काठमाडौँ। श्रम संस्कृति पार्टीका सांसद पूर्णबहादुर लिम्बूले ब्रिटिस गोरखा सैनिक तथा उनीहरूका सन्तानको नेपाली नागरिकताको निरन्तरता सुनिश्चित गर्न संविधान संशोधन आवश्यक रहेको बताएका छन्।
प्रतिनिधि सभाको बिहीबारको बैठकमा विशेष समय लिएर बोल्दै सांसद लिम्बूले संविधान संशोधन प्रक्रियामार्फत संविधानको धारा १४ मा आवश्यक उपधारा थप गरी वंशजको नागरिकता निरन्तरता दिने व्यवस्था गर्न सरकारको ध्यानाकर्षण गराए।
उनले विगत दुई दशकदेखि ब्रिटिस गोरखा सैनिक तथा उनीहरूका सन्ततिले नेपाली नागरिकताको निरन्तरतासम्बन्धी अभियान सञ्चालन गर्दै आएको स्मरण गराउँदै उनीहरूको अधिकार सुनिश्चित गर्न ढिलाइ गर्न नहुने बताए। लिम्बूले भने, “ब्रिटिस गोरखा सैनिक र उनीहरूका सन्तानको नैसर्गिक अधिकारलाई संविधानमा सुनिश्चित गर्न म सरकारसमक्ष जोडदार माग गर्दछु।”
सांसद लिम्बूले समान पेन्सन र अन्य सेवा–सुविधाको माग गर्दै आन्दोलनरत भूपू गोरखा सैनिकहरूको समस्या समाधानका लागि प्रभावकारी कूटनीतिक पहल आवश्यक रहेको पनि बताए। उनले नेपाल सरकारले बेलायत सरकारसँगको वार्ता र कूटनीतिक संवादलाई थप सक्रिय र परिणाममुखी बनाउनुपर्नेमा जोड दिए।
उनका अनुसार दीर्घकालीन रूपमा देखिएको गोरखा सैनिकहरूको नागरिकता, पेन्सन र सेवा–सुविधासम्बन्धी समस्या समाधान गर्न सरकारले उच्च प्राथमिकतामा राखेर कूटनीतिक पहल अघि बढाउनुपर्ने आवश्यकता छ।
