नेपालगन्ज ,असार १०। कृषि उत्पादन वृद्धि, गुणस्तरीय स्वास्थ्य सेवा, शिक्षा सुधार तथा भौतिक पूर्वाधार विकासलाई प्राथमिकतामा राख्दै नेपालगन्ज उपमहानगरपालिकाले आगामी आर्थिक वर्ष २०८३/०८४ का लागि १ अर्ब ७६ करोड ६४ लाख ८३ हजार रुपैयाँको बजेट सार्वजनिक गरेको छ।
उपमहानगरपालिकाको १९औँ नगरसभामा नगर प्रमुख प्रशान्त विष्टले बजेट तथा नीति कार्यक्रम प्रस्तुत गरेका हुन्। प्रस्तुत बजेटमा संघ र प्रदेश सरकारबाट प्राप्त हुने सशर्त, समपूरक तथा विशेष अनुदान गरी ७६ करोड ४८ लाख ५० हजार रुपैयाँ समावेश गरिएको छ।
उपमहानगरपालिकाले आगामी वर्ष आन्तरिक स्रोतबाट २५ करोड रुपैयाँ राजस्व संकलन गर्ने लक्ष्य राखेको छ भने घरजग्गा रजिष्ट्रेशन शुल्कबाट १४ करोड रुपैयाँ आम्दानी हुने अनुमान गरिएको छ।
बजेट विनियोजनअनुसार चालु खर्चतर्फ ४२ करोड २५ लाख ५० हजार रुपैयाँ छुट्याइएको छ। वडा कार्यालयमार्फत सञ्चालन हुने विकास तथा सेवा प्रवाहका कार्यक्रमका लागि २१ करोड रुपैयाँ विनियोजन गरिएको छ। यस्तै नगरस्तरीय तथा प्रवर्द्धनात्मक कार्यक्रमका लागि १९ करोड ९० लाख रुपैयाँ र विषयगत शाखाहरूका लागि ८ करोड ७६ लाख रुपैयाँ बजेट व्यवस्था गरिएको छ।
बजेटअघि प्रस्तुत गरिएको नीति तथा कार्यक्रममा कृषि तथा पशुपन्छी विकास, उद्योग, व्यापार तथा व्यवसाय प्रवर्द्धन, पर्यटन विकास, भूमि व्यवस्थापन तथा सहकारी क्षेत्रलाई विशेष प्राथमिकता दिइएको छ।
त्यस्तै श्रम, रोजगार तथा गरिबी निवारण, स्वास्थ्य तथा पोषण, आयुर्वेद, खानेपानी, शिक्षा, महिला तथा बालबालिका, सामाजिक समावेशीकरण तथा आवास विकाससम्बन्धी कार्यक्रमलाई समेत प्राथमिकताका साथ अघि बढाइने जनाइएको छ।
प्रमुख प्रशासकीय अधिकृत मानबहादुर बमका अनुसार आगामी वर्ष भौतिक पूर्वाधार निर्माण, यातायात व्यवस्थापन, विद्युत् तथा स्वच्छ ऊर्जा विस्तार, वन तथा वातावरण संरक्षण, फोहोरमैला तथा ढल व्यवस्थापन, विपद् व्यवस्थापन तथा जलवायु परिवर्तन अनुकूलनका कार्यक्रमहरू सञ्चालन गरिनेछन्।
त्यसैगरी सुशासन प्रवर्द्धन, सेवा प्रवाहमा सुधार, राजस्व तथा स्रोत परिचालन, तथ्यांक व्यवस्थापन, योजना निर्माण र विकास व्यवस्थापनलाई पनि आगामी आर्थिक वर्षका मुख्य प्राथमिकतामा राखिएको उपमहानगरपालिकाले जनाएको छ।
