डडेल्धुरा, फागुन ११ आगामी २१ फागुनमा हुने प्रतिनिधिसभा निर्वाचन नजिकिँदै गर्दा नेपाली कांग्रेससँगको सम्भावित एकता र आफ्नो निर्णायक भूमिका सुनिश्चित गर्न बीपी कांग्रेस डडेल्धुरामा सक्रिय भएको छ । जिल्लाभर मतदातासँग अन्तरसंवादमा जुटेको बीपी कांग्रेसले यसपटक उम्मेदवार नउठाइ जनमत संकलनमार्फत आगामी निर्वाचनमा कसलाई समर्थन गर्ने भन्ने निर्णय गर्ने तयारी गरेको हो ।
बीपी कांग्रेसका केन्द्रीय उपसभापति कर्णबहादुर मल्लसहितका नेताहरू शनिबार कांग्रेसका निवर्तमान सभापति शेबरहादुर देउवाको गृहपालिका गन्यापधुरामा पुगेका थिए । मल्लको नेतृत्वमा गएको टोली गन्यापधुराका विभिन्न गाउँ पुगेर मतदाताको राय संकलन गरिरहेको छ । टोली गन्यापधुरा गाउँपालिका–१ स्थित मटेला पुगेको थियो, जुन देउवाको जन्मघर हो । टोलीले देउवाको जन्मघर अगाडि फोटोसुटसमेत गरेको थियो ।
देउवाको जन्मघर हाल भग्नावशेष अवस्थामा रहेको छ । सशस्त्र द्वन्द्वकालमा तत्कालीन माओवादीले उक्त घरमा बम विस्फोट गरेको थियो । बीपी कांग्रेसले डडेल्धुरामा आफूलाई निर्णायक शक्ति भएको दाबी गर्दै मतदातासँग प्रत्यक्ष अन्तरसंवाद गर्न थालेको मल्लले बताए ।उक्त क्रममा मल्लले भने, ‘डडेल्धुरा कांग्रेसका सभापति र नेताहरूलाई भेला राख्न अनुरोध गरेका छौँ । त्यो भेलामा बीपी कांग्रेसका साथीहरूलाई पनि बोलाउन अनुरोध छ । हिजोका कुराको समीक्षा गरेर सहमति गरेर अगाडि बढ्न आह्वान गरेका छौँ ।’
मल्ल डडेल्धुराको कांग्रेसको दुई कार्यकाल सभापति भइसकेका नेता हुन् र लामो समय देउवाको सहकार्यमा काम गरेका थिए । तर, पार्टीको १४औँ महाधिवेशनमा क्रियाशील सदस्यता नवीकरण र वितरण विवादपछि मल्ललाई बाहिर राखेर जिल्ला अधिवेशन गरिएको थियो, जसले उनलाई देउवाविरोधी छवि दिएको थियो ।
२०७९ को प्रतिनिधिसभा निर्वाचनमा भने मल्लले देउवासँगै चुनाव लडेका थिए । देउवा २५ हजार ५३४ मतसहित विजयी भएका थिए भने बीपी कांग्रेसका मल्लले ७ हजार ५३५ मत पाएर तेस्रो स्थान हासिल गरेका थिए । यसपटक उम्मेदवार नहुँदा बीपी कांग्रेस र मल्लले कसलाई समर्थन गर्ने भन्ने कुरा डडेल्धुरामा सबैको ध्यान केन्द्रित भएको छ ।बीपी कांग्रेसको यो सक्रियता आगामी निर्वाचनमा पार्टीको रणनीति र स्थानीय तहमा आफ्नो प्रभाव सुनिश्चित गर्ने महत्वपूर्ण संकेतका रूपमा हेरिएको छ ।
