नेपालगञ्ज । बाँके कला केन्द्र नेपालगञ्जले “प्रथम मेयर सांस्कृतिक कप” आयोजना गर्ने भएको छ । नेपालगञ्ज उपमहानगरपालिकाको आर्थिक सहयोगमा अन्तर माध्यमिक विद्यालय स्तरीय सामूहिक लोक नृत्य प्रतियोगिताका रूपमा कार्यक्रम आयोजना गर्न लागिएको हो । आयोजकले आज नेपालगञ्जमा पत्रकार सम्मेलन गर्दै प्रतियोगिताबारे विस्तृत जानकारी सार्वजनिक गरेको छ ।
आगामी जेठ १५ गते गणतन्त्र दिवसको अवसर पारेर प्रतियोगिता आयोजना गरिने बाँके कला केन्द्रका उपाध्यक्ष तथा कार्यक्रम संयोजक विरेन्द्र यादवले जानकारी दिए । उनका अनुसार प्रतियोगितामार्फत विद्यालय तहका विद्यार्थीहरूमा लुकेको कला, प्रतिभा र सांस्कृतिक पहिचानलाई उजागर गर्ने लक्ष्य राखिएको छ ।
प्रतियोगितामा नेपालगञ्ज उपमहानगरपालिका क्षेत्रभित्रका सामुदायिक तथा संस्थागत माध्यमिक विद्यालयका कक्षा ६ देखि १२ सम्म अध्ययनरत विद्यार्थीहरूले सहभागिता जनाउन पाउनेछन् । विभिन्न जातजातिको मौलिक संस्कृति झल्किने गरी सामूहिक लोक नृत्य प्रस्तुत गर्नुपर्ने व्यवस्था गरिएको आयोजकले जनाएको छ ।
हरेक सहभागी समूहमा न्यूनतम ६ जना र अधिकतम १२ जना विद्यार्थी कलाकार सहभागी हुन सक्नेछन् । प्रतियोगितामा नृत्य प्रस्तुति, सांस्कृतिक मौलिकता, समन्वय, पोशाक तथा प्रस्तुति शैलीलाई मूल्यांकनको आधार बनाइने जनाइएको छ ।
प्रतियोगितामा सहभागी हुन सामुदायिक विद्यालयका लागि २ हजार ५ सय रुपैयाँ र संस्थागत विद्यालयका लागि ३ हजार ५ सय रुपैयाँ दर्ता शुल्क तोकिएको छ । आयोजकका अनुसार दर्ता शुल्कबाट कार्यक्रम व्यवस्थापनमा केही सहयोग पुग्ने अपेक्षा गरिएको छ ।
पुरस्कारतर्फ प्रथम हुने समूहले ५१ हजार रुपैयाँ नगदसहित ट्रफी र प्रमाणपत्र प्राप्त गर्नेछ । त्यस्तै दोस्रो हुनेलाई ३१ हजार रुपैयाँ र तेस्रो हुनेलाई २१ हजार रुपैयाँसहित ट्रफी तथा प्रमाणपत्र प्रदान गरिनेछ । प्रतियोगितामा सहभागी अन्य सबै समूहलाई प्रमाणपत्र प्रदान गरिने पनि आयोजकले स्पष्ट पारेको छ ।
कार्यक्रममा कला क्षेत्रको सम्मानलाई विशेष प्राथमिकता दिइएको छ । नेपालगञ्जमा लामो समयदेखि कला तथा संस्कृतिको क्षेत्रमा योगदान पुर्याउँदै आएका एक जना वरिष्ठ तथा अग्रज कलाकारलाई “दोसल्ला अवार्ड” सहित सम्मानपत्र र नगद ५ हजार रुपैयाँले सम्मान गरिने आयोजकले जनाएको छ ।
कुल कार्यक्रमको अनुमानित बजेट ३ लाख ३० हजार रुपैयाँ रहेको छ । जसमा नेपालगञ्ज उपमहानगरपालिकाबाट ३ लाख रुपैयाँ आर्थिक सहयोग प्राप्त भएको र बाँकी ३० हजार रुपैयाँ संस्था आफैंले व्यहोर्ने बाँके कला केन्द्रले जनाएको छ ।
कार्यक्रम वीपी चोकस्थित सुनाखरी रेष्टुरेन्ट एण्ड पार्टी प्यालेसमा बिहान ११ बजेदेखि सुरु हुने बताइएको छ । आयोजकका अनुसार प्रतियोगितालाई व्यवस्थित, मर्यादित र सांस्कृतिक उत्सवका रूपमा सम्पन्न गर्ने तयारी गरिएको छ ।
पत्रकार सम्मेलनमा बाँके कला केन्द्रका अध्यक्ष सुन्दर गुरुङले कला र संस्कृतिको क्षेत्र पछिल्लो समय ओझेलमा परेको अनुभूति भइरहेको उल्लेख गर्दै यस्ता कार्यक्रमले नयाँ पुस्तामा मौलिक संस्कृति संरक्षण र प्रवर्द्धनमा सहयोग पुग्ने विश्वास व्यक्त गरे । उनले प्रतियोगितालाई सफल बनाउन सबै पक्षको सहकार्य आवश्यक रहेकोमा जोड दिए ।
त्यसैगरी कार्यक्रममा नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाईं र बाँके शाखा अध्यक्ष नवीन गिरीले पनि शुभकामना व्यक्त गर्दै यस्ता सांस्कृतिक गतिविधिले स्थानीय कला र प्रतिभालाई राष्ट्रिय स्तरसम्म पुर्याउन मद्दत गर्ने धारणा राखे ।
नेपालगञ्जमा आयोजना हुन लागेको यो सांस्कृतिक प्रतियोगितालाई स्थानीय स्तरको कला, संस्कृति र विद्यार्थी प्रतिभा उजागर गर्ने महत्वपूर्ण मञ्चका रूपमा हेरिएको छ ।
