गुल्मी, फागुन ११ यहाँ गुल्मी क्षेत्र नम्बर १ को निर्वाचनमा परम्परागत “आलोपालो” समीकरण चुनौतीपूर्ण मोडमा पुगेको छ । विगतका निर्वाचनमा कांग्रेसका चन्द्र भण्डारी र एमालेका प्रदीप ज्ञवालीले लगातार आलोपालो निर्वाचित हुँदै आएका थिए भने यसपटक नयाँ प्रतिस्पर्धी दल र उम्मेदवारले समीकरण परिवर्तन गर्ने सम्भावना देखिएको छ ।गुल्मी–१ मा एमालेका ज्ञवाली २०५६ सालमा कांग्रेसका चन्द्रबहादुर केसीलाई पराजित गर्दै संघीय संसदमा प्रवेश गरेका थिए । त्यसयता २०६४ देखि २०७९ सम्म कांग्रेसबाट भण्डारी र एमालेबाट ज्ञवालीले पालैपालो निर्वाचन जित्दै आलोपालोको परम्परा कायम राखेका थिए । २०७४ मा बाम गठबन्धन र २०७९ मा पाँचदलीय गठबन्धन हुँदा पनि क्रमशः ज्ञवाली र भण्डारीले गठबन्धनको साथ पाएको थियो ।
यसपटक नेपाली कम्युनिस्ट पार्टी (नेकपा) का सुदर्शन बराल र राष्ट्रिय स्वतन्त्र पार्टी (रास्वपा) का सागर ढकाल पनि गुल्मी–१ बाट प्रतिस्पर्धा गरिरहेका छन् । नेकपाका नेतृ गीता थापाका अनुसार, बरालको मन्त्री हुँदै गरेको अनुभव, कामको छवि र पार्टी संरचना बलियो भएकाले यसपटक नेकपाले समीकरणमा ब्रेक ल्याउने सम्भावना छ । बरालले १२ वर्षपछि आफ्नै चुनाव चिन्ह ‘आफ्नै’मा मतदान पाउनु उत्साहजनक भएको उनले उल्लेख गरिन् ।
रास्वपाका नेता भोजराज पाण्डेले ढकालले पुराना दलहरूको विरासत तोडेर विजयी हुने दाबी गरे । पाण्डेले भने, ‘निरन्तर घरदैलो, भेटघाट र टोलभेलामा ध्यान दिँदै आएका छौं । पुराना दलहरूप्रतिको वितृष्णा र भ्रष्टाचारमुक्त समाज निर्माणमा हाम्रो पहल ढकालको पक्षमा जानेछ ।’ ढकाल गत निर्वाचनमा डडेलधुरामा शेरबहादुर देउवाविरुद्ध प्रतिस्पर्धा गरिसकेको थिए ।
तर परम्परागत दलहरू पनि मौन छैनन् । एमालेका केन्द्रीय सदस्य जंग नेपालीले भने, ‘आलोपालोको अवधारणा कायम रहनेछ । ज्ञवालीले यसपटक सहज जीत पाउनेछन् ।’ कांग्रेसका जिल्ला सह–सचिव छवि पाण्डेले भने, ‘चन्द्र भण्डारीको राष्ट्रिय राजनीतिमा प्रभाव र जेनजी आन्दोलनपछिको नेतृत्व परिवर्तनले कार्यकर्तामा उत्साह जगाएको छ, जसले उनको जीत सुनिश्चित गर्नेछ ।’
यसरी गुल्मी–१ को निर्वाचनमा आलोपालोको परम्परा चुनौतीपूर्ण मोडमा पुगेको छ । पुराना दलका अनुभवी उम्मेदवार, गठबन्धन प्रभाव, नयाँ दलका सक्रिय उम्मेदवार र मतदाताको नयाँ मानसिकताबीच प्रतिस्पर्धा कसको पक्षमा झुक्छ भन्ने प्रत्याशा उत्तेजक बनेको छ । यसपटकको निर्वाचनले गुल्मी–१ को आलोपालो अवधारणामा नयाँ मोड ल्याउने सम्भावना प्रबल देखिन्छ ।
