रोल्पा, माघ २६ नेपाल कृषि प्रधान देश भए पनि रोल्पामा कृषि क्षेत्रमा विनियोजित बजेटको ठूलो हिस्सा खर्च नहुने र फिर्ता हुने गरेको छ । कृषि ज्ञान केन्द्र रोल्पाले विगत सात वर्षमा ६१ करोड ५२ लाख रुपैयाँ बजेट पाएकोमा केवल ३२ करोड ६७ लाख रुपैयाँ, अर्थात् ५३ प्रतिशत मात्र खर्च भएको छ । यस अवधिमा करिब ४७ प्रतिशत बजेट कार्यान्वयन नहुँदा फिर्ता भएको छ ।
आर्थिक वर्ष २०७५/०७६ मा ८ करोड ३७ लाख बजेटमध्ये ६ करोड ५२ लाख खर्च भए पनि, २०७६/७७ मा १० करोड ८७ लाखमध्ये केवल ३ करोड १७ लाख खर्च भएको थियो । २०७७/७८ मा ९ करोड ६६ लाख विनियोजनमा ८ करोड ७ लाख खर्च भए पनि २०७८/७९ मा १४ करोड १९ लाख विनियोजनमध्ये मात्र ५ करोड २ लाख खर्च भयो । पछिल्ला वर्षहरूमा बजेट विनियोजन घट्दै गएर २०७९/८० मा १० करोड ११ लाख, २०८०/८१ मा ४ करोड ३८ लाख, २०८१/८२ मा ३ करोड ९२ लाख र चालु आर्थिक वर्षमा २ करोड ६९ लाख मात्रै विनियोजन भएको छ ।
कृषि ज्ञान केन्द्रका प्रमुख महेन्द्रकुमार ओझाका अनुसार, कोभिड महामारी, स्थानीय तहबाट कार्यक्रम सञ्चालन, जिल्लामा आवश्यकतासँग मेल नखाने कार्यक्रम र बजेट तथा अनुदान घट्नु मुख्य कारण हुन् । उनले भने, ‘कार्यक्रमका लागि आवेदन नपरेकाले र स्थानीय तहमा कार्यक्रम आउँदा केन्द्रमा कम कार्यान्वयन हुने गरेको छ ।’
विशेषज्ञहरूले यसरी बजेट खर्च नहुँदा जिल्लाको कृषि क्षेत्रको विकासमा असर पर्ने बताए ।
