कपिलवस्तु, वैशाख ३१ कपिलवस्तुको शिवराज नगरपालिकास्थित आधारभूत स्वास्थ्य सेवा अस्पताल चन्द्रौटाको सेवा शुल्क र फार्मेसी आम्दानीमार्फत संकलित ३८ लाख १९ हजार ७७० रुपैयाँभन्दा बढी रकम हिनामिना भएको आरोपमा प्रहरीले अस्पताल, बैंक र स्थानीय तहसँग सम्बन्धित पाँच जना पदाधिकारी तथा कर्मचारीलाई पक्राउ गरेको छ । लेखा परीक्षणका क्रममा भौचर मात्र फेला परे पनि बैंकमा रकम दाखिला नभएको देखिएपछि घटना सार्वजनिक भएको हो । आर्थिक वर्ष २०८१/०८२ मा संकलित अस्पतालको दैनिक आम्दानी बैंक खातामा जम्मा गर्नुको सट्टा नक्कली भौचर बनाएर मिलेमतोमा रकम अपचलन गरिएको प्रारम्भिक अनुसन्धानबाट खुलेको प्रहरीले जनाएको छ । अस्पतालको आन्तरिक लेखा परीक्षणका क्रममा १२९ वटा भौचर फाइलमा भेटिए पनि ती भौचरअनुसारको रकम नेपाल बैंक लिमिटेडको सम्बन्धित खातामा दाखिला नभएको देखिएपछि शंका उत्पन्न भएको थियो ।
नगरपालिकाले थप छानबिन अघि बढाएपछि ठूलो मात्रामा आर्थिक अनियमितता भएको पुष्टि भएको हो । यस घटनाले सरकारी स्वास्थ्य संस्थाको आर्थिक कारोबार र बैंकिङ प्रणालीभित्रको निगरानीमाथि गम्भीर प्रश्न उठाएको छ । कपिलवस्तुका प्रहरी प्रवक्ता डिएसपी रिपेन्द्रकुमार सिंहका अनुसार अनुसन्धानमा अस्पतालको सेवा शुल्क तथा फार्मेसीबाट औषधि बिक्रीमार्फत उठेको रकम बैंकमा जम्मा नगरी योजनाबद्ध रूपमा हिनामिना गरिएको देखिएको छ । उनका अनुसार १२९ वटा भौचरमार्फत बैंकमा दाखिला हुनुपर्ने रकम नै नपुगेको र त्यसको कुल रकम ३८ लाखभन्दा बढी रहेको पुष्टि भएको छ ।
प्रहरीले घटनामा संलग्न रहेको आरोपमा पाँच जनालाई पक्राउ गरेको छ । पक्राउ पर्नेमा शिवराज नगरपालिकाको स्वास्थ्य शाखा प्रमुख ५५ वर्षीय चुडामणि भट्टराई, अस्पतालका मेडिकल सुपरिटेन्डेन्ट ३० वर्षीय डा. अमित पाण्डे, नेपाल बैंक चन्द्रौटा शाखाका क्यासियर ३४ वर्षीय कमलप्रसाद भण्डारी, अस्पतालकी फार्मेसी सहायक कर्मचारी ३७ वर्षीया रूक्सना खातुन तथा बैंकका कार्यालय सहयोगी ३५ वर्षीय विक्रम केसी रहेका छन् । उनीहरूबीचको मिलेमतोमै अस्पतालको रकम बैंकमा दाखिला नगरी कागजी भौचर मात्र मिलाएर अनियमितता गरिएको प्रारम्भिक निष्कर्ष प्रहरीको छ ।
घटना पहिलोपटक गत वैशाख ४ गते शिवराज नगरपालिकामा उजुरी दर्ता भएपछि सार्वजनिक भएको थियो । अस्पताल व्यवस्थापन समितिका तर्फबाट नगर प्रमुख अजय थापामार्फत प्रहरीलाई प्रारम्भिक जानकारी गराइएको थियो । त्यसपछि वडा नं–५ का अध्यक्ष तथा अस्पताल सञ्चालन तथा व्यवस्थापन समितिका अध्यक्ष नेत्रप्रसाद बेलबासेले वैशाख २७ गते ठगी तथा आपराधिक विश्वासघात सम्बन्धी औपचारिक जाहेरी दिएका थिए ।
उजुरीपछि प्रहरीले बैंक विवरण, भौचर फाइल र लेखा अभिलेखहरूको विस्तृत अध्ययन गर्दै अनुसन्धान अघि बढाएको थियो । अनुसन्धानका क्रममा भौचरहरू तयार भए पनि बैंकमा रकम जम्मा नभएको स्पष्ट भएपछि यो घटना संगठित आर्थिक अपराधको रूपमा देखिएको प्रहरीको भनाइ छ । प्रहरीका अनुसार यस प्रकरणमा थप तीन जना व्यक्ति फरार रहेका छन् भने उनीहरूको खोजी जारी छ । पक्राउ परेका पाँच जनामाथि ठगी तथा आपराधिक विश्वासघात सम्बन्धी मुद्दामा अनुसन्धान गर्न जिल्ला अदालतबाट सात दिनको म्याद लिइएको प्रहरीले जनाएको छ ।
सरकारी अस्पतालजस्तो संवेदनशील संस्थामा भएको यो आर्थिक अनियमितताले स्थानीय तहको लेखा प्रणाली, बैंकिङ कारोबार र अनुगमन संयन्त्रको प्रभावकारितामाथि गम्भीर प्रश्न उठाएको छ । स्थानीय तहले आगामी दिनमा आर्थिक कारोबारमा कडाइ गर्ने र निगरानी प्रणाली सुधार गर्ने जनाएको छ ।
