नेपालगन्ज, चैत १६ गते नेपालगन्ज उपमहानगरपालिका–१२ कोरियनपुरमा एक महिलालाई जलाएर हत्या गरिएको आशंकास्पद घटनाले जिल्लाभर आक्रोश र चासो बढाएको छ । घटनामा संलग्न जोसुकै भए पनि कडा कानुनी कारबाही गर्नुपर्ने माग जनप्रतिनिधि, सामाजिक संघसंस्था र नागरिकस्तरबाट तीव्र रूपमा उठ्न थालेको छ ।
बाँके क्षेत्र नम्बर–२ का प्रतिनिधिसभा सदस्य मोहम्मद इश्तियाक राईले घटनाप्रति गहिरो दुःख व्यक्त गर्दै निष्पक्ष र तीव्र अनुसन्धानमार्फत दोषीलाई कडा सजाय दिलाउन प्रहरी प्रशासनसँग आग्रह गर्नुभएको छ । उहाँले यस्तो जघन्य अपराधको घोर भर्त्सना गर्दै शान्ति सुरक्षालाई थप मजबुत बनाउन पनि ध्यान दिनुपर्ने बताउनुभयो । साथै, समाजमा हुने शंकास्पद गतिविधिबारे समयमै जानकारी गराएर जिम्मेवार नागरिकको भूमिका निर्वाह गर्न सबैलाई अपिल गर्नुभयो ।
लुम्बिनी प्रदेशसभा सदस्य अम्बिका काफ्लेले पनि महिलामाथि हुने हिंसा बढ्दै गएकोप्रति चिन्ता व्यक्त गर्दै दोषीलाई कुनै हालतमा उन्मुक्ति दिन नहुने बताउनुभयो । नागरिक सरोकार मञ्चका संयोजक कृष्णप्रसाद श्रेष्ठले यस्ता अमानवीय घटनामा संलग्नलाई कडा भन्दा कडा कारबाही गर्नुपर्ने धारणा राख्नुभयो ।
आइतबार बिहान कोरियनपुर क्षेत्रमा जलेको अवस्थामा फेला परेकी सृजना बूढा मगर (गीता) लाई उपचारका लागि अस्पताल पुर्याउँदा चिकित्सकले मृत घोषणा गरेका थिए । मृतककी तीन वर्षीया छोरी रहेको र उनी पतिसँग अलग बसेर केही वर्षदेखि स्थानीय एक युवासँग सम्बन्धमा रहेको प्रारम्भिक अनुसन्धानबाट खुलेको प्रहरीले जनाएको छ ।
जिल्ला प्रहरी कार्यालय बाँकेका अनुसार घटनालाई गम्भीर रूपमा लिँदै विभिन्न कोणबाट अनुसन्धान अघि बढाइएको छ । घटनासम्बन्धी सोधपुछका लागि एक युवकसहित उनका परिवारका सदस्यलाई नियन्त्रणमा लिइएको प्रहरी प्रवक्ता डीएसपी दिपक पातलीले जानकारी दिनुभयो । शवको पोस्टमार्टम प्रक्रिया जारी रहेको र त्यसपछि मात्र घटनाको वास्तविक प्रकृति स्पष्ट हुने प्रहरीले जनाएको छ ।
प्रहरी प्रमुख एसपी अंगुर जिसीका अनुसार घटना आत्महत्या हो वा कर्तव्य ज्यान, दुवै सम्भावनालाई आधार मानेर अनुसन्धान भइरहेको छ । साथै, सामाजिक सञ्जालमा अपुष्ट सूचना फैलाएर द्वन्द्व निम्त्याउने गतिविधि नगर्न सर्वसाधारणलाई सचेत गराइएको छ ।
