२०८३ मंसिर ७ आईतवार
२०८३ मंसिर ७ आईतवार

दाङ।  अवैध लागुऔषध ब्राउन सुगर कारोबारमा संलग्न रहेको आरोपमा प्रहरीले दाङबाट तीन जनालाई पक्राउ गरेको छ। शुक्रबार राति गोप्य सूचनाका आधारमा खटिएको प्रहरी टोलीले उनीहरूलाई जिल्लाका विभिन्न स्थानबाट पक्राउ गरेको हो।

पक्राउ पर्नेमा घोराहीका ३३ वर्षीय सुनिल थापा, २४ वर्षीय प्रजल श्रेष्ठ र बबईका २५ वर्षीय विनोद सुनार रहेका छन्।

जिल्ला प्रहरी कार्यालय दाङका प्रहरी निरीक्षक श्रीकुमार पौडेलका अनुसार उनीहरूको साथबाट ३१ ग्राम १८० मिलिग्राम ब्राउन सुगर र ५२ हजार २५० रुपैयाँ नगद बरामद भएको छ।

प्रहरीले सुनिलको साथबाट १९ ग्राम २१० मिलिग्राम ब्राउन सुगर र ४८ हजार रुपैयाँ, प्रजलको साथबाट दुई ग्राम २६० मिलिग्राम ब्राउन सुगर र तीन हजार २५० रुपैयाँ तथा विनोदको साथबाट नौ ग्राम ७१० मिलिग्राम ब्राउन सुगर बरामद गरेको पौडेलले जानकारी दिए।

तीनै जनालाई नियन्त्रणमा लिएर घटनाबारे थप अनुसन्धान भइरहेको प्रहरीले जनाएको छ।


दैलेख। दैलेखको चामुण्डाबिन्द्रासैनी नगरपालिका–३ पानीखोलामा एकै परिवारका तीन जनाको हत्या भएको छ। घरायसी विवादमा ३८ वर्षीय अम्बर सलामी मगरले बन्चरो प्रहार गरी श्रीमती र दुई छोराछोरीको हत्या गरेका हुन्। घटनामा अर्का एक छोरा गम्भीर घाइते भएका छन्।

जिल्ला प्रहरी कार्यालय दैलेखका सूचना अधिकारी पुष्पराज रोकायका अनुसार अम्बरले शनिबार बिहान १०ः३५ बजे दाउरा काट्ने बन्चरोले ३५ वर्षीया श्रीमती मनिसा र तीन छोराछोरीको टाउकोमा प्रहार गरेका थिए।

बन्चरो प्रहारबाट गम्भीर घाइते भएका मनिसा, १२ वर्षीय छोरा तपेन्द्र, ६ वर्षीय छोरा मिलन र तीन वर्षीया छोरी करिस्मालाई उपचारका लागि एम्बुलेन्समार्फत दुल्लुस्थित नगर अस्पताल पुर्‍याइएको थियो।

अस्पतालमा चिकित्सकले परीक्षण गर्दा बिहान ११ः१० बजे तपेन्द्र र करिस्मालाई मृत घोषणा गरेका थिए। थप उपचारका लागि सुर्खेतस्थित प्रदेश अस्पताल कालागाउँ पठाइएकी मनिसालाई दिउँसो २ः३० बजे चिकित्सकले मृत घोषणा गरेका थिए। गम्भीर घाइते मिलनको उपचार भइरहेको प्रहरीले जनाएको छ।

घटनास्थल प्रहरी चौकी हाँडाकोटबाट करिब तीन किलोमिटर टाढा पर्छ। घटनाको जानकारी पाएलगत्तै इलाका प्रहरी कार्यालय दुल्लुबाट प्रहरी निरीक्षक सरोज कँडेलको नेतृत्वमा पाँच सदस्यीय टोली घटनास्थल पुगेको थियो।

घटनामा संलग्न अम्बरलाई प्रहरीले नियन्त्रणमा लिएको छ। घटनाबारे थप अनुसन्धान भइरहेको सूचना अधिकारी रोकायले जानकारी दिए।

 


नेपालगन्ज। तीन सयभन्दा बढी धावक सहभागी तेस्रो राप्तीसोनारी नेचर रनमा स्वस्तिका शाही र टेकेन्द्र डाँगीले उपाधि जितेका छन्। बाँकेको राप्तीसोनारी गाउँपालिका–२ मदुवामा शनिबार सम्पन्न १० किलोमिटर खुला दौडमा स्वस्तिका महिला र टेकेन्द्र पुरुषतर्फ विजेता बनेका हुन्।

महिलातर्फ रीता कुसारी दोस्रो र नन्दिता थारु तेस्रो भए। पुरुषतर्फ निराजन चौधरी दोस्रो र प्रशान्त तामाङ तेस्रो स्थानमा रहे।

पालिकास्तरीय विद्यालय छात्रतर्फ भविन्द्र बोहरा प्रथम, समिर थारु दोस्रो र विशाल यादव तेस्रो भए। छात्रातर्फ तीन किलोमिटर दौडमा रेणुका चौधरी प्रथम, अनुजा थारु दोस्रो र निस्मा थारु तेस्रो भए।

प्रतियोगिताका सबै विधाका शीर्ष तीन खेलाडीलाई क्रमशः तीन हजार, दुई हजार र एक हजार रुपैयाँ नगदसहित पदक प्रदान गरिएको थियो।

जर्मनीमा बसोबास गर्दै आएका मदुवानिवासी पूर्वराष्ट्रिय खेलाडी तीर्थ ओलीको पहलमा धारा नेपालगन्ज म्याराथनको भगिनी दौडका रूपमा राप्तीसोनारी नेचर रन आयोजना हुँदै आएको छ। प्रतियोगिताका शीर्ष १० धावकले आगामी मंसिर १२ गते हुने धारा नेपालगन्ज म्याराथनको १२औँ संस्करणमा स्वतः सहभागिता जनाउन पाउने रेस डाइरेक्टर चन्द्र गुरुङले जानकारी दिए।

यसैबीच, आयोजित एक किलोमिटर वाकाथनमा राप्तीसोनारी गाउँपालिका अध्यक्ष तप्त पौडेल, उपाध्यक्ष मनिषा थारु, लुम्बिनी प्रदेशसभाका पूर्वसदस्य कृष्णा केसी नमुनालगायत करिब सय जनाले सहभागिता जनाएका थिए।

दौडको उद्घाटन गर्दै गाउँपालिका अध्यक्ष पौडेलले तेस्रो संस्करणदेखि गाउँपालिका र वडा नम्बर २ ले प्रतियोगिताको अपनत्व लिएको बताए। उनले प्रतियोगितालाई निरन्तरता दिन आवश्यक आधार तयार भएको उल्लेख गरे।

विजयी खेलाडीलाई पूर्वप्रदेशसभा सदस्य कृष्णा केसी, वडाध्यक्ष ज्ञानेन्द्र ओली र धारा नेपालगन्ज म्याराथनका संस्थापक टीएस ठकुरीलगायतले पुरस्कार वितरण गरेका थिए।


दैलेख। दैलेखमा एक व्यक्तिले आफ्नै श्रीमती र तीन सन्तानमाथि बन्चरो प्रहार गर्दा चारै जना गम्भीर घाइते भएका छन्। चामुण्डाबिन्द्रासैनी नगरपालिका–३ पानिखोलाका ३८ वर्षीय अम्बर सलामी मगरले बुधबार बिहान घरायसी विवादका क्रममा उनीहरूमाथि बन्चरो प्रहार गरेका हुन्।

जिल्ला प्रहरी कार्यालय दैलेखका अनुसार अम्बरले ३५ वर्षीया श्रीमती मनिषा सलामी मगर, १२ वर्षीय छोरा तपेन्द्र, ६ वर्षीय छोरा मिलन र ३ वर्षीया छोरी करिस्माको टाउकोमा दाउरा काट्ने बन्चरो प्रहार गरेका थिए।

बन्चरो प्रहारबाट घाइते चारै जनाको अवस्था गम्भीर रहेको प्रहरीले जनाएको छ। उनीहरूलाई एम्बुलेन्समार्फत उपचारका लागि दुल्लु अस्पताल पुर्‍याइएको छ।

घटनापछि प्रहरीले अम्बरलाई नियन्त्रणमा लिएको छ। घटनाको जानकारी पाएपछि इलाका प्रहरी कार्यालय दुल्लुबाट प्रहरी निरीक्षक सरोज कँडेलको कमान्डमा पाँच जनाको टोली घटनास्थल पुगेको थियो।

घटनाबारे थप अनुसन्धान भइरहेको जिल्ला प्रहरी कार्यालय दैलेखले जनाएको छ।

 
 
 

बर्दिया। जलवायु परिवर्तन र मानवीय गतिविधिका कारण नदीमा माछाको प्राकृतिक बासस्थान संकटमा पर्दै गएपछि बबई नदीमा १० हजार माछाका भुरा छोडिएको छ। विश्व मत्स्य दिवसको अवसर पारेर एकीकृत कृषि तथा पशुपन्छी विकास कार्यालयले शनिबार गुलरिया नगरपालिका–४ स्थित जब्दीघाटमा माछाका भुरा छोडेको हो।

‘जलवायु परिवर्तनप्रति हाम्रो जिम्मेवारी, मत्स्य सम्पदाको संरक्षणमा गरौँ साझेदारी’ भन्ने नारासहित नदीमा माछाका भुरा छोडेर दिवस मनाइएको हो।

एकीकृत कृषि तथा पशुपन्छी विकास कार्यालयकी प्रमुख कमला अधिकारीले जलवायु परिवर्तनको असर नदी, नाला, सिमसार क्षेत्र र जलचर प्राणीमा देखिन थालेको बताइन्। उनका अनुसार अनियमित वर्षा, नदीको बहावमा परिवर्तन, बाढी र खडेरीले माछाको प्राकृतिक बासस्थान तथा प्रजनन प्रक्रियामा प्रतिकूल असर पारिरहेको छ।

यसले प्राकृतिक मत्स्य उत्पादनसँगै जलचर जैविक विविधता र माछामा आश्रित समुदायको जीविकोपार्जनमा समेत चुनौती थपेको उनले बताइन्।

अव्यवस्थित माछा मार्ने प्रवृत्ति, विषादी तथा विद्युतीय करेन्टको प्रयोग, नदी तथा जलाशयमा फोहोर र प्रदूषण विसर्जन तथा जथाभावी उत्खननले माछाको प्राकृतिक बासस्थान विनाश भइरहेको अधिकारीको भनाइ छ।

जलचर सम्पदाको संरक्षण सबैको साझा दायित्व भएकाले नदी तथा जलाशयको संरक्षणमा सामूहिक पहल आवश्यक रहेको उनले बताइन्।


कोहलपुर, मंसिर ५।  लुम्बिनी प्रदेशका १० जिल्ला कुष्ठरोगको जोखिममा रहेको तथ्य सार्वजनिक भएको छ । मधेस प्रदेशपछि लुम्बिनी कुष्ठरोगको उच्च जोखिममा रहेको दोस्रो प्रदेश बनेको छ । अझ चिन्ताजनक पक्ष, प्रदेशमा बालबालिकासमेत कुष्ठरोगबाट सङ्क्रमित भइरहेका छन् ।

नेपालमा कुष्ठरोग देखिएका १८ जिल्लामध्ये १० जिल्ला बाँकेको जानकी गाउँपालिका–मानपुरस्थित साइनिङ अस्पतालको सेवाक्षेत्रभित्र पर्छन् । यसले पश्चिम नेपालमा कुष्ठरोग नियन्त्रण र उपचार सेवालाई थप प्रभावकारी बनाउनुपर्ने आवश्यकता देखाएको छ । आइएनएफ नेपालका मेडिकल सर्भिसेज निर्देशक डा. अरुणकुमार बुढाका अनुसार रूपन्देही, कपिलवस्तु र पश्चिम नवलपरासीसहित लुम्बिनी प्रदेशका विभिन्न जिल्ला कुष्ठरोगको जोखिममा छन् । प्रदेशमा बालबालिकामा समेत सङ्क्रमण देखिनु रोग नियन्त्रणको प्रयासमा चुनौतीका रूपमा देखिएको उनले बताए ।

नेपाल सरकारको प्रतिवेदनअनुसार आर्थिक वर्ष २०८०/८१ र २०८१/८२ मा देशभर करिब दुई हजार पाँच सय नयाँ कुष्ठरोगी पहिचान भएका छन् । तीमध्ये करिब २५ प्रतिशत लुम्बिनी प्रदेशका रहेको आइएनएफ नेपाल, साइनिङ अस्पताल बाँकेले जनाएको छ । कुष्ठरोगको सङ्क्रमण पहिचानमा ढिलाइ हुनुमा गरिबी, स्वास्थ्य सेवामा पहुँचको अभाव, सामाजिक भेदभाव र लाञ्छना प्रमुख कारण रहेको डा. बुढाको भनाइ छ । समयमै रोग पहिचान हुन नसक्दा उपचारमा ढिलाइ हुने र बिरामीमा अपाङ्गताको जोखिम बढ्ने समस्या रहेको उनले बताए ।

पश्चिम नेपालमा कुष्ठरोगको जोखिम बढ्दै गएको अवस्थामा बाँकेको साइनिङ अस्पताललाई क्षेत्रीय उपचार केन्द्रका रूपमा विकास गर्ने योजना अघि बढाइएको छ । लुम्बिनी प्रदेशसहित कर्णाली र सुदूरपश्चिमका बिरामीलाई लक्षित गरी अस्पतालको सेवा विस्तार गर्न लागिएको हो । हाल क्षेत्रीय प्रेषण केन्द्रका रूपमा सञ्चालन भइरहेको अस्पताललाई कुष्ठरोग तथा उष्ण उपेक्षित रोगसम्बन्धी उपचारको प्रमुख केन्द्र बनाउने लक्ष्य राखिएको डा. बुढाले जानकारी दिए ।

अस्पतालको अन्तरङ्ग सेवा विस्तारका लागि करिब दुई करोड ३५ लाख रुपैयाँ लागतमा भवन निर्माण भइरहेको छ । पाँचवटा वार्ड रहने भवनमा एकैपटक २५ जना बिरामी राख्न सकिनेछ । भवनमा ह्विलचेयरमैत्री शौचालय, नर्सिङ स्टेसन, उपचार कक्ष र औषधि भण्डारण कक्षलगायत सुविधा रहनेछन् । हालसम्म आइएनएफका पोखरास्थित हरियोखर्क अस्पताल, सुर्खेतस्थित साइनिङ अस्पताल र बाँकेको साइनिङ अस्पतालबाट छ हजार ७९ जनाले निःशुल्क उपचार सेवा लिइसकेका छन् ।

तर, अस्पतालको सेवा विस्तारसँगै दक्ष जनशक्ति व्यवस्थापन मुख्य चुनौतीका रूपमा रहेको छ । छाला रोग विशेषज्ञ, थेरापिस्ट, कृत्रिम अङ्ग तथा जुत्ता प्रविधिसम्बन्धी जनशक्ति र अन्य दक्ष कर्मचारीको आवश्यकता रहेको डा. बुढाले बताए । कुष्ठरोगका कारण हुने अपाङ्गताको पुनःस्थापना तथा नसर्ने रोगबाट उत्पन्न अपाङ्गताको व्यवस्थापन पनि चुनौतीपूर्ण रहेको उनले उल्लेख गरे ।

अस्पतालको सेवा विस्तार र निरन्तर सञ्चालनका लागि लुम्बिनी प्रदेश सरकारको सहकार्य आवश्यक रहेको उनको भनाइ छ । आइएनएफका अन्तर्राष्ट्रिय कार्यकारी प्रमुख रिचर्ड रिभले नेपालमा कुष्ठरोग नियन्त्रणका लागि ठूलो धनराशि खर्च भइरहेको र त्यसबाट आशातीत उपलब्धि हासिल भएको बताए । उनले नियन्त्रणका प्रयासलाई थप प्रभावकारी बनाउनुपर्नेमा जोड दिए । लुम्बिनी प्रदेशका स्वास्थ्यमन्त्री दिपेन्द्रकुमार पुनले प्रदेश सरकार अस्पतालसँग सहकार्य गर्न तयार रहेको बताए । नेपाल सरकारले सन् २०३० सम्म कुष्ठरोगलाई शून्यमा झार्ने लक्ष्यसहित रणनीति अघि सारेको छ ।

कुष्ठरोग उपचारबाट निको हुने रोग भए पनि समयमै पहिचान र उपचार नहुँदा अपाङ्गता तथा सामाजिक बहिष्करणको समस्या निम्तिन सक्छ । त्यसैले जोखिममा रहेका जिल्लामा परीक्षण, जनचेतना, सहज उपचार पहुँच र सामाजिक लाञ्छना अन्त्य गर्ने अभियानलाई प्रभावकारी बनाउनु चुनौतीपूर्ण देखिएको छ ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।