हुम्ला, पुस २० हुम्लाबाट सिधै काठमाडौं जाने बस सेवा सुरु भएपछि स्थानीय नागरिकको यात्रा सहज भएको छ । हुम्ला हिल्सा यातायात प्रालिले एक महिनाअघि हुम्ला–काठमाडौं सिधा बस सेवा सञ्चालनमा ल्याएसँगै लामो समयदेखि भोग्दै आएको महँगो र झन्झटिलो यात्रा अन्त्य भएको स्थानीयले बताएका छन् ।
हुम्लाकी साविता परियार शुक्रबार सुर्खेतको वीरेन्द्रनगर पुगिन् । उनी काठमाडौं जाने तयारीमा हुम्लाबाट निस्किएकी हुन् । आफ्नै घर नजिकबाट सिधै काठमाडौं जाने बस चढ्न पाउँदा आफूलाई सहज महसुस भएको उनले बताइन् । ‘यसअघि पटक–पटक गाडी फेर्नुपर्थ्यो, भाडा पनि महँगो थियो,’ उनले भनिन्, ‘अब एकै गाडीमा काठमाडौं जान पाइन्छ, भाडामा पनि राहत भएको छ ।’
यसअघि हुम्लाबाट काठमाडौं जान सर्केगाड, सुर्खेत वा नेपालगञ्ज हुँदै गाडी परिवर्तन गर्नुपर्ने बाध्यता थियो । सडक सञ्जाल राष्ट्रिय सडकसँग पूर्ण रूपमा नजोडिँदा ठूला बस सञ्चालन हुन सकेका थिएनन् । गत असारमा कर्णाली करिडोरअन्तर्गत चुवाखोलामा बेलिब्रिज उद्घाटन भएपछि सिमकोट राष्ट्रिय सडकसँग जोडिएको हो । त्यसपछि ठूला बस सञ्चालनको बाटो खुलेको यातायात व्यवसायीहरू बताउँछन् ।
जिल्ला ट्राफिक प्रहरी कार्यालय हुम्लाका अनुसार पुस १ गतेदेखि काठमाडौंका लागि बस सेवा सुरु गरिएको हो । ट्राफिक प्रमुख राजेश चौधरीले काठमाडौंसम्मको भाडा ७ हजार ५ सय तोकिएको जानकारी दिए । ‘बाटोको अवस्था कमजोर भएकाले बस नियमित सञ्चालनमा कठिनाइ छ,’ उनले भने, ‘तर पहिले सर्केगाडबाट फर्किने बसहरू अहिले सिमकोटसम्म पुगेर सिधै काठमाडौं छुट्ने गरेका छन् ।’
चंखेली गाउँपालिका–३ का अगंराज परियारले बस सञ्चालनपछि यात्रा धेरै सहज भएको बताए । उनका अनुसार यसअघि बोलेरो र जिपले मनपरी भाडा लिने गर्थे । ‘बस सुरु भएपछि सिमकोटबाट सुर्खेत ५ हजार र सर्केगाडबाट २५ सयमै पुग्न सकिन्छ,’ उनले भने । बस सेवा सुरु भएपछि साना गाडीको प्रयोग कम हुँदै गएको उनको भनाइ छ । हुम्ला हिल्सा यातायात प्रालिका सञ्चालक विशाल रोकायाका अनुसार हुम्लाबाट काठमाडौंका लागि पहिलोपटक उनीहरूले नै सेवा सुरु गरेका हुन् । ‘त्यसपछि नेपाली सेनाको बटालियन बस सेवा पनि सुरु भएको छ,’ उनले भने । उनका अनुसार सिमकोटबाट सुर्खेत ५ हजार, नेपालगन्ज ५ हजार ५ सय र काठमाडौं ७ हजार ५ सयमा यात्रु लैजान थालिएको छ ।
बस सेवा सञ्चालनसँगै ४–५ पटकसम्म गाडी फेर्नुपर्ने बाध्यता हटेको स्थानीय भन्छन् । तर, सडकको अवस्था कमजोर भएकाले यात्रा अझै जोखिमपूर्ण रहेको उनीहरूको गुनासो छ ।
