मकवानपुर । इन्द्रसरोवर गाउँपालिका अन्तर्गत सिस्नेरी–दक्षिणकाली–काठमाडौँ सडकखण्डमा विद्युतीय गाडी दुर्घटना हुँदा १० जना घाइते भएका छन् ।
जिल्ला प्रहरी कार्यालय मकवानपुरका अनुसार काठमाडौँबाट हेटौँडातर्फ आउँदै गरेको बा.प्र.०१–०३३ च ५२५८ नम्बरको विद्युतीय गाडी सोमबार राति करिब ११ः१० बजे इन्द्रसरोवर गाउँपालिका–२ लामबगरस्थित सडकमा दुर्घटनामा परेको हो ।
प्रहरी निरीक्षक राजु प्रसाद कुर्मी का अनुसार ब्रेक फेल भएपछि गाडी अनियन्त्रित भई सडकको दायाँतर्फको भित्तामा ठोक्किएको थियो । गाडीमा चालकसहित ११ जना सवार रहेका थिए ।
दुर्घटनामा भारतको बिहार राज्य दरभङ्गाका ६० वर्षीय राम विनय झा, ७० वर्षीया निर्मला देवी, ५५ वर्षीया अनिता देवी, ५६ वर्षीया प्रज्ञा देवी, ५२ वर्षीया रुद्रकुमारी झा, ६७ वर्षीय हम्रानाथ झा, ७४ वर्षीय छत्रधर चौधरी, ६६ वर्षीय अमरनाथ झा, ४२ वर्षीया अनिता झा तथा धनुषाको लक्ष्मीनिया गाउँपालिका–४ का २२ वर्षीय असान साफी घाइते भएका छन् ।
प्रहरीका अनुसार गाडीमा नौ जना भारतीय नागरिक र दुई जना नेपाली नागरिक सवार थिए । चालक धनुषाको लक्ष्मीनिया गाउँपालिका–४ निवासी ३० वर्षीय पिन्टु सिंहसहित दुई जना नेपालीलाई सामान्य अवस्था रहेको जनाइएको छ । चालक सिंहलाई प्रहरीले नियन्त्रणमा लिएको छ ।
घाइतेमध्ये असान साफी उपचारपछि घर फर्किएका छन् भने अन्य भारतीय नागरिकको अल्का अस्पताल मा उपचार भइरहेको जिल्ला प्रहरी कार्यालय मकवानपुरले जनाएको छ ।
