गुल्मी, पुस २० गुल्मी जिल्लामा थप ३० नयाँ प्रजातिका चरा फेला परेसँगै जिल्लामा हालसम्म अभिलेख गरिएका चरा प्रजातिको संख्या ३५५ पुगेको छ । नेपाल पन्छी संरक्षण संघ (बीसीएन) ले हालै गरेको चरा गणनाका क्रममा जिल्लाका विभिन्न वन संरक्षण क्षेत्रमा यसअघि अभिलेख नभएका ३० प्रजातिका चराहरू फेला परेका हुन् ।
नेपाल पन्छी संरक्षण संघ गुल्मीका परियोजना अधिकृत शम्भु भट्टराईका अनुसार रेसुंगा, मदाने र थाप्ले सत्यवती वन संरक्षण क्षेत्रमा गरिएको सर्वेक्षणमा नयाँ प्रजातिका चराहरू रेकर्ड भएका छन् । भट्टराईका अनुसार पछिल्लो सर्वेक्षणमा रेसुंगा, मदाने र थाप्ले सत्यवती वन संरक्षण क्षेत्रमा मात्र २५ प्रजातिका चरा नयाँ रूपमा अभिलेख गरिएका छन् । यसअघि रेसुंगा र मदाने वन संरक्षण क्षेत्रमा वर्षमा दुई पटक नियमित रूपमा चरा सर्वेक्षण हुँदै आएकोमा यस वर्ष पहिलो पटक थाप्ले सत्यवती वन संरक्षण क्षेत्रमा पनि औपचारिक सर्वेक्षण गरिएको हो ।
नयाँ फेला परेका चरा प्रजातिहरूमा तिलहरी, मोटो ठूँडे पुष्प कोकिला, उमाचाँचर, तिबिल्चे, मुरालिडे ढिकुरे भ्याकुर, निलो लघुपङ्ख, हटचुर चाँचर, हलीमुख, सिम कुखुरालगायतका प्रजाति रहेका छन् । विश्वमा दुर्लभ मानिने चराहरूमध्ये गुल्मीमा छ प्रजाति पाइने गरेको संघले जनाएको छ । तीमध्ये रेसुंगा वन संरक्षण क्षेत्रमा चिरकालीज, रणमत्त महाचिल, डङ्गर गिद्ध, सेतो गिद्ध, सुन गिद्ध र गोमायो महाचिल पाइन्छन् । काँडे भ्याकुर भने रेसुंगा, मदाने र थाप्ले सत्यवती तीनवटै वन क्षेत्रमा रेकर्ड गरिएको छ ।
नेपालमा हालसम्म ९०३ प्रजातिका चरा पाइने गरेको तथ्यांक रहेको छ । तीमध्ये करिब ४० प्रतिशत चरा प्रजाति गुल्मी जिल्लामा पाइने नेपाल पन्छी संरक्षण संघले जनाएको छ । संघका अनुसार रेसुंगा वन क्षेत्रमा २७६, मदाने वन संरक्षण क्षेत्रमा २८९ र थाप्ले सत्यवती वन संरक्षण क्षेत्रमा १९६ प्रजातिका चरा अभिलेख भएका छन् । तीनवटै क्षेत्रको संयुक्त तथ्यांकअनुसार जिल्लामा कुल ३५५ प्रजातिका चराहरूको अभिलेख तयार भएको हो ।
संघले वन क्षेत्रसँग जोडिएका स्थानीयवासीलाई वन तथा जैविक विविधताको संरक्षणसँगै जीविकोपार्जनमा सहयोग पुग्ने कार्यक्रमहरू सञ्चालन गर्दै आएको जनाएको छ । रेसुंगा नगरपालिकाका प्रमुख खिलध्वज पन्थीले जिल्लामा चरा पर्यटनको प्रचुर सम्भावना रहेको बताउँदै यसलाई स्थानीय अर्थतन्त्रसँग जोड्न सकिने उल्लेख गरे ।
