सुर्खेत । कालिकोटको दुर्गम बस्तीमा बस्ने १८ वर्षीया जैपुरा विकका लागि मातृत्वको यात्रा निकै कष्टकर बन्यो। गर्भ बसेको जम्मा छ महिनामै उनले जुम्ल्याहा शिशुलाई जन्म दिइन्। समयअगावै सुत्केरी भएपछि उनको स्वास्थ्य अवस्था गम्भीर बन्दै गयो। अत्यधिक रक्तस्राव र अन्य जटिलता देखिएपछि स्थानीय स्वास्थ्य संस्थाले तत्काल उच्चस्तरीय उपचार आवश्यक रहेको निष्कर्ष निकाल्यो।
नरहरिनाथ गाउँपालिका–३, कालिकोटकी जैपुरालाई आइतबार राष्ट्रपति महिला उत्थान कार्यक्रमअन्तर्गत हेलिकोप्टरमार्फत प्रदेश अस्पताल सुर्खेत ल्याइएको छ। दुर्गम गाउँबाट जीवन रक्षाका लागि गरिएको यो उद्धारले ग्रामीण क्षेत्रमा अझै पनि सुरक्षित मातृत्व सेवा सहज रूपमा उपलब्ध हुन नसकेको यथार्थलाई उजागर गरेको छ।
जैपुराको परिवारका सदस्यहरूका अनुसार गर्भावस्थाको सुरुवातदेखि नै उनी नियमित स्वास्थ्य परीक्षण गराउन सहज अवस्थामा थिइनन्। गाउँबाट स्वास्थ्य संस्था पुग्न लामो पैदल यात्रा गर्नुपर्ने बाध्यता थियो। आवश्यक स्वास्थ्य सेवा र विशेषज्ञ चिकित्सकको पहुँच नहुँदा गर्भावस्थाको जोखिम समयमै पहिचान गर्न कठिन भएको स्थानीयहरू बताउँछन्।
