काठमाडौं ,साउन १२ । देशभर पछिल्लो २४ घण्टामा भएका सवारी दुर्घटनाले ६ जनाको ज्यान लिएको छ भने १४३ जना घाइते भएका छन्। दुर्घटनाबाट सबैभन्दा धेरै प्रभावित लुम्बिनी प्रदेश बनेको छ, जहाँ एक जनाको मृत्यु हुनुका साथै २८ जना घाइते भएका छन्।

नेपाल प्रहरीका अनुसार पछिल्लो २४ घण्टामा भएका दुर्घटनामध्ये घाइतेको संख्या लुम्बिनीमा सबैभन्दा बढी रहेको हो। मधेश प्रदेशमा ३१ जना घाइते भए पनि मृत्यु हुने संख्या एक जना रहेको छ। कोशी प्रदेशमा पनि एक जनाको मृत्यु भएको छ भने २२ जना घाइते भएका छन्।

काठमाडौं उपत्यकामा दुई जनाको ज्यान गएको छ भने १७ जना घाइते भएका छन्। सुदूरपश्चिम प्रदेशमा एक जनाको मृत्यु हुँदा ११ जना घाइते भएका छन्।

यस्तै, कर्णाली प्रदेशमा १६ जना, गण्डकी प्रदेशमा ९ जना र बागमती प्रदेशमा ८ जना घाइते भएका छन्।

प्रहरीले सार्वजनिक गरेको विवरणअनुसार मृत्यु हुनेहरू धनकुटा, बारा, ललितपुर, काठमाडौं, पाल्पा र अछाम जिल्लाका एक–एक जना रहेका छन्।

प्रहरीले सवारी दुर्घटनाको मुख्य कारण तीव्र गति, लापरबाहीपूर्वक सवारी चलाउनु, ट्राफिक नियमको उल्लंघन तथा वर्षायामका कारण सडक चिप्लो हुनु रहेको जनाएको छ। दुर्घटना न्यूनीकरणका लागि सवारी चालकलाई गति नियन्त्रणमा राख्न, सवारीको प्राविधिक अवस्था नियमित परीक्षण गर्न र ट्राफिक नियमको पूर्ण पालना गर्न आग्रह गरिएको छ।

नेपालगञ्ज ,साउन १२ । बाँकेको राप्तीसोनारी अस्पतालमा आगामी भदौ १ गतेदेखि विशेषज्ञ स्वास्थ्य सेवा तथा शल्यक्रियामार्फत सुरक्षित प्रसूति सेवा सञ्चालन हुने भएको छ। लुम्बिनी प्रदेश सरकारको स्वास्थ्य मन्त्रालय र निक साइमन्स इन्स्टिच्युट (NSI) बीच ग्रामीण स्वास्थ्य प्रणाली सुदृढीकरण परियोजना (आरएचएसएसपी) कार्यान्वयनसम्बन्धी समझदारी पत्रमा हस्ताक्षर भएपछि अस्पतालमा विशेषज्ञ सेवा विस्तारको प्रक्रिया औपचारिक रूपमा अघि बढेको हो।

समझदारी पत्र हस्ताक्षर कार्यक्रममा राप्तीसोनारी गाउँपालिकाका अध्यक्ष तप्तबहादुर पौडेल, अस्पताल विकास समितिका अध्यक्ष तथा गाउँपालिकाका प्रवक्ता मिनराज खड्का र निक साइमन्स इन्स्टिच्युटका प्रतिनिधिहरूको सहभागिता रहेको थियो। उक्त समझदारीसँगै परियोजना कार्यान्वयनका लागि आवश्यक तयारीलाई तीव्र बनाइएको छ।

परियोजनाअन्तर्गत राप्तीसोनारी अस्पतालमा विशेषज्ञ चिकित्सकीय सेवा विस्तार गरिनुका साथै आमा सुरक्षा कार्यक्रमअन्तर्गत शल्यक्रियामार्फत सुरक्षित प्रसूति सेवा सञ्चालन गरिनेछ। सेवा सुरु भएपछि जटिल प्रसूति भएका गर्भवती महिलाले सामान्य शल्यक्रियाका लागि नेपालगञ्ज वा अन्य अस्पताल धाउनुपर्ने बाध्यता उल्लेखनीय रूपमा घट्ने अपेक्षा गरिएको छ।

अस्पताल प्रशासनका अनुसार विशेषज्ञ जनशक्ति व्यवस्थापन, आवश्यक स्वास्थ्य उपकरण जडान, पूर्वाधार सुदृढीकरण तथा सेवा सञ्चालनका लागि आवश्यक प्राविधिक तयारी अन्तिम चरणमा पुगेको छ। निर्धारित समयमै सेवा सञ्चालन गर्ने लक्ष्यका साथ आवश्यक व्यवस्थापन भइरहेको अस्पतालले जनाएको छ।

परियोजना कार्यान्वयनपछि राप्तीसोनारी गाउँपालिकासहित आसपासका क्षेत्रका नागरिकले आफ्नै नजिकबाट विशेषज्ञ स्वास्थ्य सेवा प्राप्त गर्ने अवसर पाउनेछन्। विशेषगरी मातृ तथा नवजात शिशुको स्वास्थ्य सुरक्षामा सुधार आउने, उपचार सेवामा पहुँच बढ्ने र सुरक्षित मातृत्व कार्यक्रम थप प्रभावकारी बन्ने विश्वास गरिएको छ।

स्थानीय सरकार, प्रदेश सरकार र विकास साझेदारबीचको सहकार्यमा सञ्चालन हुन लागेको यो परियोजनालाई ग्रामीण स्वास्थ्य प्रणाली सुदृढीकरणतर्फको महत्वपूर्ण उपलब्धिका रूपमा हेरिएको छ। यसले ग्रामीण भेगका नागरिकलाई सहज, सुलभ र गुणस्तरीय स्वास्थ्य सेवा उपलब्ध गराउँदै स्थानीय अस्पतालप्रतिको विश्वाससमेत थप बलियो बनाउने अपेक्षा गरिएको छ।

नेपालगन्ज, साउन १२  बाँकेको नेपालगन्जस्थित यातायात व्यवस्था कार्यालयमा करिब ९५ हजार थान स्मार्ट सवारी चालक अनुमतिपत्र (लाइसेन्स) कार्ड आइपुगेको छ । लामो समयदेखि छपाइ भएर पनि कार्ड अभावका कारण सेवाग्राहीलाई वितरण गर्न नसकिएको स्मार्ट कार्ड अब चरणबद्धरूपमा वितरण गरिने भएको हो ।

यातायात व्यवस्था कार्यालय नेपालगन्जले नयाँ, थप, नवीकरण तथा प्रतिलिपिका लागि विगतमा जारी भएका स्मार्ट लाइसेन्समध्ये कार्यालयमा प्राप्त भएका करिब ९५ हजार कार्ड वितरणको तयारी गरिएको जनाएको छ । एकैपटक ठूलो संख्यामा कार्ड वितरण गर्दा कार्यालयमा अत्यधिक भीड हुने र उपलब्ध जनशक्तिबाट सेवा व्यवस्थापन गर्न कठिन हुने भएकाले अंग्रेजी नामको पहिलो अक्षरका आधारमा पालो निर्धारण गरिएको कार्यालयले जनाएको छ ।

कार्यालयले सार्वजनिक गरेको तालिकाअनुसार ए, बी र सी वर्गका सेवाग्राहीले सोमबार, डी, इ, एफ, जी, एच, आइ र जे वर्गले मंगलबार, के, एल, एम र एन समूहले बुधबार, ओ, पी, क्यू, आर समूहले बिहीबार तथा एस, टी, यु, भी, डब्लु, एक्स, आइ र जेट समूहले शुक्रबार स्मार्ट कार्ड प्राप्त गर्न सक्नेछन् । कार्ड वितरणको समय बिहान ९ बजेदेखि दिउँसो ३ः३० बजेसम्म तोकिएको छ ।

कार्यालयका अनुसार लामो समयदेखि कार्ड छपाइमा ढिलाइ, आपूर्ति अभाव तथा प्राविधिक कारणले सेवाग्राहीले महिनौंसम्म स्मार्ट लाइसेन्स पाउन सकेका थिए । पछिल्लो पटक ठूलो परिमाणमा कार्ड प्राप्त भएपछि पुराना निवेदनकर्तालाई प्राथमिकताका आधारमा वितरण प्रक्रिया अघि बढाइएको हो । यसबाट लामो समयदेखि स्मार्ट कार्डको प्रतीक्षामा रहेका हजारौं सेवाग्राही लाभान्वित हुने अपेक्षा गरिएको छ । कार्यालयले स्मार्ट कार्ड लिन आउँदा सम्बन्धित सक्कल रसिद, सवारी चालक अनुमतिपत्र तथा नागरिकता, राहदानी वा राष्ट्रिय परिचयपत्रमध्ये कुनै एक परिचय खुल्ने सक्कल कागजात अनिवार्य रूपमा साथमा ल्याउन आग्रह गरेको छ । यदि पुरानो स्मार्ट कार्ड हराएको अवस्थामा भने ट्राफिक प्रहरीको सिफारिससमेत पेश गर्नुपर्ने जनाइएको छ ।

यातायात व्यवस्था कार्यालयले तोकिएको तालिका अनुसार मात्रै कार्ड वितरण गरिने स्पष्ट पारेको छ । आफ्नो नामको पहिलो अक्षरअनुसार तोकिएको दिनभन्दा फरक समयमा आएमा कार्यालय कार्ड उपलब्ध गराउन बाध्य नहुने सूचनामा उल्लेख गरिएको छ । कार्यालयले सेवाग्राहीलाई अनावश्यक भीड नगर्न, आफ्नो पालोको दिनमै उपस्थित हुन तथा आवश्यक कागजातसहित आउन आग्रह गरेको छ । यस व्यवस्थाबाट सेवा प्रवाहलाई व्यवस्थित, छिटो र प्रभावकारी बनाउने तथा सेवाग्राहीको अनावश्यक प्रतीक्षा र भीडभाड कम गर्ने अपेक्षा गरिएको कार्यालयको भनाइ छ ।