कोहलपुर, मंसिर १६ ,कोहलपुर नगरपालिकाले न्यूरोड क्षेत्रमा सार्वजनिक सुरक्षा र सडक व्यवस्थापनका लागि चालेको कदमलाई संघीय सांसद सूर्य ढकालले रोक्न खोजेको भन्दै स्थानीय तह र जनप्रतिनिधिबीच मतभेद सार्वजनिकरूपमा देखिएको छ । अत्यन्तै भीडभाड हुने न्यूरोडको डिभाइडर (सडकबीचको भाग) मा अनुमतिबिना फोटो खिचाउने व्यवसाय फस्टाएको गुनासो बढेपछि नगरपालिका सक्रिय बनेको थियो ।
न्यूरोड कोहलपुरको सबैभन्दा व्यस्त सडक हो । दिनभर ट्राफिकको चाप, पैदलयात्रीको भीड र असुरक्षित बाटो यहीबीच डिभाइडरवरिपरि फोटो खिचाउने युवाहरूको लामो लाइन देखिन्थ्यो । उनीहरूले २० रुपैयाँ शुल्क लिएर टिकटक तथा अन्य डिजिटल सामग्रीका लागि फोटो र भिडियो खिचिदिने गरेका थिए । यसले सडकमा भीड थपिनुका साथै दुर्घटना जोखिम बढाएको नगरपालिकाको तर्क छ । सार्वजनिक स्थानको फोहोर व्यवस्थापनसमेत चुनौती बनेको भन्दै स्थानीयले दर्ता गर्ने गुनासोपछि नगरपालिका हटाउने अभियानमा उत्रिएको थियो ।
यसअघि पनि नगरपालिका र व्यवसायी युवाबीच बढ्दो अव्यवस्थाका कारण विवाद भएको थियो । फोहोर, भीडभाड र शुल्क अत्यधिक रहेको उजुरी आएपछि नगरले फोटो खिच्नेलाई हटाएको थियो । तर केही समयपछि दुवै पक्षबीच सहमति भएपछि उनीहरू पुनः काममा फर्किएका थिए । पछिल्लो केही सातायता उजुरी दोहोरिएपछि नगरपालिका फेरि सक्रिय बनेको बताएको छ ।
यही क्रममा नेकपा एमालेबाट निर्वाचित संघीय सांसद सूर्य ढकाल युवाहरूको पक्षमा खुलेर उभिएका छन् । नगरले सञ्चालनमा रोक लगाउन खोजेको भन्दै सांसद ढकालले आपत्ति जनाएका छन् । उनका अनुसार यस कार्यमा संलग्न युवाहरूले रोजगारी सिर्जना गरिरहेका छन्, त्यसैले रोक्नु अनुचित छ ।
सांसद ढकालले सार्वजनिक रूपमा भनेका छन्, ‘कोहलपुर न्यूरोडमा नवयुवाहरू डेढ–दुई लाखको क्यामेरा लिएर दिनभरि जसो त्यही वरिपरि फोटो खिचिरहेका हुन्छन् । २० रुपैयाँ लिएर फोटो खिचिदिने र टिकटक बनाउन चाहनेलाई सहयोग गरिरहेका छन् । एक दिनमा १५०० देखि ४००० रुपैयाँसम्म कमाउँछन् । महिनामा ६०–७० हजारसम्म कमाउन सक्ने युवाहरूलाई हेर्दा रोजगारी आफैँ सिर्जना गर्ने हो भन्ने ठहरिन्छ । ती युवाहरूलाई सबैले साथ र सहयोग गरौँ ।’
तर नगरपालिकाका अधिकारीहरूको भनाइ फरक छ । सुरक्षा जोखिम बढेको, ट्राफिक सहजता हराएको र सार्वजनिक स्थानको दुरुपयोग भएको भन्दै यस्तो गतिविधि रोक्नु आवश्यक भएको नगरको तर्क छ । ‘अनुमति नलिएर भीडभाडमा व्यवसाय गर्दा समस्या झन् बढेको छ । गुनासो आएपछि हटाउने प्रक्रिया थालेका हौँ,’” नगरका एक अधिकारीले बताए ।
