पीडितलाई साथमा ल्याएका सहजकर्तामार्फत तत्काल जाहेरी दरखास्त ल्याउन आग्रह गरिएको भए पनि ‘सल्लाह गरेर आउँछौँ’ भनी गएको पीडित पक्ष त्यसपछि सम्पर्कमा नआएको प्रहरीको भनाइ छ ।अनर्गल प्रचारप्रसार गरी पीडितलाई झन् पीडित बनाएको छः प्रहरीतत्काल जाहेरी दरखास्त ल्याउन आग्रह गरिएको भए पनि ‘सल्लाह गरेर आउँछौँ’ भनी गएको पीडित पक्ष त्यसपछि सम्पर्कमा आउनु भएको छैन ।
बाँके, पुस २८जिल्ला प्रहरी कार्यालय बाँकेले डुडुवा गाउँपालिका–४ मा नाबालिकामाथि भएको जबरजस्ती करणी घटनासम्बन्धी जाहेरी नलिएको र पीडितलाई न्यायिक प्रक्रियामा असहयोग गरेको भन्ने आरोपको खण्डन गरेको छ । घटनाबारे पीडित पक्षले काठमाडौंस्थित रिपोर्टर्स क्लबमा पत्रकार सम्मेलन गरी आरोप लगाएपछि प्रहरी कार्यालयको गम्भीर ध्यानाकर्षण भएको जनाएको छ ।
प्रहरीका अनुसार पुस १७ गते पीडित नाबालिका कार्यालयको सम्पर्कमा आएलगत्तै सोही दिन विस्तृत स्वास्थ्य परीक्षणसहित प्रारम्भिक अनुसन्धान कार्य सुरु गरिएको थियो । पीडितलाई साथमा ल्याएका सहजकर्तामार्फत तत्काल जाहेरी दरखास्त ल्याउन आग्रह गरिएको भए पनि ‘सल्लाह गरेर आउँछौँ’ भनी गएको पीडित पक्ष त्यसपछि सम्पर्कमा नआएको जिल्ला प्रहरी कार्यालय बाँकेका प्रहरी तथा प्रहरी उपरीक्षक (एसपी) अंगुर जिसीले जानकारी दिए ।
प्रहरी कार्यालयका अनुसार पुस २२ गते हुलाकमार्फत पीडित बालिकाकी आमाको नामबाट जाहेरी दरखास्त प्राप्त भएको थियो । तर मुलुकी फौजदारी कार्यविधि संहिता २०७४ अनुसार हुलाकबाट प्राप्त जाहेरी सनाखतपछि मात्र दर्ता गर्नुपर्ने कानुनी व्यवस्था रहेकाले जाहेरवालासँग सम्पर्क गर्न खोज्दा सम्पर्क हुन नसकेको जनाएको छ । प्रहरी टोली स्वयम् जाहेरवालाको घरठेगानामा जाँदासमेत उनी फेला नपरेको र आफन्त, संस्था तथा छिमेकीमार्फत पटकपटक सम्पर्कका लागि अनुरोध गर्दा पनि हालसम्म जाहेरवाला कार्यालयमा नआएको कारण जाहेरी दर्ता हुन नसकेको स्पष्ट पारिएको छ ।
प्रहरीले नाबालिकामाथि भएको गम्भीर प्रकृतिको घटनामा चासो नदिएको, अनुसन्धान नगरेको, दबाब र प्रभावमा परेको भन्ने आरोप निराधार रहेको दाबी गरेको छ । विज्ञप्तिमा यस प्रकारका घटनालाई अत्यन्त संवेदनशील रूपमा लिएर गहन अनुसन्धान भइरहेको र निरन्तर रहने प्रतिबद्धता जनाइएको छ ।प्रहरीले पीडित पक्षलाई कुनै दबाब वा प्रभावमा नपरी प्रहरी अनुसन्धानमा विश्वास गरी कार्यालयमा उपस्थित भई जाहेरी सनाखत गरी अनुसन्धानमा सहयोग गर्न अपील गरेको छ । साथै, केही व्यक्ति, समूह तथा सञ्चारमाध्यमले अनुसन्धानलाई प्रभावित पार्ने मनसायले अनर्गल प्रचारप्रसार गरी पीडितलाई झन् पीडित बनाएको आरोप लगाउँदै यस्ता घटनामा संवेदनशील र जिम्मेवार भूमिका निर्वाह गर्न सरोकारवालासँग अनुरोध गरिएको छ ।
सूचना अधिकारी प्रहरी नायब उपरीक्षक (डिएसपी) दीपक पातलीले नेपाल प्रहरी संगठन पीडितको सुरक्षा, न्यायिक पहुँच सुनिश्चित गर्दै निष्पक्ष र वस्तुनिष्ठ अनुसन्धान गर्न पूर्ण प्रतिबद्ध रहेको बताएका छन् ।
