दाङ, माघ २६ जिल्लामा ७० प्रतिशत नागरिकको घरधुरीमा पाइपलाइनमार्फत खानेपानीको सेवा पुगेको छ । खानेपानी तथा सरसफाइ कार्यालय दाङका अनुसार हाल ७०.२९ प्रतिशत घरधुरीले नियमित पाइपलाइनको सुविधा पाएका छन् । तर करिब २९ प्रतिशत नागरिक अझै पनि खोलाखोरी, इनार वा जरुवा पिउने पानीमा निर्भर छन् ।कार्यालयको चालु आर्थिक वर्ष २०८२/८३ को पहिलो ६ महिनाको तथ्यांकअनुसार बंगलाचुली गाउँपालिकाका ५,१३९ घरधुरीमध्ये २,६७४ घरधुरीमा मात्र पाइपलाइन सेवा पुगेको छ । घोराही उपमहानगरपालिकामा ४९,७६१ घरधुरीमध्ये ३३,१६० (६६.६४) घरधुरीले पाइपलाइनको सुविधा पाएका छन् भने तुलसीपुर उपमहानगरपालिकामा ४६,०१८ घरधुरीमध्ये ३३,०५१ (७१.८२%) घरधुरीलाई सेवा पुगेको छ ।
दंगीशरण गाउँपालिकामा ७९.७४%, शान्तिनगर गाउँपालिकामा ८८.७३%, बबई गाउँपालिकामा ७३.१९%, राप्ती गाउँपालिकामा ६४.९४% र गढवा गाउँपालिकामा ६४.५२% घरधुरीले पाइपलाइनमार्फत खानेपानी पाएका छन् । राजपुर गाउँपालिकामा मात्र २२.६५% घरधुरीले सेवा पाएका छन् ।
कार्यालयले जनाएको छ, पर्याप्त बजेट नपाइएका कारण कतिपय आयोजना समयमै पूरा गर्न नसकिने समस्या छ । निर्माण कार्यमा जनश्रमदान समयमा परिचालन, मर्मतकोष अभाव, स्मार्ट मिटर र विद्युत् उपलब्ध नहुनु, ह्याण्ड पम्प वितरण कम, सडक विस्तारले पाइपलाइन क्षति, लागत अनुमान सही नहुनु, दोहोरो काम गर्नुपर्ने चुनौती देखिएका छन् ।पानी मुहानको समाप्ति, दोहोरो आयोजना, स्थानीय र संघीय सरकारबीच समन्वयको कमी, अनावश्यक स्थानमा संरचना निर्माण, र उपभोक्ताको चासो नहुनु पनि चुनौतीका रूपमा उल्लेख छन् ।
भविष्यका योजनामा मागअनुसार आयोजना प्राथमिकता दिने, समयसीमा निर्धारण, बजेट व्यवस्थापन, पानी स्रोत संरक्षण, दीर्घकालीन आयोजना निर्माण, गुणस्तर परीक्षण, पहुँच बाहिरका वस्तीलाई प्राथमिकता दिने, दोहोरापन अन्त्य गर्ने र ठूला संरचना भन्दा पानी सञ्चालनलाई प्राथमिकता दिने व्यवस्था राखिएको छ ।
यसरी दाङ जिल्लामा पाइपलाइनमार्फत खानेपानीको पहुँच विस्तार भए पनि अझै केही वस्तीहरूमा पानीको पहुँच सीमित रहेकाले सुधार र दीर्घकालीन व्यवस्थापन आवश्यक रहेको छ ।
