नारायणगढ, साउन २६ गते । चितवन राष्ट्रिय निकुञ्जको मध्यवर्ती क्षेत्रमा बाघको आक्रमणबाट एक पुरुषको मृत्यु भएको छ । पश्चिम चितवनको मेघौलीस्थित हरियाली सामुदायिक वनमा सोमबार एक पुरुषको शव भेटिएपछि घटनास्थलमा पुगेको टोलीले शव नजिकै बाघसमेत देखेको हो ।
चितवन राष्ट्रिय निकुञ्जका सूचना अधिकारी अविनाश मगरका अनुसार सामुदायिक वनमा पुरुषको शव रहेको सूचना आएपछि खोजी तथा उद्धारका लागि हात्तीसहितको प्राविधिक टोली परिचालन गरिएको छ । शव भेटिएको स्थान आसपासमै बाघ रहेकाले हात्तीको प्रयोग गरी बाघलाई सुरक्षित दूरीतर्फ धपाएर शव नियन्त्रणमा लिने प्रयास भइरहेको उहाँले जानकारी दिनुभयो ।
मृतकको औपचारिक पहिचान भने हुन बाँकी छ । स्थानीयका अनुसार भरतपुर महानगरपालिका–२८, जितपुरका ६१ वर्षीय मगले बोटे सम्पर्कविहीन छन् । उनी सोही सामुदायिक वनमा घाँस काट्न गएको बताइएको छ ।
घाँस काट्न वनमा गएका बोटेमाथि बाघले आक्रमण गरेको हुन सक्ने प्रारम्भिक अनुमान गरिएको छ । घटनास्थलमा शव भेटिएको र नजिकै बाघसमेत देखिएकाले बाघको आक्रमणबाट मृत्यु भएको हुन सक्ने संरक्षणकर्मीहरूले बताएका छन् ।
घटनास्थलमा परिचालित टोलीले बाघको सम्भावित जोखिमलाई ध्यानमा राख्दै सर्वसाधारणलाई सुरक्षित दूरीमा राखेको छ । साथै शवको पहिचान तथा घटनाको वास्तविक अवस्था पत्ता लगाउने काम भइरहेको निकुञ्जले जनाएको छ ।
घटनास्थलको अवस्था नियन्त्रणमा लिएपछि शव परीक्षणका लागि पठाइने र त्यसपछि मृत्युको कारण तथा घटनाको थप विवरण स्पष्ट हुने बताइएको छ ।
