चौमाला (कैलाली), भदौ ४ गते । कैलालीमा विद्यालयका कर्मचारीको पारिश्रमिक वृद्धि गराइदिने प्रलोभन देखाएर दुई लाख रुपैयाँ घुस लिएको आरोपमा विद्यालय व्यवस्थापन समितिका एक सदस्य पक्राउ परेका छन्।
पक्राउ पर्नेमा गौरीगंगा नगरपालिका–४ स्थित कालिका माध्यमिक विद्यालय व्यवस्थापन समितिका सदस्य देवबहादुर बम रहेका छन्। उहाँलाई अख्तियार दुरुपयोग अनुसन्धान आयोगको कार्यालय महेन्द्रनगरबाट खटिएको टोलीले बिहीबार धनगढी उपमहानगरपालिका–१ स्थित एक डेरी पसलबाट घुस रकमसहित रंगेहात नियन्त्रणमा लिएको हो।
अख्तियार कार्यालय महेन्द्रनगरका सूचना अधिकारी चेतराज भट्टका अनुसार बमले विद्यालयमा कार्यरत कर्मचारीको पारिश्रमिक वृद्धि गराइदिने भन्दै सेवाग्राहीसँग दुई लाख रुपैयाँ मागेका थिए। सोही रकम लिन डेरी पसल पुगेका बेला अख्तियारको टोलीले उहाँलाई नियन्त्रणमा लिएको हो।
अख्तियारले बमको साथबाट दुई लाख रुपैयाँ बरामद गरेको जनाएको छ। उहाँलाई नियन्त्रणमा लिएर घटनाबारे थप सोधपुछ तथा अनुसन्धान भइरहेको सूचना अधिकारी भट्टले बताउनुभयो।
अख्तियारले घटनामा संलग्न अन्य व्यक्ति वा पक्षको भूमिका रहे–नरहेको विषयमा समेत अनुसन्धान गरिरहेको जनाएको छ।
सिमरा,भदौ–४ गते। तीन वर्षीया बालिका गरिमा चौधरीको बलात्कारपछि हत्या भएको घटनामा प्रहरीको अनुसन्धानप्रति असन्तुष्ट पीडित परिवार र स्थानीयवासीको आक्रोश चुलिएको छ। घटनामा प्रहरीको लापरबाही भएको आरोप लगाउँदै उनीहरूले इलाका प्रहरी कार्यालय सिमरा घेराउ गरेका छन्।
पीडित परिवार र स्थानीयवासीले इलाका प्रहरी कार्यालय सिमराका प्रमुख प्रहरी नायब उपरीक्षक दिलीप क्षेत्रीलाई कारबाही गर्नुपर्ने तथा बालिकाको हत्यामा संलग्नलाई हदैसम्मको कारबाही, फाँसी दिनुपर्ने माग गर्दै बिहीबार कार्यालयअगाडि प्रदर्शन गरेका हुन्। प्रदर्शनका कारण सिमरा क्षेत्रमा तनावको अवस्था सिर्जना भएको छ।
तनाव कम गर्न पीडित परिवार र स्थानीयवासीसँग वार्ताको प्रयास भइरहेको जिल्ला प्रशासन कार्यालय बाराका सहायक प्रमुख जिल्ला अधिकारी छविरमण भट्टराईले जानकारी दिए।
प्रहरीले बालिका गरिमामाथि बलात्कारपछि हत्या भएको निष्कर्ष निकालेको छ। घटनामा संलग्न रहेको आरोपमा प्रहरीले जीतपुरसिमरा उपमहानगरपालिका–२ का १६ वर्षीय सुमन थापा र २४ वर्षीय प्रोग्रेस चौधरीलाई पक्राउ गरेको छ।
घटनाको विरोधमा स्थानीयवासीले दुई दिनदेखि जीतपुरसिमरा क्षेत्रका मुख्य तथा ग्रामीण सडक अवरुद्ध गर्दै प्रदर्शन गरिरहेका छन्। वीरगन्ज–पथलैया औद्योगिक मार्गअन्तर्गत सिमरा, सिमरा–डुमरवाना तथा पिलुवा–वडहर्वा सडकखण्डमा यातायात पूर्ण रूपमा ठप्प पारिएको छ। बुधबार दिउँसोदेखि अवरुद्ध वीरगन्ज–पथलैया सडकमा बिहीबार पनि यातायात सञ्चालन हुन सकेको छैन।
पीडित परिवारका सदस्यहरूले प्रहरीले समयमै खोजी नगरेका कारण गरिमालाई बचाउन नसकिएको आरोप लगाएका छन्। मृतकका बुवा मनोज चौधरीले छोरी हराएपछि नै इलाका प्रहरी कार्यालय सिमरामा जानकारी गराए पनि प्रहरीले खोजीमा गम्भीरता नदेखाएको दाबी गरे।
उनका अनुसार समयमै खोजी तलास गरिएको भए छोरीको ज्यान जोगिन सक्ने अवस्था थियो। उनले घटनामा प्रहरीको भूमिकाको छानबिन गरी दोषी देखिए कारबाही गर्नुपर्ने माग गरेका छन्।
‘यो तीन वर्षीया बालिकामाथि भएको क्रूर व्यवहारले निम्त्याएको विद्रोह हो। हामी न्यायको खोजीमा छौँ,’ पीडित परिवारका एक सदस्यले भने, ‘दोषीलाई हदैसम्मको कारबाही होस्, जसले गर्दा यस्ता घटना फेरि नदोहोरिऊन्।’
बिहीबार बिहानैदेखि प्रदर्शनकारीले उपमहानगरपालिकाभित्रका राजमार्ग तथा ग्रामीण सडकमा टायर बालेर प्रदर्शन गरेका छन्। सडक अवरोधका कारण यात्रु तथा सवारीसाधन प्रभावित भएका छन्।
घटनाको विरोधमा जीतपुरसिमरा उपमहानगरपालिका क्षेत्रका निजी तथा सामुदायिक विद्यालयसमेत बन्द गरिएका छन्। विद्यालयहरूले बिहीबार शोकसभा आयोजना गर्दै तीन वर्षीया बालिकामाथि भएको क्रूर घटनाप्रति दुःख व्यक्त गरेका छन्।
निजी तथा सामुदायिक विद्यालयहरूले विज्ञप्ति जारी गर्दै घटनाका दोषीलाई हदैसम्मको कानुनी कारबाही गर्न माग गरेका छन्। बालिकामाथि भएको घटनाले सम्पूर्ण शैक्षिक क्षेत्र स्तब्ध भएको उनीहरूको भनाइ छ।
घटनापछि स्थानीयस्तरमा प्रहरी अनुसन्धान र सुरक्षा व्यवस्थामाथि समेत प्रश्न उठेको छ। पीडित परिवारले निष्पक्ष अनुसन्धान, प्रहरीको भूमिकाको छानबिन र दोषीमाथि कडा कारबाही नभएसम्म आन्दोलन जारी राख्ने संकेत गरेका छन्।
प्रशासनले भने प्रदर्शनका क्रममा उत्पन्न तनावलाई नियन्त्रणमा लिँदै पीडित परिवार र स्थानीयवासीका मागबारे संवादमार्फत समाधान खोज्ने प्रयास गरिरहेको जनाएको छ।
नेपालगन्ज,भदौ–४ गते। पशु सेवा तालिम केन्द्र नेपालगन्ज, बाँकेले पशु स्वास्थ्य तथा पशु सेवा क्षेत्रमा जनशक्तिको क्षमता अभिवृद्धिलाई प्राथमिकतामा राख्दै आर्थिक वर्ष २०८३/०८४ का लागि २ करोड ५२ लाख रुपैयाँको वार्षिक कार्यक्रम सार्वजनिक गरेको छ ।
केन्द्रले सार्वजनिक गरेको कार्यक्रमअनुसार तालिम, पुनर्ताजगी तालिम तथा क्षमता विकासका गतिविधिका लागि ९६ लाख ५० हजार रुपैयाँ बजेट विनियोजन गरिएको छ । पुँजीगततर्फ १४ लाख रुपैयाँ छुट्याइएको केन्द्रले जनाएको छ ।
वार्षिक कार्यक्रम सार्वजनिक कार्यक्रममा क्वारेन्टाइन कार्यालयका प्रमुख हरेराम यादव प्रमुख अतिथि रहेका थिए । कार्यक्रममा भेटेरिनरी अस्पताल तथा पशु सेवा विज्ञ केन्द्रकी कार्यालय प्रमुख डा. सपना लक्ष्मी घिमिरेको समेत उपस्थिति थियो ।
कार्यक्रमको उद्देश्यबारे वरिष्ठ मत्स्य विकास अधिकृत रामकेश यादवले प्रकाश पारेका थिए । कार्यालय प्रमुख तथा मत्स्य विकास निर्देशक श्रवणकुमार चौधरीले आर्थिक वर्ष २०८३/०८४ का लागि तय गरिएका कार्यक्रम, बजेट तथा कार्ययोजनाबारे प्रस्तुतिकरण गरेका थिए ।
केन्द्रका अनुसार चालु आर्थिक वर्षमा पशु सेवा तथा मत्स्य विकास क्षेत्रमा कार्यरत जनशक्तिको ज्ञान, सीप र दक्षता अभिवृद्धि गर्ने उद्देश्यले विभिन्न तालिम तथा पुनर्ताजगी तालिम सञ्चालन गरिनेछ । सेवा प्रवाहलाई थप प्रभावकारी बनाउन प्राविधिक जनशक्तिको क्षमता विकासमा केन्द्रित कार्यक्रम सञ्चालन गरिने जनाइएको छ ।
वार्षिक कार्यक्रम सार्वजनिक गर्ने क्रममा पशु सेवा तथा मत्स्य विकास क्षेत्रसँग सम्बन्धित जनशक्तिको क्षमता अभिवृद्धि, सीप विकास र सेवाको गुणस्तर सुधारका विषयमा समेत छलफल भएको थियो । सहभागीहरूले तालिमलाई आवश्यकतामा आधारित र व्यवहारिक बनाउनुपर्नेमा जोड दिएका थिए ।
केन्द्रले गत आर्थिक वर्षमा ८२.२५ प्रतिशत वित्तीय तथा कार्यक्रमगत प्रगति हासिल गरेको जनाएको छ । गत वर्षको उपलब्धि र अनुभवका आधारमा चालु आर्थिक वर्षका कार्यक्रमलाई थप प्रभावकारी, व्यवस्थित र परिणाममुखी बनाउने लक्ष्य लिइएको कार्यालयले जनाएको छ ।
केन्द्रका अनुसार विनियोजित बजेटलाई प्राथमिकताका आधारमा परिचालन गर्दै पशु स्वास्थ्य, पशु सेवा तथा मत्स्य विकाससँग सम्बन्धित प्राविधिक जनशक्तिको दक्षता बढाउने र सेवाग्राहीले पाउने सेवाको गुणस्तर सुधार गर्ने लक्ष्य राखिएको छ ।
कार्यक्रममा पशु सेवा तथा मत्स्य विकास क्षेत्रका कर्मचारी, प्राविधिक तथा सञ्चारकर्मीको सहभागिता रहेको थियो । कार्यक्रम सञ्चालन वरिष्ठ प्राविधिक अधिकृत कर्मध्वज छत्यालले गरेका थिए ।
