चितवन चैत १ चितवन मुग्लिन, नारायणगढ सडकखण्डअन्तर्गत सिमलतालमा यात्रुवाहक बस र डिब्बा ट्रक एकआपसमा ठोक्किएका छन्। बिहान साढे ११ बजे भरतपुर महानगरपालिका–२९ स्थित सडकखण्डमा बसले ओभरटेक गर्ने क्रममा ट्रकलाई ठक्कर दिएको प्रहरीले जनाएको छ।
भैरहवाबाट काठमाडौंतर्फ जाँदै गरेको लुम्बिनी प्रदेश ०१–००१ प ०००९ नम्बरको बसले विपरीत दिशाबाट आउँदै गरेको बागमती प्रदेश ०३–००१ ख ०९३८ नम्बरको ट्रकलाई ठक्कर दिएको हो। ठक्करपछि बस सडकको डिभाइडरमा ठोक्किएर सडकछेउको नालामा खसेको छ।
दुर्घटनामा बसका सहचालक नवलपरासीको मध्यविन्दु नगरपालिकाका ४० वर्षीय रेशमराज थारु घाइते भएका छन्। ठक्कर खाएको डिब्बा ट्रक पनि नालामा पल्टिएको छ। घटनालगत्तै बसका चालक भने फरार भएका छन्।
प्रहरीले ट्रकका चालक बाराको जितपुर सिमरा नगरपालिका–१४ का ३२ वर्षीय सोनाबाबु सिङ्खडालाई नियन्त्रणमा लिएका छन्। प्रहरीले बस चालकको खोजी कार्य तीव्र पार्ने जनाएको छ।
यो दुर्घटनाले सो सडकखण्डमा यातायात केही समय प्रभावित भएको थियो। प्रहरीले सडकमा सुरक्षा व्यवस्थापन गर्दै ट्राफिक सुचारु गराएको छ।
