कञ्चनपुर,भदौ–०८ गते । कञ्चनपुरको बेदकोट नगरपालिका–६ सिसैयामा मोटरसाइकल दुर्घटनामा परी पछाडि सवार एक जनाको मृत्यु भएको छ भने पैदलयात्री घाइते भएका छन्।
पूर्व–पश्चिम राजमार्गमा सोमबार बिहान मोटरसाइकलले पैदलयात्रीलाई ठक्कर दिँदा दुर्घटना भएको हो। दुर्घटनामा मोटरसाइकलको पछाडि सवार बेदकोट नगरपालिका–९ का अन्दाजी ६० वर्षीय गौरसिंह महराको उपचारका क्रममा मृत्यु भएको प्रहरीले जनाएको छ।
प्रहरीका अनुसार बिहान करिब ८ः१५ बजे पूर्वबाट पश्चिमतर्फ जाँदै गरेको से ३ प ५२७४ नम्बरको मोटरसाइकलले डडेल्धुराको अजयमेरु गाउँपालिका–५ का २१ वर्षीय यज्ञ ठगुन्नालाई ठक्कर दिएको थियो। ठक्करबाट ठगुन्नाको टाउकोमा सामान्य चोट लागेको छ। उनको स्थानीय मेडिकलमा उपचार भइरहेको छ।
दुर्घटनामा मोटरसाइकलको पछाडि सवार महरा भने गम्भीर घाइते भएका थिए। उनलाई तत्काल उपचारका लागि महाकाली प्रादेशिक अस्पताल, महेन्द्रनगर लगिएको थियो। त्यहाँ सामान्य उपचारपछि थप उपचारका लागि नगढीस्थित टेक केयर अस्पताल प्रालि पठाइएको थियो।
तर, उपचारकै क्रममा बिहान करिब १०ः४० बजे महराको मृत्यु भएको प्रहरीले जनाएको छ।
दुर्घटनाबारे प्रहरीले थप अनुसन्धान गरिरहेको छ।
