कोहलपुर, मंसिर १६ लैंगिक हिंसा विरुद्धको १६ दिने अभियानको अवसरमा शान्ति पुनर्स्थापना गृह शाखा कार्यालय नेपालगन्ज, बाँकेको आयोजनामा डुडुवा गाउँपालिका–१, पिप्रहवामा अवस्थित श्री जनता माध्यमिक विद्यालयमा सचेतनामूलक कार्यक्रम सम्पन्न गरिएको छ । ‘प्रविधिको सही प्रयोग गरौँः लैंगिक हिंसा अन्त्य गरौँ’ भन्ने मूल नाराका साथ आयोजित कार्यक्रममा कक्षा ८, ९ र १० मा अध्ययनरत विद्यार्थीहरूको उल्लेखनीय सहभागिता देखियो ।
कार्यक्रमको उद्देश्य विद्यार्थीलाई लैंगिक हिंसाका रूप, कारण र असरबारे बुझाउने मात्र नभई आधुनिक प्रविधिको सुरक्षित र जिम्मेवार उपयोगमार्फत हिंसा रोकथाममा उनीहरूको सक्रिय भूमिका सुनिश्चित गराउनु थियो । डिजिटल प्लेटफर्ममार्फत हुने दुरुपयोग, अनलाइन दुर्व्यवहार, साइबर धम्की, निजता हननजस्ता संवेदनशील विषयमा विशेषज्ञहरूले विस्तृतरूपमा जानकारी दिए । उनीहरूले सामाजिक सञ्जालमा सुरक्षित व्यवहार अपनाउने, अनलाइनमा उत्पीडन भएमा कसरी प्रतिक्रिया दिने, कसलाई जानकारी गराउने र कानुनी प्रक्रिया के–कस्ता छन् भन्नेबारे उदाहरणसहित स्पष्ट पारे ।
शान्ति पुनर्स्थापना गृहका प्रतिनिधिहरूले विद्यालय उमेरकै विद्यार्थीहरू धेरैजसो साइबर दुर्व्यवहारका जोखिममा पर्ने भएकाले सचेतना अत्यावश्यक रहेको उल्लेख गरे । उनीहरूले प्रविधिले सुविधा मात्र होइन, चुनौती पनि ल्याउने भएकाले सही प्रयोगका लागि परिवार, विद्यालय र समुदायको समन्वय हुनुपर्नेमा जोड दिए । साथै, विद्यालयका शिक्षकहरूले पनि विद्यार्थीहरूलाई अनुशासित, सुरक्षित र जिम्मेवार डिजिटल नागरिक बनाउन यस्ता कार्यक्रमले महत्वपूर्ण योगदान पुर्याउने बताए ।
कार्यक्रममा सहभागी विद्यार्थीहरूले लैंगिक हिंसाबारे खुलेर छलफल गर्न पाएकोमा खुसी व्यक्त गर्दै आफूले सिकेका कुराहरू विद्यालय र समुदायमा पनि प्रवाह गर्ने प्रतिबद्धता जनाए । विशेषगरी किशोर–किशोरीको मनोविज्ञान, सामाजिक दबाब र अनलाइन सम्पर्कका जोखिमबारे प्रस्तुत गरिएको जानकारी प्रभावकारी भएको उनीहरूको प्रतिक्रिया थियो ।
१६ दिने अभियानलाई विद्यालयमै लैजाँदै स्थानीय तहसम्म सचेतना विस्तार गर्ने प्रयासका रूपमा आयोजित यस कार्यक्रमले विद्यार्थी, शिक्षक र अभिभावकबीच लैंगिक समानता, सुरक्षित डिजिटल वातावरण र हिंसा रोकथामबारे साझा सोच निर्माण गर्न मद्दत पुर्याएको आयोजक संस्था शान्ति पुनर्स्थापना गृहले जनाएको छ ।
