रुकुम, माघ ४ नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले आउँदो २१ फागुनमा हुने प्रतिनिधिसभा निर्वाचनमा पूर्वी रुकुमबाट उम्मेदवारी दिने घोषणा गरेका छन् । २६ पुसमा रुकुम पश्चिमको मुसिकोटमा आयोजित एकता सन्देशसभालाई सम्बोधन गर्दै प्रचण्डले पूर्वी रुकुमबाट चुनाव लड्ने लगभग निश्चित भएको बताएका हुन् ।उनले विकास र जनताका अपेक्षा पूरा गर्न आफू पूर्वी रुकुमबाट चुनावी मैदानमा उत्रन लागेको उल्लेख गर्दै रुकुमलाई राजनीतिक रूपमा एउटै एकाइका रूपमा हेर्न आग्रह गरे । प्रचण्डको यो घोषणासँगै पूर्वी रुकुमको चुनावी राजनीति थप चासोको विषय बनेको छ ।
यस निर्वाचनमा प्रचण्डको प्रतिद्वन्द्वीका रूपमा ‘जनयुद्ध’का सहिद सूर्यप्रकाश पुन ‘सुन्दर’ र परम्परा गौतम ‘वृक्ष’का छोरा सन्दीप पुन मैदानमा उत्रिने भएका छन् । प्रगतिशील लोकतान्त्रिक पार्टी (प्रलोपा)बाट उम्मेदवार बन्ने तयारीमा रहेका सन्दीपले यसअघि नै चुनाव लड्ने घोषणा गरिसकेका छन् ।२०५४ सालमा ‘जनयुद्ध’कै क्रममा जन्मिएका सन्दीप सहिद तथा बेपत्ता योद्धा सन्तति फाउन्डेसनका अध्यक्षसमेत हुन् । उनका बुबाआमाको जनवादी विवाह २०५३ सालमा भएको थियो भने २०५९ सालमा बझाङमा उनीहरू दुवैको हत्या भएको थियो । ‘जनयुद्ध’का सुप्रिम कमान्डर प्रचण्ड र त्यही द्वन्द्वमा ज्यान गुमाएका सहिदका छोराबीच हुने प्रतिस्पर्धाले यस चुनावलाई प्रतीकात्मक र राजनीतिक रूपमा संवेदनशील बनाएको छ ।
सन्दीपले आफू लामो समयदेखि चुनावको तयारीमा रहेको र जिल्लाका सबै वडामा पुगेर जनसम्पर्क गरिसकेको बताउँछन् । ‘सहिदको छोरा हुँ भन्ने पहिचानभन्दा पनि युवाको प्रतिनिधित्व र परिवर्तनको एजेन्डा लिएर चुनाव लड्दैछु,’ उनले भने । प्रलोपाले नेपाली कांग्रेस र नेकपा एमालेसँग सम्भावित चुनावी गठबन्धनबारे छलफल गरिरहेको पनि सन्दीपको दाबी छ ।
पूर्वी रुकुम माओवादीको परम्परागत आधार क्षेत्र मानिन्छ । २०७९ सालको निर्वाचनमा यहाँ माओवादी केन्द्रका उम्मेदवार विजयी भएका थिए । हाल जिल्लामा ३४ हजार ७ सय ७२ मतदाता छन् । जनयुद्धको इतिहास, सहिदको भावना र नयाँ पुस्ताको राजनीतिक आकांक्षा मिसिएको यस प्रतिस्पर्धाले पूर्वी रुकुमको चुनावलाई निकै रोचक बनाउने देखिन्छ ।
