दाङमा आफ्नो गढ जोगाउन कांग्रेसलाई सकस, क्षेत्र नम्बर २ मा एमाले महासचिव पोखरेललाई रास्वपा सहमहामन्त्री आचार्यको चुनौती ।
दाङ, फागुन १२ लुम्बिनी प्रदेशको राजधानीसमेत रहेको दाङ विगतमा कांग्रेसको गढ मानिन्थ्यो । दिवंगत खुमबहादुर खड्काले दाङमा कांग्रेसको संगठनलाई माथि उठाएका थिए । पुरानो पुस्ताले खुमबहादुरलाई अहिले पनि सम्झिन्छन् । तर, त्यो साख कांग्रेसले जोगाउन सकेको छैन । आफ्नो गढ जोगाउन नसक्दा कहिले एमाले त, कहिल्यै पूर्वमाओवादीले दाङ जिल्लामा आफ्नो वर्चस्व देखाउँदै आएको छ । ०४८, ०५१, ०५६ र ०७० मा दाङमा कांग्रेसले एकलौटी राज गरेको थियो । तर, ०६४ मा तत्कालीन माओवादीको एकलौटी राज भएको थियो । ०७४ मा एमाले–माओवादी गठबन्धनले कांग्रेसलाई ‘क्लिन स्विप’ गरेका थिए । ०७९ मा माओवादी–कांग्रेस गठबन्धनले एमालेलाई ‘क्लिन स्विप’ बनाएको थियो । जिल्लामा पटक–पटक आफ्नो वर्चस्व कायम गरेको कांग्रेसलाई भने यसपटक चुनौतीको चाङ रहेको खबर नयाँ पत्रिकाले प्रकाशन गरेको छ ।
दाङ १ मा सजिलो छैन मेटमणिलाई ‘ह्याट्रिक’ जित
नयाँ पत्रिकाका अनुसार दाङ १ बाट पछिल्लो दुईवटा निर्वाचनमा नेपाली कम्युनिस्ट पार्टीका मेटमणि चौधरीले जित्दै आएका छन् । ०७४ मा तत्कालीन माओवादीसहितको गठबन्धनबाट उनले कांग्रेसकी सुशीला चौधरीलाई पराजित गरेका थिए । त्यतिवेला उनी एमलेमा थिए । ०७९ मा एमाले फुटेर एकीकृत समाजवादीबाट उम्मेदवार बनेका उनले कांग्रेस र माओवादी गठबन्धनमा जित हात पारेका थिए । यसपटक उनी ह्याट्रिक जितको खोजीमा छन् । तर, उनलाई रोक्न लुम्बिनीका पूर्वमुख्यमन्त्री कुलप्रसाद केसी बागी उम्मेदवारका रूपमा छन् । देउखुरीमा लुम्बिनीको स्थायी राजधानीका प्रशासनिक संरचना ल्याउन उनले भूमिका खेलेका थिए । पूर्वमाओवादी नेतासमेत भएकाले तत्कालीन पार्टीका केही मत उनले काट्न सक्ने अनुमान गरिएको छ ।
यो क्षेत्रमा कांग्रेस सहमहामन्त्री योगेन्द्र चौधरी, एमालेबाट रेवतीरमण शर्मा, राष्ट्रिय स्वतन्त्र पार्टीबाट देवराज पाठकसहित १४ उम्मेदवार चुनावी मैदानमा छन् । कांग्रेसका चौधरी ०७० मा तत्कालीन मधेशी जनअधिकार फोरमबाट समानुपातिक सांसद थिए । एमालेका शर्मा ०७४ मा प्रदेश सभा सदस्य थिए । रास्वपाका पाठक ०७९ को निर्वाचनमा पनि उम्मेदवार थिए ।०७९ को निर्वाचनमा समानुपातिकतर्फ दाङ १ बाट एमालेले १७ हजार ९६९, कांग्रेसले १५ हजार ६७, नेकपा १४ हजार ६७० (तत्कालीन माओवादी र एकीकृत समाजवादी), राष्ट्रिय स्वतन्त्र पार्टीले ११ हजार ४१० र नागरिक उन्मुक्ति पार्टीले सात हजार १७९ मत ल्याएका थिए ।
दाङ २ मा एमाले महासचिव पोखरेललाई रास्वपाको चुनौती
दाङ २ यसपटक हटसिट चुनावी क्षेत्र मानिएको छ । एमाले महासचिव शंकर पोखरेल उठेकाले पनि यो क्षेत्र चर्चामा आएको हो । पोखरेलले सधैँ ‘लो प्रोफाइल’का नेतासँग हार व्यहोर्दै आएका छन् । उनी प्रत्यक्ष जितेर संघीय संसद्मा गएको एकपटक मात्रै हो । ०५१ मा तत्कालीन दाङ ३ बाट कांग्रेसका दीपक गिरीलाई हराएर संघीय संसद्मा गएका थिए । त्यतिवेला एमालेबाट चुनाव जित्ने उनी मात्रै हुन् । अन्य तीन क्षेत्रमा कांग्रेसले नै जितेको थियो । त्यसपछिका प्रायः निर्वाचनमा उनले हार व्यहोरेका छन् । ०५६ को चुनावमा कांग्रेसका कृष्णकिशोर घिमिरेसँग हार व्यहोरे । ०६४ को निर्वाचनमा उनी समानुपातिकबाट सांसद बने ।
०७० को निर्वाचनमा दाङ ४ बाट कांग्रेसका बुद्धिराम भण्डारीसँग पराजित भए । उनी ०७४ मा प्रदेशमा चुनाव जितेर लुम्बिनी प्रदेशको मुख्यमन्त्री बने । ०७९ को निर्वाचनमा पुनः उनले तत्कालीन माओवादी नेतृ रेखा शर्मासँग १९३ मतान्तरले हार व्यहोरे । अहिले रास्वपाका सहमहामन्त्री विपिनकुमार आचार्य तगारो बनेका छन् । यो क्षेत्रमा कांग्रेसका किरणकिशोर घिमिरे, नेपाली कम्युनिस्ट पार्टीका निर्मल आचार्यसहित २३ जना चुनावी मैदानमा छन् । घिमिरे पहिलोपटक निर्वाचनमा होमिएका हुन् । आचार्य ०७० को संविधानसभा सदस्य उम्मेदवार थिए । रास्वपाका विपिनकुमार पनि पहिलोपटक चुनाव लड्दै छन् ।०७९ को समानुपातिक मततर्फ एमालेले २३ हजार ५६८, कांग्रेसले १९ हजार ५९१, राष्ट्रिय स्वतन्त्र पार्टीले १३ हजार ३३ र नेकपा ११ हजार ६०२ (तत्कालीन माओवादी र एकीकृत समाजवादी) मत पाएका थिए ।
दाङ ३ मा नयाँ अनुहारसँग प्रतिस्पर्धा गर्दै कांग्रेसका गिरी
दाङ ३ मा ६ पटक चुनाव लड्ने नेता हुन् कांग्रेसका दीपक गिरी । ६ पटक चुनाव लडे पनि उनले दुईपटक मात्रै जित निकालेका छन् । ०७० र ०७९ मा मात्रै उनले जित निकालेका छन् । उनले ०७० मा एमालेका उत्तरकुमार वली र ०७९ मा एमालेकै कोमल वलीलाई पराजित गरे । ०५१ मा तत्कालीन दाङ ३ बाट एमाले नेता शंकर पोखरेलसँग हार व्यहोरेका गिरीले ०५६ मा निर्वाचन लडेनन् । उनको ठाउँमा गेहेन्द्र गिरी उम्मेदवार बने र जिते । ०६४ मा दीपक दाङ ५ बाट माओवादीको सुुष्मा शर्मा घिमिरेसँग पराजित भए । ०७४ मा एमालेका हिराचन्द्र केसीसँग पराजित भए ।
पटक–पटक हार व्यहोर्दै आएका गिरीले अहिले नयाँ अनुहारसँग प्रतिस्पर्धा गर्दै छन् । एमालेका घनश्याम पाण्डे र नेपाली कम्युनिस्ट पार्टीका धनबहादुर मास्की पहिलोपटक संघीय संसद्मा चुनाव लड्दै छन् । मास्की यसअघि लुम्बिनी प्रदेश सभा सदस्य थिए । पाण्डे यसअघि तुलसीपुर उपमहानगरपालिकाका प्रमुख थिए । कांग्रेसका खुमबहादुर खड्काले ०४८ र ०५१ तथा ०५६ मा कांग्रेसकै गेहेन्द्र गिरीले जित निकालेको क्षेत्र हो यो । राष्ट्रिय स्वतन्त्र पार्टीका कमल सुवेदीले भने यसअघिको निर्वाचनमा गिरीसँग प्रतिस्पर्धामा थिए ।
०७९ को समानुपातिक मतपरिणामअनुसार कांग्रेसले २६ हजार ५७५, एमालेले २६ हजार ११७, राष्ट्रिय स्वतन्त्र पार्टीले १४ हजार ४१० र नेकपाले ११ हजार ६१७ (तत्कालीन माओवादी र एकीकृत समाजवादी) मत पाएका थिए ।
अर्जुन योगी, सचिव, कांग्रेस दाङ
विशेष महाधिवेशनले आमनेता तथा कार्यकर्तामा उत्साह ल्याएको छ, त्यसको प्रभाव दाङको निर्वाचनमा पर्छ । दाङ विगतदेखि नै कांग्रेसको बलियो क्षेत्र पनि हो । विगतजस्तो अन्तरविरोध पनि छैन । गुट–उपगुट पनि छैन । त्यसले गर्दा जिल्लामा सहजै निर्वाचन जित्न सक्छौँ ।
शिवकुमार आचार्य, अध्यक्ष, एमाले दाङ
हाम्रो जित्ने आधार भनेको जनता हो । जनताले एमालेबारे बुझिसक्नुभएको छ । त्यसैले पनि एमालेले दाङका तीनवटै निर्वाचन क्षेत्रमा जित निकाल्न सक्छ । हामी जनताको निर्णयलाई नै अन्तिम मान्छौँ । देश बनाउने र जलाउनेको लडाइँ हो यो ।
हरिमान पुन, अध्यक्ष, नेकपा दाङ
दाङमा समावेशी र नयाँ उम्मेदवार बनाएका छौँ । दाङ थारूबाहुल्य भएको क्षेत्र भएकाले १ नम्बरमा चौधरी समुदायका मेटमणि चौधरीलाई उम्मेदवार बनाएका छौँ । २ र ३ मा नयाँ उम्मेदवार उठाएका छौँ । यसको प्रभाव चुनावमा सकारात्मक पर्छ भन्ने विश्वास छ ।
विनय घिमिरे, सभापति, रास्वपा दाङ
दाङमा रास्वपाको संगठन विगतमा राम्रै बनेको थियो । यसपटक सयवटै वडामा पुग्दा जनताले रास्वपा रुचाएका छन् । जनताले मत परिवर्तन खोजिरहेका छन् । त्यसले गर्दा पनि जित्न सक्ने आधार बनेको छ । अहिले हाम्रो पार्टीको लहर आएको छ ।
०४८ को निर्वाचनदेखि टरिगाउँ एयरपोर्ट चुनावी एजेन्डा
दाङका हरेक निर्वाचनमा लाग्ने एउटा चुनावी मुद्दा हो टरिगाउँ विमानस्थल । जुन विमानस्थलको स्तरोन्नतिका लागि २ र ३ नम्बर क्षेत्रका उम्मेदवारले हरेक निर्वाचनमा मुख्य एजेन्डा बनाउने गर्छन् । ०४८ पछि भएका हरेक निर्वाचनमा टरिगाउँ विमानस्थल स्तरवृद्धि गर्ने प्रतिबद्धता दिने गरिन्छ । संघीय, प्रदेश र स्थानीय तहको निर्वाचन नै किन नहोस्, हरेक वर्ष एजेन्डा बने पनि स्तरवृद्धि भने हुन नसकेको नागरिक समाज दाङका पूर्वअध्यक्ष टीकाराम रेग्मी बताउँछन् ।
‘०४८ देखि चुनावी मुद्दा बन्ने गरेको छ, तर न त त्यसको स्तरवृद्धि भएको छ, न त सार्थक पहलकदमी नै हुने गरेको छ,’ उनले भने, ‘जसले गर्दा यो एयरपोर्ट ओझेलमा पर्ने गरेको छ ।’ अहिले यो विमानस्थलमा नियमित उडान छैन । धावनमार्ग सानो छ । ०११ मा स्थापना भएको विमानस्थलको लम्बाइ ७५० मिटर मात्रै छ । त्यसलाई स्तरवृद्धि गरेर १५ सय मिटर बनाउन सके ७२ सिटे जहाज बस्न सक्छ । हाल १९ सिटे ट्विनेटर जहाज मात्रै अवतरण गर्ने गर्छन् ।
एमाले महासचिव शंकर पोखरेलले अहिले यो नारालाई प्राथमिकता दिएका छन् । उनी दाङ २ बाट प्रतिनिधिसभा सदस्यका उम्मेदवार हुन् । कांग्रेसबाट दाङ ३ का उम्मेदवार दीपक गिरीले पनि यो मुद्दा उठाएका छन् । एमालेबाटै दाङ ३ मा उम्मेदवार घनश्याम पाण्डेले पनि टरिगाउँ एयरपोर्टलाई व्यवस्थित बनाउने बताए । नेपाली कम्युनिस्ट पार्टीबाट उम्मेदवार धनबहादुर मास्कीले टरिगाउँ एयरपोर्ट विस्तार गर्ने कुरालाई एजेन्डा बनाएका छन् । रास्वपाका उम्मेदवार कमल सुवेदीसहित अन्य उम्मेदवारहरूले पनि एयरपोर्ट विस्तार गर्ने कुरालाई नै मुख्य एजेन्डा बनाएका छन् । अहिले टरिगाउँ विमानस्थलमा हावा लाग्दा होस् वा हुस्सु लाग्दा जहाज अवतरण हुँदैन । यो खबर नयाँ पत्रिकामा प्रकाशित छ ।
