नेपालगन्ज: नेपाली कम्युनिष्ट पार्टी बाँकेले बिहिवार नेपालगन्जमा एकता सन्देश सभा गर्दैछ । त्रिभुवन चौकमा आयोजना गरिने एकता सन्देश सभाको प्रचारप्रसारका लागि ८१ वटै वडाहरूमा संयुक्त बैठक गरेर प्रचारप्रसारका काम तीब्र पारिएको नेता नरेन्द्र पाण्डे जेम्सले बताए । उनले पालिका स्तर र वडा स्तरमा संयुक्त बैठक बसी प्रचारप्रसारको कामलाई तीव्रता दिइएको जानकारी दिए ।
कार्यक्रमलाई भव्य बनाउनका लागि बिभिन्न उपसमितिहरू गठन गरिएको समेत पाण्डेले बताए । पार्टीका सह-संयोजक तथा पूर्व प्रधानमन्त्री माधव कुमार नेपाल प्रमुख वक्ता रहेको कार्यक्रममा नेताहरू शक्ति बहादुर बस्नेत, कर्णजित बुढाथोकी लगायत पनि सहभागी हुने नेता दीपक जिएमले जानकारी दिए ।
