कोहलपुर, वैशाख ४ पेट्रोलियम पदार्थलगायत अत्यावश्यक उपभोग्य वस्तुहरूको लगातार मूल्यवृद्धिको विरोधमा कोहलपुरमा सामाजिक अभियान्ता भुम भण्डारीले अर्धनग्न भएर सडकबाट विरोध जनाएका छन् । बिहीबार दिउँसो चर्को घाम र अत्यधिक गर्मीका बीच कोहलपुर चौराहमा बसेर उनले सरकारले जनताको ढाड सेकेको भन्दै विरोध प्रदर्शन गरेका हुन् ।
प्रदर्शनका क्रममा अभियान्ता भण्डारीले नयाँ सरकारप्रति जनताको ठूलो आशा र अपेक्षा रहे पनि त्यसअनुसार काम हुन नसकेको आरोप लगाए । ‘नयाँ सरकारले नयाँ काम गर्नुपर्छ । जनताको आशा, अपेक्षा र चाहना पनि हुन्छ,’ भन्दै उनले सरकार जनताको हितमा भन्दा पनि आर्थिक भार थप्ने दिशामा गएको टिप्पणी गरे ।
उनका अनुसार सरकार जनताको सेवा प्रदायक र व्यवस्थापक निकाय हुनुपर्ने हो, तर हालको अवस्थामा सरकार विचौलियाजस्तो व्यवहार गर्दै नाफाघाटाको हिसाबमा निर्णय लिइरहेको देखिन्छ । उनले पेट्रोलियम पदार्थको मूल्य वृद्धि अन्तर्राष्ट्रिय बजारको बहाना बनाएर पटकपटक बढाइँदै गएको दाबी गर्दै त्यसले प्रत्यक्षरूपमा सर्वसाधारणलाई असर पारेको बताए ।
नेपालले व्यापार तथा पारवहन सन्धि अनुसार सहुलियत पाउनुपर्ने भए पनि त्यसको प्रभावकारी कार्यान्वयन नभएको आरोप समेत लगाए । लगातार मूल्यवृद्धिका कारण उद्योग–कलकारखाना धरासायी बन्दै गएको र आर्थिक गतिविधि सुस्ताउँदै गएको उनको भनाइ थियो । उनले वर्तमान समयमा बजार पहिले नै आर्थिक मन्दीको चपेटामा रहेको अवस्थामा थप मूल्यवृद्धि हुनु सरकारको गैरजिम्मेवारीपन भएको बताए । ‘एकपछि अर्को गरेर भइरहेको मूल्यवृद्धिले उद्योग, व्यापार र आम उपभोक्ता सबैलाई असर पारेको छ,’ उनले भने ।
चर्को गर्मीका बीच गरिएको उक्त विरोध प्रदर्शन कोहलपुर चौराह क्षेत्रमा केही समय चर्चाको विषय बनेको थियो । स्थानीय बासिन्दाहरूले पनि बढ्दो महँगी र पेट्रोलियम पदार्थको मूल्यवृद्धिका कारण दैनिक जीवनयापन कठिन बन्दै गएको प्रतिक्रिया दिएका छन् ।
