काठमाडौँ । फिफा विश्वकप २०२६ अन्तर्गत गएराति सम्पन्न समूह चरणका खेलमा पोर्चुगलले प्रभावशाली प्रदर्शन गर्दै उज्बेकिस्तानमाथि ५–० को फराकिलो जित निकालेको छ। कप्तान क्रिस्टियानो रोनाल्डोको दुई गोल प्रेरित जितसँगै पोर्चुगलले नकआउट चरण प्रवेशको सम्भावना थप बलियो बनाएको छ।
समूह ‘के’ अन्तर्गत भएको खेलमा रोनाल्डोले ६औँ र ३९औँ मिनेटमा गोल गर्दै टोलीलाई सहज अवस्थामा पुर्याए। नुनो मेन्डेसले १७औँ मिनेटमा गोल थपेका थिए। दोस्रो हाफमा उज्बेकिस्तानका ए. नेमाटोभबाट ६०औँ मिनेटमा आत्मघाती गोल भएपछि पोर्चुगलको अग्रता अझ फराकिलो बन्यो। खेलको ८७औँ मिनेटमा राफाएल लेआँओले गोल गर्दै पोर्चुगलको ५–० को शानदार जित सुनिश्चित गरे।
यता समूह ‘एल’ अन्तर्गत क्रोएसियाले पानामालाई १–० गोलले पराजित गर्दै नकआउट चरणको आशा जीवित राखेको छ। प्रतिस्पर्धात्मक खेलमा क्रोएसियाका आन्ते बुडिमिरले ५४औँ मिनेटमा गरेको एकमात्र गोल नै निर्णायक बन्यो। हारसँगै पानामामाथि भने अर्को चरण पुग्न थप दबाब बढेको छ।
यसै समूहको अर्को खेलमा इङ्ग्ल्यान्ड र घानाले गोलरहित बराबरी खेले। दुवै टोलीले गोल गर्ने अवसर सिर्जना गरे पनि त्यसलाई सदुपयोग गर्न नसक्दा खेल ०–० मै सकियो। बराबरीपछि दुवै टोलीले एक–एक अंक बाँडेका छन्।
इङ्ग्ल्यान्ड, घाना, क्रोएसिया र पानामा रहेको समूह ‘एल’ मा प्रतिस्पर्धा झन् रोमाञ्चक बनेको छ। इङ्ग्ल्यान्ड–घाना बराबरी र क्रोएसियाको जितपछि नकआउट चरणको समीकरण थप खुला बनेको छ।
