नेपालगन्ज, चैत २० भेरी अस्पतालमा भइरहेको वैज्ञानिक अनुसन्धानले सिफलिस (भिरिंगी) संक्रमणको वास्तविक स्थिति तीन महिनामै स्पष्ट पारेको छ । डा. बद्री चापागाइँ नेतृत्वको ’भेनस अध्ययन २०२६’ अन्तर्गत ३२५ बिरामीको विवरण संकलन गरिएको छ, जसले समाजमा अझै पनि फैलिएको संक्रमणको गम्भीर तस्विर देखाएको छ ।
तथ्यांक अनुसार १८७ जना नयाँ सिफलिस संक्रमित पहिचान भएका छन् । यसमा २०–४० वर्ष उमेर समूहका युवा सबैभन्दा बढी प्रभावित देखिएका छन् । जन्मजात संक्रमणका कारण शिशुहरूदेखि ६५ वर्षका वृद्धसम्ममा संक्रमण भेटिएको छ । केही केसमा आमाबाट शिशुमा सिफलिस सरेको (कन्जेनिटल ट्रान्समिसन) पनि पुष्टि भएको छ । वैदेशिक रोजगारीका लागि गरिने स्वास्थ्य परीक्षणमा ‘अनफिट’ ठहरिने संक्रमितको संख्या पनि उल्लेखनीय छ । यौनांगमा घाउ भएका बिरामी र पुरानो संक्रमण निको भए/नभएको जाँच गर्न आएका करिब ३० प्रतिशत बिरामीको विवरण रेकर्डमा समावेश भएको छ ।
भेरी अस्पतालले सेवा प्रभावकारी बनाउन छाला तथा यौन रोग विभाग अन्तर्गत ‘भेनस कर्नर’ स्थापना गरेको छ । कोठा नं २२ मा निःशुल्क, गोप्य र व्यवस्थित रूपमा परामर्श, परीक्षण र उपचार सेवा उपलब्ध छ । डा. चापागाइँले भने, ‘सिफलिस केवल व्यक्तिगत स्वास्थ्य समस्या नभई सामाजिक व्यवहार, औषधिको अनियन्त्रित प्रयोग र नीति कमजोरीसँग जोडिएको जटिल सार्वजनिक स्वास्थ्य चुनौती हो । यस अध्ययनले उपचार प्रक्रियामा देखिएका चुनौती, स्वास्थ्यकर्मीको भ्रम र बिरामीले भोग्ने सामाजिक लाञ्छनाबारे तथ्यगत जानकारी प्रदान गर्नेछ ।’
अध्ययनबाट प्राप्त निष्कर्षले राष्ट्रिय यौनजन्य रोग (एसटिआई) मार्गनिर्देशन र वैदेशिक रोजगारीसम्बन्धी स्वास्थ्य नीतिमा सुधारका लागि आधार तयार पार्ने विश्वास व्यक्त गरिएको छ । अध्ययन जनवरी १, २०२६ देखि सुरु भई डिसेम्बरसम्म निरन्तर चल्नेछ । यस पहलले सिफलिस नियन्त्रणमा मात्र होइन, सुरक्षित परीक्षण र उपचारका लागि जनचेतना बढाउने अवसर पनि प्रदान गर्ने विशेषज्ञहरूको विश्वास छ ।
