छ । नगरपालिकाका अनुसार प्रतिस्पर्धात्मक बोलपत्र प्रक्रियाबाट सबैभन्दा बढी रकम कबोल गर्ने व्यक्ति, फर्म वा कम्पनीलाई व्यवस्थापनको जिम्मा दिइनेछ । ठेक्का सूचनाअनुसार वार्षिक न्यूनतम मूल्य भ्याटसहित १२ लाख रुपैयाँ निर्धारण गरिएको छ । इच्छुक पक्षले कबोल अंकको १० प्रतिशत धरौटी राख्नुपर्ने व्यवस्था गरिएको छ भने बोलपत्र दस्तुर एक हजार रुपैयाँ तोकिएको छ । बोलपत्र सार्वजनिक खरिद अनुगमन कार्यालयको विद्युतीय खरिद प्रणालीमार्फत पेश गर्न सकिने नगरपालिकाले जनाएको छ ।

कोहलपुरको प्रमुख चोक नजिक निर्माण गरिएको भ्यू टावरलाई नगरको नयाँ पर्यटकीय गन्तव्यका रूपमा विकास गर्ने लक्ष्य लिइएको छ । टावर सञ्चालनमा आएपछि आन्तरिक पर्यटन प्रवद्र्धनमा टेवा पुग्ने अपेक्षा गरिएको छ । विशेषगरी बाँके, बर्दिया, दाङ तथा छिमेकी जिल्लाबाट आउने आन्तरिक पर्यटकका लागि यो आकर्षणको केन्द्र बन्न सक्ने स्थानीयको विश्वास छ ।

नगरपालिकाले भ्यू टावरलाई अवलोकनस्थलमा सीमित नराखी व्यवस्थित पर्यटन क्षेत्रका रूपमा विकास गर्ने तयारी गरेको जनाएको छ । टावर परिसरमा सरसफाइ, सुरक्षा, टिकट व्यवस्थापन तथा पर्यटकमैत्री सेवा विस्तार गर्ने योजना बनाइएको छ । साथै, स्थानीय उत्पादनको प्रवद्र्धन, फोटो तथा अवलोकन स्थल व्यवस्थापन र साना व्यवसायलाई समेत प्रोत्साहन गर्ने लक्ष्य राखिएको छ ।

स्थानीय व्यवसायीले भ्यू टावर सञ्चालनमा आएपछि होटल, रेष्टुरेन्ट तथा यातायात व्यवसायमा समेत सकारात्मक प्रभाव पर्ने बताएका छन् । नगरपालिकाले यस परियोजनाबाट राजश्व वृद्धि हुनुका साथै कोहलपुरलाई पर्यटकीय नगरका रूपमा चिनाउन सहयोग पुग्ने अपेक्षा गरेको छ ।

नेपालगन्ज, जेठ १४  बाँकेको नेपालगन्ज विमानस्थलमा मंगलबार दिउँसो भएको आगलागी समयमै नियन्त्रणमा आउँदा ठूलो क्षति हुनबाट जोगिएको छ । पुरानो ट्रान्सफर्मर नजिक विद्युत् लाइनबाट स्पार्क भएर आगोको झिल्का खस्दा विमानस्थल परिसरभित्र आगलागी भएको थियो ।

तार आपसमा ठोक्किँदा, इन्सुलेसन बिग्रिँदा, ट्रान्सफर्मर वा लाइनमा प्राविधिक खराबी आउँदा, वा हावाहुरीका कारण लाइन सर्ट हुँदा ‘झट्का जस्तो उज्यालो’ देखिन्छ, त्यसैलाई स्पार्क भनिन्छ । विद्युत् लाइनबाट ‘स्पार्क भएर आगोको झिल्का खस्नु’ भन्नाले विद्युत् तार वा उपकरणमा अचानक विद्युत् सर्ट, ढिलो–चाँडो सम्पर्क, तार चुँडिनु, वा अत्यधिक लोडका कारण चिंगारी (स्पार्क) निस्किनु हो । यही चिंगारी वा तातो धातुको सानो टुक्रा तल झर्दा वरिपरिका सुख्खा घाँस, प्लास्टिक, तेलजन्य पदार्थ वा ज्वलनशील वस्तुमा आगो लाग्न सक्छ । आगलागी भएको क्षेत्रको उत्तरतर्फ विमानस्थलको रनवे रहेको छ भने दक्षिणतर्फ नेपाल आयल निगमको इन्धन भण्डारण केन्द्र छ । आगो लागेको स्थान नजिकै बाहिर सडकतर्फ आयल निगमका केही ट्यांकरसमेत पार्किङमा रहेकाले घटना केहीबेर तनावपूर्ण बनेको थियो ।

स्थानीय कर्मचारी र विमानस्थल सुरक्षाकर्मीले आगो देख्नेबित्तिकै नियन्त्रण प्रयास सुरु गरेका थिए । त्यसपछि विमानस्थलको फायर भेहिकल घटनास्थलमा पुगेर आगो निभाएको थियो । करिब पाँचदेखि सात मिनेटभित्र आगो पूर्णरूपमा नियन्त्रणमा आएकाले सम्भावित ठूलो दुर्घटना टरेको हो । विमानस्थल प्रशासनका अनुसार आगलागी फैलिन नपाउँदै नियन्त्रणमा आएकाले कुनै भौतिक तथा मानवीय क्षति भएको छैन । आगलागीका कारण आसपासका सुख्खा घाँस जलेका छन् भने अन्य संरचनामा क्षति पुगेको छैन ।

नेपालगन्ज विमानस्थलका प्रवक्ता दिपेन्द्र रिजालले आगो सामान्य अवस्थामै नियन्त्रणमा आएकाले ठूलो जोखिम हुन नपाएको बताए । उनले विद्युत् लाइनबाट स्पार्क हुँदा ट्रान्सफर्मर आसपासको क्षेत्रमा आगो लागेको जानकारी दिए । ‘आगो ठूलोरूप लिन पाएन । समयमै नियन्त्रणमा आएकाले कुनै ठूलो क्षति भएन,’ उनले भने, ‘आगलागी आसपासका घाँसमा मात्रै सीमित भयो ।’

घटनापछि विमानस्थल क्षेत्रमा केही समय सतर्कता अपनाइएको थियो । सुरक्षाकर्मीले रनवे आसपासको क्षेत्रको निरीक्षण गर्नुका साथै इन्धन भण्डारण क्षेत्रतर्फ थप निगरानी बढाएका थिए । विमानस्थलजस्तो संवेदनशील क्षेत्रमा आगलागी भएको घटनाले विद्युत् सुरक्षामा थप सतर्कता आवश्यक रहेको देखिएको छ । विशेषगरी गर्मीयाममा सुख्खा घाँस र उच्च तापक्रमका कारण सामान्य स्पार्कबाट पनि आगलागी फैलिन सक्ने जोखिम रहने भएकाले नियमित निरीक्षण र सुरक्षा तयारीलाई प्राथमिकता दिनुपर्ने स्थानीयले बताएका छन् ।

नेपालगन्ज विमानस्थल पश्चिम नेपालको महŒवपूर्ण हवाई नाका मानिन्छ । दैनिक आन्तरिक उडान सञ्चालन हुने यस विमानस्थलमा आगलागी नियन्त्रण समयमै हुनुले सम्भावित ठूलो दुर्घटना टरेको सरोकारवालाले बताएका छन् ।