काठमाडौँ । मनसुनजन्य विपद् जोखिम बढ्दै गएसँगै सरकार खोज तथा उद्धार कार्यका लागि २६ हजारभन्दा बढी सुरक्षाकर्मीलाई तयारी अवस्थामा राखिएको छ । सशस्त्र प्रहरी बल, नेपाली सेना र नेपाल प्रहरीसहितको संयुक्त जनशक्ति देशभर सम्भावित विपद् प्रभावित क्षेत्रमा तत्काल परिचालन गर्ने गरी तयारी गरिएको हो ।
सरकारी तथ्याङ्कअनुसार खोज तथा उद्धारका लागि नेपाली सेनाबाट ७ हजार ५२४, नेपाल प्रहरीबाट १० हजार ५८५ र सशस्त्र प्रहरी बलबाट १३४ गोताखोरसहित ८ हजार ११० जना सुरक्षाकर्मी तयारी अवस्थामा राखिएको छ । यसरी कुल २६ हजारभन्दा बढी जनशक्ति विपद् व्यवस्थापनका लागि परिचालन योग्य अवस्थामा रहेका छन् ।
सरकारले यी सुरक्षाकर्मीलाई ७७ वटै जिल्लामा आवश्यकता अनुसार परिचालन गर्ने व्यवस्था मिलाएको छ । साथै, स्थानीय तह तथा जिल्लास्तरमा उपलब्ध अन्य जनशक्तिलाई पनि आपतकालीन अवस्थामा समन्वय गरेर परिचालन गरिने जनाइएको छ ।
मनसुन सक्रिय भएसँगै बाढी, पहिरो, डुबान तथा अन्य विपद् जोखिम बढ्ने भएकाले सरकारले पूर्वतयारीलाई प्राथमिकतामा राखेको हो । विपद् पूर्वानुमानअनुसार यस वर्ष देशभर ५१ हजार ८६८ घरपरिवारका करिब २ लाख २६ हजार ६६१ जना प्रभावित हुन सक्ने अनुमान गरिएको छ ।
विपद् जोखिम न्यूनीकरण तथा व्यवस्थापन प्राधिकरणका अनुसार सम्भावित जोखिम क्षेत्रहरू पहिचान गरी आवश्यक उद्धार सामग्री, राहत सामग्री तथा सुरक्षाकर्मीको तैनाथीलाई तीव्र बनाइएको छ । विशेषगरी बाढी–पहिरोको उच्च जोखिम रहेका पहाडी तथा तराईका जिल्लामा उच्च सतर्कता अपनाइएको छ ।
यसैबीच, तीनवटै सुरक्षा निकायबीच समन्वयात्मक रूपमा संयुक्त अभ्यास तथा पूर्वतयारी अभ्यासहरू पनि सञ्चालन गरिएको जनाइएको छ । गोताखोर टोलीलाई विशेष रूपमा नदी, ताल तथा बाढी प्रभावित क्षेत्रमा उद्धारका लागि तयारी अवस्थामा राखिएको छ ।
सरकारले नागरिकलाई मनसुन अवधिभर उच्च सतर्कता अपनाउन, जोखिमयुक्त क्षेत्रको यात्रा नगर्न तथा आपतकालीन अवस्थामा स्थानीय प्रशासनसँग सम्पर्कमा रहन आग्रह गरेको छ ।
विपद् व्यवस्थापनलाई प्रभावकारी बनाउन तीनै सुरक्षा निकायबीचको सहकार्यलाई अझ सुदृढ बनाइएको अधिकारीहरूको भनाइ छ ।
