नेपालगन्ज, पुस २५ नेपालगन्जका नगर प्रमुख प्रशान्त विष्टले शैक्षिक गुणस्तर अभिवृद्धिमा निजी विद्यालयको भूमिका महŒवपूर्ण रहेको बताएका छन् । निजी तथा आवासीय विद्यालय अर्गनाइजेशन नेपाल (प्याब्सन) बाँकेको ३५ औं ‘प्याब्सन डे’ अवसरमा आयोजित कार्यक्रममा उनले निजी विद्यालय रोजगारीको स्रोत समेत बनेको उल्लेख गर्दै, निजी र सामुदायिक विद्यालयको गुणस्तर कायम राख्न राज्यको भूमिका आवश्यक रहेको बताए ।
उनले संघीय सरकारले तत्काल शिक्षा ऐन ल्याउनुपर्ने र यसमा निजी विद्यालयसँगको सहमति अनिवार्य हुनुपर्ने पनि औँल्याए । बाँकेका प्रमुख जिल्ला अधिकारी दिल कुमार तामाङले निजी विद्यालयले नेपालको शैक्षिक गुणस्तर कायम राख्न र रोजगारी सिर्जना गर्न उल्लेखनीय योगदान दिएको बताए । नेपाल पत्रकार महासंघ बाँकेका अध्यक्ष नवीन गिरीले निजी विद्यालयले शिक्षा क्षेत्रको इज्जत राख्दै आएको उल्लेख गर्दै, शुल्क र शिक्षक पारिश्रमिकसम्बन्धी नकारात्मक धारणा बारे स्पष्ट जवाफ दिन आवश्यक रहेको बताए ।
कार्यक्रममा प्याब्सन बाँकेका अध्यक्ष विकास बज्राचार्यको अध्यक्षतामा प्याब्सनका केन्द्रीय प्राज्ञिक सल्लाहकार डा. राजेश केशर खनाल, शिक्षा विकास तथा समन्वय इकाई बाँके प्रमुख धनसुदन चौलागाईं, प्याब्सन अगुवा ऋषिकेश जिसी, नेपालगन्ज अध्यक्ष मानवबहादुर थापा लगायतले शुभकामना दिएका थिए ।
कार्यक्रमको अवसरमा पत्रकार प्रियास्मृति ढकाललाई प्याब्सन पत्रकारिता पुरस्कारबाट सम्मानित गरिएको छ । ढकालले निजी तथा आवासीय विद्यालयको उन्नयनमा पुर्याएको योगदानको कदर गर्दै १० हजार रुपैयाँ नगद, दोसल्ला र कदरपत्र प्रदान गरिएको हो । ढकाल करिब २० वर्षदेखि व्यावसायिक पत्रकारिता गर्दै आएका छन् ।
यसैगरी, शिक्षा, कला–संस्कृति, मानव अधिकार, लागु पदार्थ नियन्त्रण, खेलकुद र अन्य सामाजिक क्षेत्रमा योगदान पुर्याउने व्यक्तिहरूलाई समेत सम्मान गरिएको थियो । यस वर्षबाट प्याब्सन डेमा विधागत सम्मान पनि सुरु गरिएको छ ।
