काठमाडौं,साउन २८ । पत्रकार किशोर श्रेष्ठको पक्राउको विरोध तथा प्रेस तथा अभिव्यक्ति स्वतन्त्रताको माग गर्दै नेपाल पत्रकार महासंघको नेतृत्वमा जिल्ला प्रहरी परिसर, भद्रकाली अगाडि आयोजित शान्तिपूर्ण धर्नामा प्रहरीले हस्तक्षेप गरेको छ।
समाचार संकलन तथा प्रकाशनका क्रममा पत्रकारमाथि भइरहेको ज्यादती, धम्की, दबाब र पक्राउको विरोधमा पत्रकारहरू भद्रकालीस्थित प्रहरी परिसर अगाडि धर्नामा बसेका थिए। धर्नाका क्रममा प्रहरीले प्रदर्शनकारी पत्रकारहरूलाई हटाउने प्रयास गर्दै धरपकड गरेको हो।
शान्तिपूर्ण रूपमा विरोध प्रदर्शन गरिरहेका पत्रकारमाथि प्रहरीले गरेको हस्तक्षेपले प्रेस तथा अभिव्यक्ति स्वतन्त्रता र नागरिकको मौलिक अधिकारमाथि गम्भीर प्रश्न उठाएको पत्रकारहरूले बताएका छन्। उनीहरूले पत्रकारले समाचार संकलन र प्रकाशन गर्ने क्रममा राज्यका सुरक्षा निकायबाट हुने हस्तक्षेप स्वीकार्य नहुने बताएका छन्।
नेपाल पत्रकार महासंघकी अध्यक्ष निर्मला शर्माले नेपालको संविधानले प्रेस तथा अभिव्यक्ति स्वतन्त्रताको सुनिश्चितता गरेको अवस्थामा समाचार संकलन तथा प्रकाशनका विषयलाई लिएर पत्रकारमाथि प्रहरी हस्तक्षेप हुनु आपत्तिजनक रहेको बताइन्।
पत्रकार संगठनहरूले पत्रकारमाथि हुने धम्की, दबाब, धरपकड वा पक्राउले स्वतन्त्र र निर्भीक पत्रकारिताको वातावरण कमजोर बनाउने बताएका छन्। उनीहरूले पत्रकारलाई आफ्नो पेशागत जिम्मेवारी निर्वाह गर्ने वातावरण बनाउन राज्य गम्भीर हुनुपर्नेमा जोड दिएका छन्।
पत्रकारमाथि भएको प्रहरी हस्तक्षेपको विरोध गर्दै पत्रकार समुदायले सरकार र सुरक्षा निकायसँग पत्रकारको संवैधानिक अधिकारको सम्मान गर्न तथा शान्तिपूर्ण विरोध प्रदर्शनमा हस्तक्षेप नगर्न माग गरेका छन्। साथै उनीहरूले पक्राउ परेका पत्रकार किशोर श्रेष्ठलाई तत्काल रिहा गर्नसमेत माग गरेका छन्।
