वीरेन्द्रनगर,साउन १२ कर्णाली प्रदेशको नयाँ मुख्यमन्त्रीमा नेपाली कम्युनिस्ट पार्टी (नेकपा) संसदीय दलका नेता मंगलबहादुर शाही नियुक्त भएका छन्। प्रदेश प्रमुख यज्ञराज जोशीले संविधानको धारा १६८ को उपधारा (२) बमोजिम शाहीलाई मंगलबार मुख्यमन्त्रीमा नियुक्त गरेका हुन्।
नेकपा र नेकपा (एमाले) का २४ प्रदेशसभा सदस्यको समर्थनसहित दाबी पेस गरेका शाहीले सरकार गठनका लागि आवश्यक बहुमत जुटाएपछि प्रदेश प्रमुखले उनलाई मुख्यमन्त्री नियुक्त गरेका हुन्। ४० सदस्यीय प्रदेशसभामा सरकार गठनका लागि २१ सांसदको समर्थन आवश्यक पर्छ।
यसअघि मुख्यमन्त्री यामलाल कँडेलले पदबाट राजीनामा दिएपछि प्रदेश प्रमुख जोशीले बहुमत प्राप्त गर्न सक्ने प्रदेशसभा सदस्यलाई सरकार गठनका लागि आह्वान गरेका थिए। सोही आह्वानअनुसार शाहीले नेकपाका १४ र एमालेका १० गरी २४ सांसदको समर्थनसहित मुख्यमन्त्रीमा दाबी पेस गरेका थिए।
शाही कर्णाली प्रदेश सरकारको पाँचौँ मुख्यमन्त्री बनेका छन्। केन्द्रमा नेकपा र एमालेबीच भएको सत्ता सहमतिअनुसार कर्णाली प्रदेश सरकारको नेतृत्व नेकपाले गर्ने सहमति भएको थियो।
मुगु प्रदेशसभा निर्वाचन क्षेत्र नम्बर–२ बाट निर्वाचित शाही यसअघि कर्णाली प्रदेश सरकारमा भौतिक पूर्वाधार तथा सहकारी विकासमन्त्रीको जिम्मेवारी सम्हालिसकेका छन्। उनी तत्कालीन माओवादी केन्द्र र नेपाली कांग्रेसबीचको लोकतान्त्रिक–वाम गठबन्धनका साझा उम्मेदवारका रूपमा निर्वाचित भएका थिए।
मुख्यमन्त्रीमा नियुक्त भएसँगै शाहीले अब मन्त्रिपरिषद् विस्तार र नयाँ सरकार गठनको प्रक्रिया अघि बढाउनेछन्।
लुम्बिनी प्रदेश सरकारमा सत्ता समीकरण फेरिएसँगै नेपाली कांग्रेस औपचारिक रूपमा सरकारबाट बाहिरिएको छ। कांग्रेसले सरकारलाई दिएको समर्थन फिर्ता लिँदै आफ्ना पाँच मन्त्रीको सामूहिक राजीनामा मुख्यमन्त्री चेतनारायण आचार्यसमक्ष बुझाएपछि प्रदेश सरकार नयाँ राजनीतिक समीकरणअनुसार पुनर्गठन हुने निश्चित भएको छ।
कांग्रेस संसदीय दलका तर्फबाट प्रदेशसभा सचेतक धनलक्ष्मी श्रेष्ठले मुख्यमन्त्री आचार्यलाई समर्थन फिर्ताको पत्र र पाँच मन्त्रीको राजीनामा बुझाएकी हुन्। संसदीय दलका नेता डिल्लीबहादुर चौधरी र प्रमुख सचेतक जमुना ढकाल पार्टीको कामका सिलसिलामा काठमाडौंमा रहेकाले उनीहरूको अनुपस्थितिमा सचेतकमार्फत पत्र बुझाइएको बताइएको छ।
राजीनामा बुझाउने मन्त्रीहरूमा आर्थिक मामिला तथा योजनामन्त्री धनेन्द्र कार्की, सहरी विकास तथा खानेपानीमन्त्री सरोज थापा (रोज), सामाजिक विकासमन्त्री जन्मजय तिमिल्सिना, उद्योग, पर्यटन तथा यातायातमन्त्री प्रचण्डबिक्रम न्यौपाने तथा वन तथा वातावरणमन्त्री देवकरणप्रसाद कलवार रहेका छन्। तीमध्ये आर्थिकमन्त्री कार्की र उद्योगमन्त्री न्यौपाने प्रत्यक्ष रूपमा उपस्थित भएर राजीनामा बुझाएका थिए।
कांग्रेस संसदीय दलका नेता चौधरीले केन्द्रमा विकसित नयाँ राजनीतिक समीकरणअनुसार सरकारलाई दिएको समर्थन फिर्ता लिइएको र सबै मन्त्रीको सामूहिक राजीनामा दलमार्फत बुझाइएको जानकारी दिए।
कांग्रेसको समर्थन फिर्तासँगै मुख्यमन्त्री आचार्य नेतृत्वको सरकार अल्पमतमा परेको छ। यद्यपि एमाले र नेकपाबीच प्रदेश सरकारमा सहकार्यको सहमति बनेपछि नेकपाका १३ सांसदको समर्थनमा नयाँ समीकरणको सरकार गठन गर्ने तयारी अघि बढेको छ। ८३ सदस्य कायम रहेको प्रदेशसभामा सरकार गठनका लागि ४२ मत आवश्यक पर्ने भएकाले एमाले–नेकपा गठबन्धनले साना दल वा स्वतन्त्र सांसदको समर्थन पनि जुटाउनुपर्ने अवस्था रहेको छ। लोसपाले समेत एमाले नेतृत्वको सरकारलाई समर्थन गर्ने संकेत गरेको स्रोतले जनाएको छ।
मुख्यमन्त्री आचार्यले कांग्रेसको बहिर्गमनसँगै केन्द्रको पछिल्लो सहमतिअनुसार सरकार पुनर्गठनको प्रक्रिया अघि बढाइएको बताए। उनका अनुसार अब नेकपासँग औपचारिक छलफल गरी एक–दुई दिनभित्र नयाँ मन्त्रिपरिषद् गठन गर्ने तयारी भइरहेको छ।
यसबीच एमालेभित्र मुख्यमन्त्रीको निरन्तरताबारे पनि आन्तरिक छलफल भइरहेको छ। एक पक्षले आचार्यलाई नै निरन्तरता दिनुपर्ने धारणा राखे पनि अर्को पक्षबाट नेतृत्व परिवर्तनको चर्चा चलिरहेको छ। पूर्वमुख्यमन्त्री लिला गिरी तथा पूर्वमन्त्री भूमीश्वर ढकालको नाम पनि सम्भावित मुख्यमन्त्रीका रूपमा चर्चामा आएको छ। केन्द्रको निर्णयपछि लुम्बिनी प्रदेश सरकारको नयाँ नेतृत्व र मन्त्रिपरिषद्को स्वरूप टुंगिने अपेक्षा गरिएको छ।
सुनसरी,साउन १२। सुनसरीको देवानगञ्जमा प्रहरीको गोली लागेर एक युवाको मृत्यु भएको घटनापछि उत्पन्न तनाव मंगलबार पनि कायमै रह्यो। निषेधाज्ञा (कर्फ्यु) जारी रहेकै अवस्थामा स्थानीयले सडकमा उत्रिएर प्रदर्शन गर्दै सरकारको भूमिकाप्रति असन्तुष्टि जनाएका छन्। प्रदर्शनकारीले गृहमन्त्री सुधन गुरुङविरुद्ध नाराबाजी गर्दै घटनाको निष्पक्ष छानबिन र दोषीमाथि कारबाहीको माग गरेका छन्।
प्रदर्शनकारीहरूले घटनापछि प्रभावित क्षेत्रमा शान्ति स्थापना र अवस्था सामान्य बनाउन सरकार प्रभावकारी रूपमा सक्रिय नभएको आरोप लगाएका छन्। उनीहरूले स्थानीय प्रशासनले समयमै आवश्यक पहल नगर्दा तनाव अझ बढेको दाबी गरेका छन्।
देवानगञ्ज गाउँपालिकाका अध्यक्ष वेचन मेहताले पनि गृह मन्त्रालय र जिल्ला प्रशासन कार्यालय सुनसरीले घटनालगत्तै देखाउनुपर्ने सक्रियता नदेखाएको आरोप लगाए। उनका अनुसार सरुवा भएका प्रमुख जिल्ला अधिकारी बासुदेव घिमिरेले घटनापछि प्रभावकारी समन्वय गर्न नसकेको र नयाँ प्रमुख जिल्ला अधिकारी ईश्वरीप्रसाद अर्यालले पनि दुवै पक्षबीच संवाद गराएर समस्या समाधानतर्फ आवश्यक पहल नगरेको बताए।
अध्यक्ष मेहताले मंगलबार बिहान नयाँ प्रमुख जिल्ला अधिकारीसँग टेलिफोनमार्फत छलफल गरी अवस्था सहज बनाउन आग्रह गरेको जानकारी दिँदै त्यसपछि पनि अपेक्षित प्रतिक्रिया नआएको गुनासो गरे।
उनले गाउँपालिकाको पहलमा स्थानीय राजनीतिक दल, जनप्रतिनिधि तथा सरोकारवालासँग छलफल गरी सामाजिक सद्भाव कायम गर्ने र वार्तामार्फत समस्या समाधानको वातावरण बनाउन प्रयास भइरहेको बताए।
गत आइतबार राति दुई युवा समूहबीच भएको विवाद हिंसात्मक बन्दा स्थिति नियन्त्रणमा लिन प्रहरीले चलाएको गोली लागेर देवानगञ्ज गाउँपालिका–४ का २५ वर्षीय ओमप्रकाश मेहताको मृत्यु भएको थियो। घटनामा कम्तीमा २१ जना घाइते भएका छन्। घाइतेमध्ये दुई जनाको अवस्था गम्भीर रहेको जनाइएको छ।
घटनापछि प्रशासनले क्षेत्रमा निषेधाज्ञा जारी गरेको भए पनि मंगलबार दिनभर प्रदर्शनकारीले कर्फ्यु उल्लंघन गर्दै विभिन्न स्थानमा प्रदर्शन गरेका थिए। घटनास्थल र आसपासका क्षेत्रमा सुरक्षाकर्मीको उपस्थिति बाक्लो बनाइए पनि अवस्था पूर्ण रूपमा सामान्य हुन सकेको छैन।
नेपालगञ्ज ,साउन १२ । खाद्य स्वच्छता तथा गुणस्तर मापदण्ड उल्लंघन गरी उपभोक्ताको स्वास्थ्यमा जोखिम पुर्याउने खाद्य पदार्थ उत्पादन तथा बिक्री गर्ने दुई व्यवसायीलाई बाँके जिल्ला अदालतले दोषी ठहर गर्दै कैद र जरिवानाको सजाय सुनाएको छ। अदालतको फैसलासँगै खाद्य मापदण्ड पालना नगर्ने व्यवसायीमाथि कानुनी कारबाही कडा हुने सन्देश गएको छ।
बाँके जिल्ला अदालतले खाद्य प्रविधि तथा गुण नियन्त्रण कार्यालयले दायर गरेका दुई फरक मुद्दामा फैसला सुनाउँदै एक व्यवसायीलाई एक वर्ष कैद र अर्कालाई रु. ५० हजार जरिवाना गरेको हो।
जिल्ला न्यायाधीश राजु ढुङ्गानाको इजलासले कोहलपुर–११ स्थित अस्मिता चाउमिन उद्योगका सञ्चालक पर्शुराम घिमिरेलाई खाद्य स्वच्छता तथा गुणस्तर ऐनअन्तर्गत दोषी ठहर गर्दै एक वर्ष कैद सजाय तोकेको छ।
यस्तै जिल्ला न्यायाधीश इन्दिरा शर्माको इजलासले नेपालगञ्ज–२ स्थित गौरी मिनी मार्टका सञ्चालक रामजी वैश्यलाई रु. ५० हजार जरिवाना गर्ने फैसला गरेको खाद्य प्रविधि तथा गुण नियन्त्रण कार्यालय, नेपालगञ्जका प्रमुख प्रशान्त पोखरेलले जानकारी दिए।
उनका अनुसार गौरी मिनी मार्टबाट बिक्री भइरहेको मास दालको नमूना सङ्कलन गरी प्रयोगशालामा परीक्षण गर्दा दालमा प्रतिबन्धित बाह्य रङ प्रयोग भएको पुष्टि भएको थियो। त्यसपछि कार्यालयले मुद्दा दायर गरेको थियो।
दुवै मुद्दामा अदालतले खाद्य प्रविधि तथा गुण नियन्त्रण कार्यालयले गरेको बजार अनुगमन, नमूना सङ्कलन, प्रयोगशाला परीक्षण तथा अनुसन्धानलाई प्रमाणका रूपमा स्वीकार गर्दै फैसला गरेको हो। फैसलामा खाद्य व्यवसायीले उत्पादन तथा बिक्री गर्ने खाद्य वस्तुको स्वच्छता र गुणस्तर सुनिश्चित गर्नु कानुनी दायित्व भएको उल्लेख गरिएको छ।
यसैबीच खाद्य प्रविधि तथा गुण नियन्त्रण कार्यालयले बर्दियाको गुलरियास्थित आनन्द ड्रिङ्किङ वाटर उद्योगद्वारा उत्पादित प्रशोधित पिउने पानी तथा बाँसगढीस्थित सिजी फुड्स इन्टरप्राइजेज प्रालिले उत्पादन गरेको वाइवाइसहित चार ब्रान्डका तयारी चाउचाउ बजारबाट फिर्ता गर्न सम्बन्धित उद्योगलाई निर्देशन दिएको जनाएको छ।
कार्यालयका अनुसार गत आर्थिक वर्षभरि बाँके, बर्दिया र आसपासका क्षेत्रमा ५४० स्थानमा बजार अनुगमन गरिएको थियो। अनुगमनका क्रममा गुणस्तरहीन तथा कैफियतयुक्त ठहरिएका रु. ६ लाख ३८ हजार ८६४ बराबरका खाद्य तथा दाना पदार्थ नष्ट गरिएको छ।
कार्यालयले उपभोक्ताको स्वास्थ्यसँग प्रत्यक्ष सरोकार रहने खाद्य वस्तुको उत्पादन, भण्डारण र बिक्रीमा कानुनी मापदण्ड कडाइका साथ पालना गर्न व्यवसायीलाई आग्रह गर्दै आगामी दिनमा पनि अनुगमन र कानुनी कारबाहीलाई निरन्तरता दिइने जनाएको छ।
काठमाडौँ — कञ्चनपुरको दोधारा चाँदनी नगरपालिका ४ मालिका टोलस्थित महाकाली नदीको बीचमा फसेका एक व्यक्तिको सशस्त्र प्रहरीले सकुशल उद्धार गरेको छ ।
मंगलबार बिहान करिब ९:१५ बजे दोधारा चाँदनी ४ निवासी ४५ वर्षीय रामबहादुर सिंह पौडी खेल्न महाकाली नदीमा गएका बेला नदीको बहाव एक्कासि बढेपछि झोलुंगे पुलबाट करिब दुई किलोमिटर दक्षिण नदीको बीचमा फसेका थिए । पानीको सतह बढेसँगै उनी किनारमा फर्किन नसकेपछि स्थानीयले तत्काल सशस्त्र प्रहरीलाई खबर गरेका थिए ।
झापा साउन १२ । पूर्वी नेपालको प्रमुख अन्तर्राष्ट्रिय प्रवेशद्वार काँकरभिट्टा नाका हुँदै नेपाल प्रवेश गर्ने विदेशी नागरिकबाट गत आर्थिक वर्ष २०८२/८३ मा भिसा दस्तुरवापत रु दुई करोड ६५ लाख ६८ हजार ५३७ राजस्व सङ्कलन भएको छ। सो अवधिमा नौ हजारभन्दा बढी विदेशी नागरिकले यही नाकाबाट नेपाल प्रवेश गरेसँगै अध्यागमन कार्यालयको राजस्व सङ्कलन उल्लेख्य बनेको हो।
काँकरभिट्टा अध्यागमन कार्यालयका निमित्त कार्यालय प्रमुख इन्द्रकुमार राजवंशीका अनुसार गत आर्थिक वर्षमा उक्त नाका हुँदै नौ हजार ४४७ जना विदेशी नागरिक नेपाल प्रवेश गरेका थिए।
कार्यालयले सो अवधिमा आठ हजार २९७ पर्यटक भिसा जारी गरेको छ। त्यस्तै १६३ नाता भिसा, ४९ गैरआवासीय नेपाली (एनआरएन) भिसा र ३२ वैवाहिक भिसा प्रदान गरिएको कार्यालयले जनाएको छ।
गत आर्थिक वर्षमा काँकरभिट्टा नाका हुँदै ८६ देशका नागरिक नेपाल भित्रिएका थिए। तीमध्ये सबैभन्दा बढी भुटानका चार हजार ९९४ जना अर्थात् कुल आगन्तुकको ५३ प्रतिशत रहेका छन्। त्यसपछि अमेरिकाका दुई हजार १५२ जना नागरिकले यो नाका प्रयोग गरी नेपाल प्रवेश गरेका छन्, जुन कुल आगन्तुकको २३ प्रतिशत हो।
कार्यालयका अनुसार पुस र माघ महिनामा सबैभन्दा धेरै विदेशी नागरिक नेपाल भित्रिने गरेका छन्। विशेषगरी भुटानमा जाडो बिदा पर्ने समय भएकाले त्यहाँका नागरिक झापा तथा आसपासका क्षेत्रमा रहेका आफन्तसँग भेटघाट गर्न नेपाल आउने गरेका छन्। साथै पूर्वको पशुपतिनाथका रूपमा परिचित हलेसी महादेवको दर्शनका लागि पनि यही अवधिमा भुटानी नागरिकको आगमन उल्लेख्य रहने गरेको कार्यालयको भनाइ छ।
काँकरभिट्टा नाका भारतसँग जोडिएको पूर्वी नेपालको प्रमुख स्थल नाका भएकाले पर्यटन, पारिवारिक भेटघाट तथा धार्मिक यात्राका लागि आउने विदेशी नागरिकको आवागमनमा यसको महत्वपूर्ण भूमिका रहेको छ।
काठमाडौं ,साउन १२ । देशभर पछिल्लो २४ घण्टामा भएका सवारी दुर्घटनाले ६ जनाको ज्यान लिएको छ भने १४३ जना घाइते भएका छन्। दुर्घटनाबाट सबैभन्दा धेरै प्रभावित लुम्बिनी प्रदेश बनेको छ, जहाँ एक जनाको मृत्यु हुनुका साथै २८ जना घाइते भएका छन्।
नेपाल प्रहरीका अनुसार पछिल्लो २४ घण्टामा भएका दुर्घटनामध्ये घाइतेको संख्या लुम्बिनीमा सबैभन्दा बढी रहेको हो। मधेश प्रदेशमा ३१ जना घाइते भए पनि मृत्यु हुने संख्या एक जना रहेको छ। कोशी प्रदेशमा पनि एक जनाको मृत्यु भएको छ भने २२ जना घाइते भएका छन्।
काठमाडौं उपत्यकामा दुई जनाको ज्यान गएको छ भने १७ जना घाइते भएका छन्। सुदूरपश्चिम प्रदेशमा एक जनाको मृत्यु हुँदा ११ जना घाइते भएका छन्।
यस्तै, कर्णाली प्रदेशमा १६ जना, गण्डकी प्रदेशमा ९ जना र बागमती प्रदेशमा ८ जना घाइते भएका छन्।
प्रहरीले सार्वजनिक गरेको विवरणअनुसार मृत्यु हुनेहरू धनकुटा, बारा, ललितपुर, काठमाडौं, पाल्पा र अछाम जिल्लाका एक–एक जना रहेका छन्।
प्रहरीले सवारी दुर्घटनाको मुख्य कारण तीव्र गति, लापरबाहीपूर्वक सवारी चलाउनु, ट्राफिक नियमको उल्लंघन तथा वर्षायामका कारण सडक चिप्लो हुनु रहेको जनाएको छ। दुर्घटना न्यूनीकरणका लागि सवारी चालकलाई गति नियन्त्रणमा राख्न, सवारीको प्राविधिक अवस्था नियमित परीक्षण गर्न र ट्राफिक नियमको पूर्ण पालना गर्न आग्रह गरिएको छ।
