दाङ, साउन ८ — दाङको लमही नगरपालिका–७ कप्तानगञ्जमा अटोको ठक्करबाट एक वृद्धको मृत्यु भएको छ। उपचारका क्रममा उनको ज्यान गएको प्रहरीले जनाएको छ।
बिहीबार साँझ करिब ७ः४५ बजे लमहीबाट पश्चिमतर्फ जाँदै गरेको रा १ ह ३७४१ नम्बरको अटोले सडकमा पैदल हिँडिरहेका लमही नगरपालिका–७ कप्तानगञ्ज निवासी ७२ वर्षीय रामबहादुर घर्ती मगरलाई ठक्कर दिएको थियो। दुर्घटना कप्तानगञ्जस्थित पम्प नजिक भएको प्रहरीले जनाएको छ।
ठक्करबाट गम्भीर घाइते भएका घर्ती मगरको टाउकोमा चोट लागेको थियो। उनलाई तत्काल लमही अस्पताल पुर्याई प्राथमिक उपचार गरिएको थियो। अवस्था गम्भीर भएपछि थप उपचारका लागि घोराहीस्थित सञ्जीवनी शिक्षण अस्पताल रेफर गरिएकोमा उपचारकै क्रममा चिकित्सकले मृत घोषणा गरेका हुन्।
दुर्घटनामा संलग्न अटो र चालक लमही नगरपालिका–७ उचानिम्बु निवासी ४० वर्षीय जितराम चौधरीलाई प्रहरीले नियन्त्रणमा लिएको छ।
प्रहरीले घटनाबारे आवश्यक अनुसन्धान अघि बढाएको जनाएको छ।
