दाङ, पुस २० थारू समुदायको मौलिक कला, संस्कृति, भेषभूषा र परम्पराको संरक्षण तथा प्रवद्र्धन गर्ने उद्देश्यले आयोजना गरिएको माघ सांस्कृतिक महोत्सवको उद्घाटनपूर्व घोराहीमा भव्य बजार परिक्रमा गरिएको छ ।
थारू समुदायका महिला तथा पुरुषहरू आफ्नो मौलिक भेषभूषामा सजिएर ढकिया, डेल्वा, माटोको गाग्री, भौकाभौकी, हलो–जुवा लगायत पहिचान झल्काउने सामग्री बोकी बाजागाजासहित बजार परिक्रमामा सहभागी भएका थिए । परिक्रमाले थारू समुदायको मौलिक जीवनशैली, कला र संस्कृतिलाई जीवन्त रूपमा प्रस्तुत गरेको थियो ।
‘आर्थिक जागरण व सांस्कृतिक रूपान्तरण हमार अभियान, सामाजिक न्यायसहितके समृद्धिम हमार योगदान’ भन्ने मूल नाराका साथ आयोजना हुन लागेको महोत्सवको प्रचार–प्रसारका लागि उद्घाटनअघि घोराहीका मुख्य बजार क्षेत्रमा बजार परिक्रमा गरिएको महोत्सव मूल आयोजक समितिका संयोजक एवं थारू कल्याणकारिणी सभाका अध्यक्ष अशोक चौधरीले जानकारी दिए ।
बजार परिक्रमापछि सहभागीहरू महोत्सव स्थलमा पुगेर कार्यक्रमको औपचारिक उद्घाटन गरिने आयोजकले जनाएको छ । घोराहीस्थित जिल्ला समन्वय समितिको प्राङ्गणमा आयोजना हुन लागेको महोत्सवको उद्घाटन लुम्बिनी प्रदेशका मुख्यमन्त्री चेतनारायण चौधरीले गर्ने कार्यक्रम रहेको छ ।
महोत्सवमा सात दर्जनभन्दा बढी मघौटा नाच, छोक्रा, हुर्डुङया, ढुम्रु गीत लगायत विविध सांस्कृतिक प्रस्तुति रहनेछन् । साथै घोंघी, माछा, गंगटा, ढिक्री, अनडीको रोटी, अनडीको भात, अनडीको झोल, आलुको अचार, सिध्र माछा जस्ता परम्परागत थारू परिकारहरूको बिक्री तथा वितरणको व्यवस्था गरिएको छ ।
त्यसैगरी थारू इतिहास, भाषा, साहित्य र संस्कृतिसँग सम्बन्धित पुस्तकहरूको प्रदर्शनी तथा बिक्री पनि महोत्सवको आकर्षणका रूपमा रहने आयोजकले जनाएको छ ।
