सोलुखुम्बु, भदौ २६ गते । सोलुखुम्बुको महाकुलुङ गाउँपालिकास्थित हुङ्गा खोलामा पहिरो खसेर खोलाको बहाव थुनिएपछि नदी तटीय क्षेत्रमा उच्च सतर्कता अपनाउन आग्रह गरिएको छ । पहिरोका कारण खोलामा करिब १०० मिटर लामो र १५ मिटर अग्लो अस्थायी ड्याम बनेपछि सम्भावित जोखिमलाई मध्यनजर गर्दै तटीय क्षेत्रका बस्ती तथा जलविद्युत् आयोजनालाई सतर्क गराइएको हो ।
भदौ २६ गते बिहान करिब ७ बजे महाकुलुङ गाउँपालिका–२ र ४ नम्बर वडाको सीमास्थित हुङ्गा खोलामा गौरीशंकर हाइड्रोपावरको हेड अफिसबाट करिब १०० मिटर तल वडा नं. २ तर्फ करिब ३५ मिटर अग्लो पहिरो खसेको जानकारी प्राप्त भएको थियो । पहिरो खोलामा खसेपछि पानी थुनिएर करिब १०० मिटर लामो र १५ मिटर अग्लो ड्याम बनेको प्रहरीले जनाएको छ ।
घटनाको जानकारी प्राप्त हुनासाथ इलाका प्रहरी कार्यालय सोताङ र प्रहरी चौकीबाट प्रहरी टोली घटनास्थलतर्फ परिचालन गरिएको थियो । प्रहरीले घटनास्थलको अवस्थाबारे जानकारी लिँदै सम्भावित जोखिमलाई मध्यनजर गरी नदी तटीय क्षेत्रमा रहेका बस्ती तथा जलविद्युत् आयोजनालाई सतर्क गराएको छ ।
प्रहरीले हुङ्गा खोलामा रहेका गौरीशंकर हाइड्रोपावरको पावर हाउस, दूधकोशी–२ हाइड्रोपावर नेपाल तथा सहास ऊर्जा लिमिटेडका दुई वटा जलविद्युत् आयोजनालाई घटनाबारे जानकारी गराएको छ । आयोजनामा कार्यरत कामदार तथा सवारीसाधनलाई समेत सुरक्षित स्थानतर्फ जान सूचित गरिएको प्रहरीले जनाएको छ ।
हुङ्गा खोलाको पानी महाकुलुङ गाउँपालिका–२ बोदेलमा थुनिएको स्थानबाट सोताङ, थुलुङ दूधकोशी र नेचासल्यान गाउँपालिका हुँदै दूधकोशी नदीमा मिसिन्छ । त्यसपछि उक्त नदी खोटाङ हुँदै ओखलढुंगातर्फ बग्ने भएकाले खोलाको बहावमा अचानक परिवर्तन आए तटीय क्षेत्रका बस्ती तथा संरचनामा जोखिम हुन सक्ने भन्दै सतर्कता अपनाइएको हो ।
बिहान करिब ९ः१० बजे पहिरोका कारण बनेको ड्याममा पानी भरिएपछि पानी निकास हुन थालेको प्रहरीले जनाएको छ । पानी निकास सुरु भए पनि ड्याम पूर्णरूपमा सुरक्षित रहेको अवस्था यकिन नभएकाले नदी तटीय क्षेत्रका बासिन्दालाई सतर्क रहन आग्रह गरिएको छ ।
घटनास्थलको अवस्था, खोलाको बहाव र सम्भावित जोखिमबारे प्रहरीले थप अनुगमन तथा विवरण संकलन गरिरहेको जनाएको छ
