वाशुलिङ (बैतडी), चैत २, बैतडीमा हावाहुरी र वर्षासँगै परेको चट्याङका कारण चार वटा पशुचौपायाको मृत्यु भएको छ।
जिल्लाको पाटन नगरपालिका–१० बन्तडमा गएराति करिब १० बजेतिर चट्याङ पर्दा स्थानीय धर्मानन्द भट्ट र नारायणदत्त भट्टका पशुचौपायामा क्षति पुगेको हो। स्थानीय केशवदत्त भट्टका अनुसार चट्याङ लागेर धर्मानन्द भट्टका दुई वटा बाख्रा मरेका छन् भने नारायणदत्त भट्टका एक गाई र एक गोरुको पनि मृत्यु भएको छ।
अचानक परेको चट्याङले पशुचौपाया मरेपछि सम्बन्धित परिवारलाई आर्थिक क्षति पुगेको छ। ग्रामीण क्षेत्रमा पशुपालन नै आम्दानीको मुख्य स्रोत भएकाले यस्तो क्षतिले स्थानीयवासी थप चिन्तित बनेका छन्।
स्थानीयवासीका अनुसार उक्त क्षेत्रमा वर्षायाम तथा हावाहुरीका समयमा पटक–पटक चट्याङ पर्ने समस्या रहेको छ। यसअघि पनि चट्याङका कारण पशुचौपायामा क्षति पुगेका घटना भएको उनीहरूले बताएका छन्।
घटनाबारे जानकारी प्राप्त भएको पुष्टि गर्दै जिल्ला प्रहरी कार्यालय बैतडीले क्षतिको विवरण संकलन तथा आवश्यक अनुसन्धान भइरहेको जनाएको छ।
स्थानीय बासिन्दाले चट्याङबाट हुने जोखिम न्यूनीकरणका लागि सम्बन्धित निकायले जनचेतना कार्यक्रम, सुरक्षात्मक उपाय तथा आवश्यक पूर्वतयारीमा ध्यान दिनुपर्ने माग गरेका छन्।
