काठमाडौं,चैत ०५ गते पूर्वराष्ट्रपति विद्यादेवी भण्डारी ले नेकपा एमालेका सचिव भानुभक्त ढकाल सहित पार्टीका जनसंगठन संयन्त्रसँग समसामयिक राजनीतिक अवस्था र पार्टीगत गतिविधिबारे विस्तृत छलफल गरेकी छन् ।
पछिल्लो राजनीतिक परिवेश, दलभित्रको सक्रियता तथा आगामी रणनीतिका विषयमा चासो व्यक्त गर्दै भण्डारीले सचिव ढकालसँग विभिन्न जिज्ञासा राखेकी थिइन् । छलफलका क्रममा देशको समग्र राजनीतिक दिशा, एमालेको भूमिका र जनतासँगको सम्बन्ध सुदृढ गर्ने विषयमा समेत कुराकानी भएको स्रोतले जनाएको छ ।
त्यसैगरी, मदन भण्डारी फाउण्डेशन का पदाधिकारीहरू तथा विभिन्न जनसंगठनका प्रमुखहरूसँग पनि उनले छुट्टै बैठक गर्दै आगामी असार १४ गते मनाइने मदन भण्डारी हिरक जयन्तीको तयारीबारे छलफल गरेकी छन् । उक्त अवसरलाई भव्य र व्यवस्थित रूपमा सम्पन्न गर्न आवश्यक तयारी, कार्यक्रमको स्वरूप तथा सहभागीता बढाउने उपायबारे विस्तृत छलफल भएको जनाइएको छ ।
छलफलका क्रममा भण्डारीले हिरक जयन्तीलाई केवल औपचारिक कार्यक्रममा सीमित नगरी विचार, सिद्धान्त र राजनीतिक दर्शनलाई पुनः स्मरण गराउने अवसरका रूपमा लिनुपर्नेमा जोड दिएकी थिइन् । साथै, कार्यक्रमलाई देशव्यापी रूपमा प्रभावकारी बनाउन विभिन्न तहका जनसंगठनलाई सक्रिय रूपमा परिचालन गर्नुपर्ने धारणा पनि उनले व्यक्त गरेकी छन् ।
