रसुवास्थित भोटेकोशी नदीमा आएको भीषण बाढीमा परी कम्तीमा आठ जनाको मृत्यु भएको छ। बाढी प्रभावित क्षेत्रमा गरिएको खोजीका क्रममा हालसम्म आठ जनाको शव फेला परेको नेपाल प्रहरीले जनाएको छ।
नेपाल प्रहरीका प्रवक्ता अबिनारायण काफ्लेका अनुसार बाढीबाट प्रभावित क्षेत्रमा सुरक्षाकर्मीले खोजी तथा उद्धारलाई तीव्रता दिएका छन्। बाढीले पुर्याएको क्षतिको विवरण संकलन तथा बेपत्ता भएकाहरूको खोजीसमेत भइरहेको प्रहरीले जनाएको छ।
अचानक आएको बाढीका कारण भोटेकोशी नदी आसपासका क्षेत्रमा ठूलो क्षति पुगेको छ। बाढीले मानवीय तथा भौतिक क्षति पुर्याएपछि प्रभावित क्षेत्रमा उद्धार तथा राहतका लागि सुरक्षाकर्मी परिचालन गरिएको छ।
यसैबीच, नेपाली सेनाले खोजी, उद्धार तथा राहत कार्यलाई प्रभावकारी बनाउन १४ वटा हेलिकोप्टरसहित विशेष विपद् व्यवस्थापन टोली परिचालन गरेको जनाएको छ। सेनाले प्रभावित क्षेत्रमा उद्धार, घाइतेको उपचार तथा आवश्यक राहत सामग्री पुर्याउने कामलाई प्राथमिकतामा राखेको छ।
बाढीबाट प्रभावित क्षेत्रमा थप मानवीय क्षति हुन नदिन सुरक्षाकर्मीले जोखिममा रहेका नागरिकलाई सुरक्षित स्थानमा सार्ने तथा बेपत्ताको खोजी गर्ने कार्यलाई समेत निरन्तरता दिएका छन्।
