घोराही, पुस २७ घोराही उपमहानगरपालिका–१४ मिलन चोकबाट अवैध लागूऔषध ब्राउन सुगर जस्तो देखिने पदार्थसहित दुई जनालाई प्रहरीले पक्राउ गरेको छ । पक्राउ परेकाहरूको साथबाट ४७ ग्राम ६ सय ७० मिलिग्राम ब्राउन सुगर जस्तो देखिने पदार्थ र नगद ८५ हजार ८ सय रुपैयाँ बरामद गरिएको प्रहरीले जनाएको छ ।
पक्राउ पर्नेमा घोराही उपमहानगरपालिका–१४ खोलीगाउँ बस्ने ३४ वर्षीय सुशील गहतराज र ३२ वर्षीय अम्मर वली रहेका छन् । अस्थायी प्रहरी पोष्ट घोराही बसपार्कबाट खटिएको प्रहरी टोलीले लु.८० प ६३११ नम्बरको मोटरसाइकलमा सवार उनीहरूलाई बिहीबार राति मिलन चोक क्षेत्रबाट नियन्त्रणमा लिएको हो ।
प्रहरीका अनुसार लागूऔषध कारोबारको आशंकामा चेकजाँच गर्ने क्रममा उनीहरूको साथबाट उक्त पदार्थ र नगद फेला परेको हो। घटनाबारे थप अनुसन्धान भइरहेको जिल्ला प्रहरी कार्यालयले जनाएको छ ।
